وجع الجسد فايت
وجع البعاد مسافات
والعَد ف الأوقات
رايح على مش جاى
باهت يا صوت الناى
ألَمَك على الفاضى
مدفون انا والروح
صوت الحيطان مبحوح
حشرج على البراويز
قلبك مالوهش عزيز
وجعك مالوش آخر
يا زمنك الساخر
على هدمة الشحات
خُرج اليتيم دمعات
متعانه لما الموت
افرح ياعم الدود
جالك جسد طازه
محسوب على
المخاليق
ولا كانش على بالك
إنى انتظرتُ الدفا
ولا عَدَّى من بدرى
ولا كنت يوم أدرى
انى هاموت بردان
بتِّى اللى لسَّه ماجاتش
مَكيجتها بقهرى
إطمنت ماتت
عَدت قلوب فاتت
مشواير بتتكمل
كتفى الضعيف حَمَّل
لمَّا انحنى بدرى
عمرى بقَى يِجرِى
وجريت ولا لحقتوش
القُدْرَه ع اللى خلق
دَريان بحالاتى
وهو وَحدُه قريب