يا خسارة شقايا
وتعبى عشان الاقيك
ليه تزود بكايا
بعت الدنيا عشان اراضيك

يعنى ف رايك تبقى الجانى
وتنسى حنانى وخوفى عليك
بعد ما كنت معاك تنسانى
وتموت فرحتى بايديك

يا قلبى يا قلبى
يامزودلى غلبى
قولى ايه مخبى
اللى بايعنا وفات اراضيه

خان وكنت شارى
قاد ف قلبى نارى
بعد مافوتت دارى
بارفع ايدى وبادعى عليه
ـــــــــــــــــــــــــــــــــــــــــــــــــــــــ
بكره هاشوفك قصادى
هتنادى عليا ...... نادى
وانا هابقى فى السعادى
بنى ادم تانى جنبك

هاشوفك وانت باكى
من لف الدنيا شاكى
هاقول لروحى فداكى
عذاب وجرح قلبك

تترجى فيا اقولك
كان فى الماضى وراح
ماعادش فى الحكايه
مكان ياخد السماح

خليك فى عندك انت
وخليك زى مانت
وانا هابقى  زى مانا
قلبى
عرفك فى غلطه

يعنى ف رايك تبقى الجانى
وتنسى حنانى وخوفى عليك
بعد ما كنت معاك تنسانى
وتموت فرحتى بايديك

البت من حلمها
شبكت ايدين الليل
فى ايد القمر
واطمنت ...
نامت......
صحيت لقت ورقه على الشباك
مكتوب عليها حاولنا
نستنى وماقدرناش

الجوع بينهش فى الشبع
يشبع
ويمد ايده لحد اخر الطبق
ييجى  العطش يشرب ف نهر
مايرويهوش
طول ما البكى موجود
ف نن العين
تلقى الخدود مطمنه
حتى ف عز الحزن
واخده للكفايه
الضحكه لما تترسم
فوق الشفايف
ليه بتاخد وقت
علشان تبقى صافيه
والطفل ليه من منبته
بيحضن طفله حافيه
كل الطموح
حق الرغيف
والحق مغموس
فى الامانى
مين يقول الحلم
واخد ناصيتين
طعم الحنان ف البعد
اقرب م الحنين
للنص كم
ف عز  عز البرد
والاهه لما بترسم
الحزن اللى ساكن بين
ضلوع العبد
غير لما تبقى ع الشفايف
للى لسه ماحسهاش
باكتب على ورقى اللى شاب
من كام سنه
مرثيتى وانا لسه
كاين فى الوجود
وانا لسه بين الكحل
نازل دمعتبن
يطّمن الخد انه واخد
للكفــــــــــــــــــــــــــــــــــايه

ليه الوجع دافى
حتى ف عز البرد
والالم ليه صوته اعلى
جوه منى
يكفينى انى اانجرح
وماقولش اه
القى الالم بيترجم الاهه
وهو مستكين
تنزل دموعى كفايه
وابكى من سكات
من غير مسكن
تلقى كل الجسم حاسس
بالوجع
وكان حد بيقرصك
واتت مابين الصراخ
والتبريقه متلخبط
بتتنطط
وﻵ بيشوفك الا عينيك
تلاقىكل من حواليك
بيتبسم
تشوف جواتك الحزنان
اقل كتير من الضحكه
اللى من حواليك
تحاول تبقى متعود
ماتعرفشى
تقوم تمشى
تلاقى الجرح ما لمش
وتتحدى بصوت مكتوم
تلاقى الجرح بيزود
دفا المه
تبات مهزوم
ولاتموتشى

اعزف على ايام الغربه
لحن مسافر مابيرجعش
فيه الناى مش قادر يبكى
لما الحزن بتدمع عينه
صعب عليه يتدارى ف ركنه
ويحبس همه بين حيطتين
او يطلع فى زفير متقطع
اصعب منظر ......
انك واقف ع الاسفلت
وقلبك واقف قدام منك
بينكو  عتاب
ماتقوليش انك هاتصالحوه
او ايدك تقدر تمسحله
نقطة دم بتنزل منه
وهو حزين
هو يشوفك وانت بتقطع
شريان ايدك
علشان تظهر انك شبهه
يضحك جدا
مايصدقش
لاغرب من ده
انه يبص ف عينك يبكى
يحس بضعفك
يمشى يسيبك
مايكملش
لحظه بتكتم كل مشاعرك
مابتخرجش
تلعب على ضلعين
من جسمك
لحن لميت مابيرجعش

خايف على بكره
يشبه سواد امسه
ماهو اصل بالفطره
حاضن على اللى وراه
صدقنى لو قولتلك
طعم النهارده غريب
اغرب من امبارح
مدهون بلون العسل
فى لسانى كان مالح
منظر وشكله عنيد
دهن الزحام الحيطان
نخب بسوسه العيدان
الصوت على صوته
خربش ف صوت الادان
خايف على بكره
خوفى على بعده
ماتقولش يا صاحبى
ايام وهايعدوا
وكل شئ فركش
كل اللى كان
فى الفكره متفركش
رجع لباب بيته
واتخبى فى الحيطه
ملعون ابوك يا امل
لو كنت يوم مكتوب
مرمى مع المطره
ماكانش دا لاتفاق
انى اتعمل دبدوب
واغير القطره
الله يسامح مييييييين؟
خلانا فى الساقيه
ماشيين براس انسان
لافين بجسم حمار

كان نفسى اكون لك يا وطن
بر الامان
كان نفسى اكون لك شط
لكن ف ايدى الف خط وخط
عاجزين من الشيبه
والله مش ذنبى
ولاكان بايدى انحنى
ياكش الزمان هدنى
وتعبت م الغيبه
( وغلبت اقطع تذاكر
وشبعت يا رب غربه)
لفيت على كعابى
وسكنت فى التربه
هههه
وانا اللى من خيبتى.....
طلعت فوق فى العلالى
ونزلت ع الاشلاء
جسمى الهزيل مشتاق
يتعبى فى الركنه
لكن قلولى ازاى
وهو فى المحنه
وقف وقال
((((((يااااااااااااااااخلق )
ولا حد رد عليه

طعم الحياه مشاوير
ومين بيجيرني
م الزحمه
لفيت انا ايام
ومين بينام
بلا رحمه

وانا بين ايدين الالم
باصرخ ومش طايق
مسجون مابين العدم
مطحون ومش فايق
ابوس ايديك شدني
من توهتي فوقني
ضهري بحزني انقسم
شابت شعور دقني
وانا بين ايديك مامور
هاتشوف عينيه النور
وشي يكون صابح
واسرح ف ضلايتك
يا حلمي يا منظور

مكتوب عليك يا قمر
تمشى فى عتم الليل
لا ف يوم جفاك السهر
ولا خدت منا دليل
ماشي فى طريقك ياعم
صابر ومين قدك
لا طلبت يوم من عم
اتعاب عرق كدك
شغلك تعيش
فى الضلمه وحدانى
حاضن كلام غنوتك
سارح فى ملكوتك
تترجى فى الشمسه
تخبز رغيف قوتك
وتغمسه فى الليل

الشيب صرخ
فى الشعر لاسود يوم
اصبر بقى يا اخى
كمل ف عمر الشباب
لحد مايجولى
مالك كده اخدك عجل سايق
تكسى الوليد من هنا
وتنادى على اسمى
انفض هدومى انا
يصعب على الحال
ضحك السواد فى الشعر
واتبسم
وايه يا شيب ثابت على حاله
اذا كان وليدى انا نافضه الجيوب
ماله
والعشق فارق وراح
سرق الخلا ما جاله
بالجأ اليك ياشيب
تبعدنى من شعره
يصعب على حالى
انى اعيش حاله

احضن ايدين السما
يحضن ايديه المطر
اتدفى من حضنى
واضمنى ليه
وابوسنى جواتى
اعشقنى من ذاتى
اضحك
يااااااااااااااااااااااه
من قد ايه ضحكتى
وحشانى بصتها
مانا من زمان بدرى
كسرت مراياتى
كان الخيال اضيق
من انه يوسعلى
وعافرت دمعلى
شربنى من دمعته
طعم القسى المالح
صفر خضار جسمى
وسكنت زنزانتى
خايف من الضلمه
صارخ فى تكشيرتى
انفض مافيك يا جدع
واهرب قوام للوسع
لقيت ايدين السما
واقفه بتحضنى