من الغريب والعجب
انى اشوف كلمتين منك
ع الحيطان جرافيتى
وتحت منهم
(قتلت بالرصاص الحى
فى تاريخ......)
________________________________

لون الشنب الاسود
لقيته على برواز شفايفك
يعلن وفاة
الكلمه اللى خرجت منك
_________________________________
احضن عرقي وابوسه
ينزل ع الارض ويبعتلها
بوستي
_________________________________
لو تعشقى الكلمه
هاكون صوتك
__________________________________
  

افتح عينيك واصحي
اصل الملايكه روحوا
والحلم بقى فاضى
صعبان عليك تفتح
عينيك
تلقى البشر يطوحوا.
ماهما يوم
ماتفتحت عينهم.
مالقوش ملايكه جنبهم
كان السرير فاضى.
خايف على نفسك م السكر
ف التوهه
ماتخافش.
عد ف صوابعك
واحد اتنين وقبل ماتوصل
لاخر العد
الموت يقولك عشره
تقفل عينيك تانى
وتحلم بالملايكه
بدون فراق

باسم الجمال والحب والحنيه
بكل اسم سماهولك ربنا
عايشين معاكى بننسى كل قسيه
وفحضنك المرتاح يسعنا كلنا
الارض مفروشه بكرم
حاضنه التاريخ نيل او هرم
فرحانه بيكى م القدم
مانتى اللى زيدتيها امان
ضلك مغطيها هنا
__________________________
الشمس تتبسم ف كل نهار
شايفه الكنايس والجوامع دار
مددين ونظره ياست يا خضره
مادّه الايدين لحبيبتك العدرا
الخير زياده وكله بالكتره
على ارضنا يطرح كمان وكمان
يبدر على الحاره محبه وشوق
من عمنا البركه على البسطه
للخاله اللى بتربط القرطه
للشقيانين خد اسطى ورا اسطى
باسو الكفوف قطه ورا قطه
دا الرب شاهد ان ست الحسن
من بكرها الدنيا زادت حسن
مافيش كتاب الا وزان بيها
حلف القمر لياخدله مليون حضن