حالا
اتاك الرشد..
فوق التمانتاشر
ربيع
الغار يبقى
وسر القاهره
 العصماء
فوق جبينها
ماتشوفش غير
الطيبين
واحنا اللى
ستاشر سنه
ملو البكا
 اوطان
مابقيتش محتاج
الحقن
اصل العروق
اختفت
مستنظر التراويح
الركعتين ماستحملوش
طول الليالى
دعاء
يارب دانا من غير
عذاب المصطافين
ميت
توجعنى اطراف
الامل
لسه الحنين لله
ارجع وارد
مابين عشق قديم
يحضر
كوجع المخاض
ويزوغ
الارض محتاجه
البلوغ
والجسم طافح
شمسياته البكر
والفجر فجر
بشاير
وانا لجل ماصعد
للعجب
ودعت كل الكباير
قم للنبى وانتفض
قد حان وقت الصلاه
الثوره تفنى البرايا
والعبد دامع ذليل
دمع السواقى
عليا
والناى بيضحك
للبشاره
قد جال ف الارض
خاطر
كل الملايكه
مجاوره
والطعم لذة لسان
اصل الكلام موجه
عالى
الله لا يهدى قوما
طلبوا الفسوق
للغوايه
عشقتنى عين الحقايق
وقت اصطفاء الاجنه
ماتحت قبة سمايا
مافوق فى الاعلى جنه
اخشى المساير
لعذر
آخد من التمر قطفه
عجب التوارد تحقق
شقشق نهار الولاده
الدنيا سجن البكاره
والاخره حره بتسعى
انا فى غياهب جماله
شاهدت من كان يسعى
قبس من المدد ارشف
علم من النور جانى
قد كان يحبو لفتره
حتى اتاه التجلى
سمى وخد باليمين
عجبا
اتاه اليقين
اوا فى التحيات
بركه
سلم وقام لجل
يختم
قاوم حشاه تبسم
وتعجل الباقيات
قبس من الحق
ات
قد يعزل الغر
فتره
حتى تشير البنان
سبحانه من يستقينى
من عين زمزم
 واروى

ارانى اعصر
خمرا
ارجوكوا
لا
لا تسمعونى
الملهيات عن
الهوى
ف الله اقرب من
قلب المريد
افلا اكون العبد
فى اصلابه
او لا اكون العبد
فى ظل الجمود
ف تعترفلى بالحقيقه
لاشتهى ضل النخيل.
تين وزيتون
وبقايا عنقودات التمر
تمر على الابواب
روحك بتسري
فى تنايا الليل
وترجع
تختلى بيك
وتعمل نفسك
النعسان ف ركنة
ضلمتك
ادن ادان الفجر
يا طايع
ماحفظتش
الا  قصار
ادن ادان العصر
 واسترخى
المغرب اللى عرفتها
سبع من البركات
حالات جذب
وارتخاء
وتيه بين المسبحه
والخمر
كسر سواك المحكمه
واتسوك
هل اصبح القاضى
كما الجلاد
 واقول شكرا
بامتثال
على
اطروحة الزنازين
ف دار
 الطبع
ودنوت من هذا
الذى
يبحر  ب سلة
مثمرات
من طاش فى
صلب الهوى
يتألم البعد
العفى منى
زى العيال الموقنين
الظن احيا
بلا عمل ولا
قوت
ولا جرنال
فالله اقوى من
الطبيعه
فى خضم الريح.

الليل ف مج
النيسكافيه
خبط على الشباك
فتحت
مش واقفه تحت
بتنتظر
والذكرى جوه
الالبومات
شقت سكوت
الامكنه
مبقتش انا
ولا هيا قبل
ماتمشى
كات بنوته
ويدوب ف طعم
السكر الريحه
قلبين وحبوا
وفارقوا
بالتأكيد
انا قولت
صدق الليل
و  شت
خلاص عرفت
ان اللى عمل
المنتهى
عارف

لملمت
كل اللى بينا
بس نسيت 
ولاعتها
ريحة البرفان
بيحضن
شماعتها
سايبه لون
ضحكتها
بوست
ف ننى عينى
خفت ادمع
لاحسن الدمعات
تشير
ع الخدود
لما الشفايف
تنسى فينا لافتراق
وتدوس
لايك

انا الواد 
اللى عاش 
بشقاوة 
بت حتتهم
وطنش مهما 
همه همومه
واتنعكش
بفرده وش
بش بشوشه
واتمرمغ من
الضحكه
ولو شقشاق
انا الولد اللى
ماتعلمش غير
الزق ف الدنيا
ورشرش ملح
على جرحه
وكمل شق
واتمعشق
حوارى
السيده زينب
بازلت بازلت
على المترو
ف عز الضهر
واتمظهر على
الدراويش
بخفة دم
انا الواد اللى
شمر
كم
قمصانه
وفردهم وقت
ما اتدقدق
على الشبابيك
كفوف البرد
وخدتنى عشان
نرقص
وانا طايع
انا الواد اللى كان
صايع
حلاوه الروح
مع البنانيت
يا بنت الايه
يا بلكونه
خدت منى
ومادتنيش
سنين الريش
لقيتها اتسرسبت
رملات
وزادنى الشيب
شقاوه وخفه
معجونه
بخبرة عمر
ماتشرب تمر
وتسكسك
على السيره
وسيبنى لسه
ف الصوره
وانا
لسه
ف عينى
الواد

لحد الوقت 
كام فنجان
قريتيهم
وكام كف
اشتريتيهم
برمى بياض
قالولى الديك
بتاعك
باض
ماصدقتش
ماكدبتش
لكنى نسيت
ياكتر البيض على
الدكه
وع القضبان
وماتكسروش
ناديتك تهربى
منى
ف قلب الحوش؟
يا جبروتك
هدوم العيد
على الموضه
عشان الشماعات
تلبس
يادمعة عينى
تندغها الخدود
ترمس
وتعمل نفسها
بايعه
شفايف ضايعه
ولقيتها
ماعرفتنيش
عيون تعبانه
م التهويش
وشعر ابيض
وليل فارق
نهار سارق
مواعيدى
تموت الساعه
من ايدى
ويغسلها عرق
كفى
ياعم استنضف
السكه
مافيش فايده
قضا ومكتوب
نبات نصبح
على شوكنا
جسد صبار
وطين شرخ
من الشهقه
عطاشى ومية
السموات
تنزل م القمر
دمعات
صعيب من يخنق
المنظر
يشوفه الطير
اسير المعجنه
الطاحنه
يقول امشير
فرد قلعه
يفوت امشير
وييجى الحر
متخفى
يابنت الايه
كده ماشيه
خلاص امك
سابيتلك
ورث.....
.........
ياخسارة جرافيتى
يومين دوكو
ومابينشفش
يخونك
وشى جنبك
وش
وانتى تصبحى
ع الريق
ياعم انسانا
واتمرجح
الملم نفسي
ف الركنه
كما العيل
جنيهه ضاع
وماتكلمش

تشبهيهم ف البراءه
يشبهولك ف السجون
يفتحولك الف طاقه
تقفليلهم الف كون
قلبى عندك يا حبيبتى
انما قلبك اصم
افرد الاحضان الاقى
كل حضن ينز دم
ترجع الاشواق بخيبه
تنطوى الاركان دموع
ملو ايدنا كل همك
ملو كل ايديكى جوع
علمونا من الميلاد
انك انتى احن ام
فا تفطمنا ع البعاد
وارتوينا الفرح غم
انتظرت دعاكى يامه
ف التقيت الهم كم
بس برضه الروح تعانق
وانتى ناصبه لنا المشانق
نعشقك جوه المزانق
يتعصر عضم الولاد
احنا ف عينيكى البعاد
وانتى ف عنينا القريبه
صدقينا احنا اللى ليكى
وش يضحك حضن طيبه
قلب يحلم وسط غيبه
لو بعدنا تبقى عيبه
يشتهى رجوعنا رجوع
مدنه حاضنه ف ايد
يسوع

الارض محتاجه 
لفضا
والزحمه انتيمها
اللدود
مترنحات فى 
الصبا
كالطبطبات على
الوجع
ـــــــــــــــــــــــــــــــــــــــ
ازاى يجوز لى
انى اعشقك
واحنا سوا 
راضعين مطر
من السحابه
الأم
ـــــــــــــــــــــــــــــــــــــــ
اكتبنى 
وليد
وانا سيبنى 
اكبر
والحضن 
اجندة احلامك
حطنى
ف عينيك
لما تسلم
وتنام
اكتبنى
ف منامك
ــــــــــــــــــــــــــــــــــــــــ
انا حظى الطالل
على بكره
حاضن فكره
لكم المشاوير
لما تعاند
القانى ساجد
ف قلوب
الطير
ــــــــــــــــــــــــــــــــــــــــــ
يا عيون 
من شهد 
الدمعات
حرمت على 
الخد
فطامه
ـــــــــــــــــــــــــــــــــــــــــ
اكمنى يدوبك 
لسه اخضر
اتمنى اكون
لون الننى
تعشقنى عينيكى
ادوب اكتر
من بين الرمش
اكون
مجنوووون
ــــــــــــــــــــــــــــــــــــــــ
ادوق جرعات 
من المكتوب
تزيد الصبر 
ف عروقى
ـــــــــــــــــــــــــــــــــــــــ
مابين الساقيه
والتوته
وكام حدوته
ع النايات
اقول الاه 
من النشوه
و اه تانيه
على امبارح
ــــــــــــــــــــــــــــــــــــــــ
وديتها
ف كام سيلفى
على كتفى 
وباتحمل
دى دنيا 
لما تستعيل
بتبقى اطول
من
المشاوير
ــــــــــــــــــــــــــــــــــــــــ
ان كان حكيم قال او ماقالش
الحب فرد شعاعه شمس
ولا عمره كان محتاج كلام
الحب قلبين رشق سهم
اترسموا على ضى القمر 
الحب فجر منتظر
من بعد ليل ضلمه وغياب
الحب داقق الف باب
من فينا ماتحبش وساب
ان كان عتاب او غير عتاب
واهو كل شئ كتبه القدر

ويعشقنى الهوى
حلاج
ف توب بكره
ومعبود الهوى
خسران
يامن طال الظلام
منه
حبيبات الندا
ع الزهر....
....
انا الفايت بامر
الله والقدره
على الطرقات
اشوف ف مرايتى
بعد الناس
وضمايرهم
اقول ارتاحت
من غيرهم
ف حضن الروح
ادين بعرف
من يصلى الخلاص
قلبه
ويطعم من حشاش
النجم...
.....
ان الله لايهدى
الى كفر
ولا يطعم عبيده
حرام
فلا تستعجل
 الريبه
ولا ترتاب
بلا موقف
ولا تغتاب ذنوب
النفس
بالتفكير..
خلقت بتول
لا عجبا
فكل الخلق
من ضهر
الحمأ كانوا
وكانوا بفعل
كن فيكون
ففى الاسراء
من صلى
وفى الاسراء
من يسجد
وف العلياء
من يجد
المذاق شراب
فسبحان الذى
وهب التراب
حياه
اداوى الجرح
يتفارق
ويبكى على فراق
جسمى
يشد الحزن
من قلبى
على فراقه
يرادونى البكاء
لحظه
ويرجع حيث
لاقيته
يا ميت عجبا
على الطيبه
تلاحقنى
وتتلاشى
ما لسه الجسم
مش طاهر
بيتحمل
خطيئة ادم
العليا
ويستغفر
عن الاسلاف
انا خايف
انا مشتاق
مابين اللخبطات
اسمو
بلا جسد
واصعد
 وتر
تعشقنى الصبايا
الحور
مانيش مسحور
ولا ندهتنى
نداهه ف نواحيها
ولا اتجنيت
انا حبيت
ومعجنى الهوى
بشوقه
وصرت
مريد

تعشق خطاوى
زحمتك
مع انك الكاره
وحيد؟
من اصل بركانك
بتغزل ليل.
ايا  
 محتج
انا وانت وانتوا واحنا
ضماير
واللى صاير
جبر
....
وبيعشقونا الكبار
وصاية
وغايه
 للمفروض
معضوض رغيف
العيش بنص
الفايده
مين فينا
يكون خسران
امان الحنه
عارفينه
على دينه
 اللى مستغبى
بندخل
واحنا شايفينه
ونستعبط
عشان نرتاح
تعبنا خلاص
من الراحه
وشغل الذات
لانفسنا
ومرجوع الحياه
عيل .
ماتسترجل
وحط حقيقة
الماضى
على حجرك
خلاص درويشك
المحتار
لقى ربه
سنين السبحه
من عبه
بتخرج ذكر
ما ادنتش
ادان الفجر
من فتره
عشان تسالنى
عن
رغيفين وكام
بيضه
وحبة ملح...
ع
الصلح القديم
جايلى
بتندهلى
من الحبسه
خلاص صاحبى
اخد اعدام
وانا ميت
من التعذيب
تدور الدنيا
فى الساقيه
اللى مابتخلصش
بس بننسى
بالعاده
عن الطير الدبيح
دمه اللى لسه
سخن
عن التركيب
ف توب المحن
عن اسمى
وعن سلسلتك
اللى ماجاتش
وعن سافرت
وسابت حلم
ماتحققش
اقر  انا الملزم
بتباعياتك
انى اخون
وماتكلمش
.....
لجل ارتاح

كل يوم يحكى
 انه عادى
كله تقريبا معاد
فى الكمال الافتراضى
ييجى وف نفس المعاد
واما ييجى الليل ويرجع
يكتمل تانى البعاد
هى حبة وقت
وكله بالتعود
كل واحد مننا
لازم يجود
واليمين حسب
المراد
والشمال ف الدنيا
زاد
تلتزم صعب انه يحصل
تيجى ف الاخر
 وتحود

انا فى سبيلى
ارتقى
اسد من الدرجات
فليشهد الرب
اننى
اصعد سبع
سموات

واطل على ليل
بلا قمر
ابكى
عل الدموع
تومض سواده
ياهل ترى الريح
العفى
يطوى الدفا
ولا الدفا
مالهوش وجود
انا فى سبيلى
ارتقى
اسد من الدرجات
فليشهد الرب
اننى
باعرج
سبع سموات
يا نفس هيا
اقلعى
القلب يحنو
ع الوليد
ابليس يأتى
من بعيد
يبكى
ويرجو ربه
(زيدنى رفاجه)
الله يغفر ما
ما يشاء
بدون علم
المذنبين
مابينى ومابين
الحياه
سلسال الام
مابين روح
تصطلى
وبين اسبال
العيون
الحضره كون
وسط المشايخ
اجمعين
يا جارة الروح
انعمى
فاز الغلام
شي الله
مدد
والفرض حاضر
فكفك كروب
المضرورين
وبكل اركان
الشريعة
والحقيقه
اعترف
ملئ الشراب
دواء
انا لا انام
عن الانام
وانتظر
استغفر الله
العظيم
هو المجيب
لحكمه
عنده الجواب
تمسى الفتاة
بحالها
تصبح على نور
الجباه
انا طير وغنى
ف القلوب
اسمى يدوبك
زقزقه
عمره وحجيج
جربت اطوف
والقلب مال
الروح تسال
يا فتى
اين المخاض
فأمر عجبا
خلف سير
الانبياء
على تمهل
واحتياج
اركع بدورك
فوق عناق
 الاوليا
وانضف ربيع
يكفينى ربى
انك سميع
والقلب نابض
دقته
(الله)
هل من
 مطيع؟

يا عيون مسجونه
ف رمشينها
ياقلوب تدارى
مابين ضلعين
الروح محتاره
مابين تطلع
او تستنى
مابين الاتنين

واتدارى ما بين
دمعه ودمعه
والخد
مافيش
طب ليه اطمن
للضحكه
والحزن
حياه

مابين القبه
واللاهوت
والحيره بتاخد
قلب
ايه معنى الذنب
مع السجاده
ووقفت كتير
حيث الفراغات
المطروحه
ممطوطه الشفه
بتتعجب
ايه ذنب الروح؟
..........
وامر على الابواب
ابكى
لا
 لست المعرض
عنكم
انا
مابين الاهه
والتأويه..
اوااااااااااه.
وتغيب الشمس
عن المنفى
ضليت الحكمه
مع الابصار
انا نفسى اجوز
روحى لقلبى
ولو عرفى
وماحسش
 جسمى
لقيط
على باب الجامع
اشكو لمن قال
قريب
اجيب
مش ليك !!!!
ولا غيرك
بس ف غيرك
سر عجيب
ويقال الوأد
مع العفه
مع قتل النفس
الباطن يخلو
من الاحقاد
لا وقت مناقشة
النقاد
الظاهر يبطن
ما تحت الاسرار
والبدئ نهار
القادر يخرج
حي من ميت
ويميت الحى
اذا انغلقت
ابواب التوبه.
ان شئت ملئت
ولا تعجب
ان يعطى
الواهب
لا يسلب
ما بين الظاهر
والباطن
وا
بين الباطن
والظاهر
مابين سطور
تستنبط
وقراءة ماتحت
 المجهر
فلتبحث دوما
عن جوهر
يتوارى خلف
 الاجساد
وقالتلى بتعشق.
.
.
.
اتحرق شوقا

لفيت ومرارة
سعيي
كتاباتى
ابحث عن وطن
من ذاتى
والقبر
قريب
ساعات اللدغ
تحاصر جسم
مالوش ديه
غير لاستغفار
(للاخره
مطالب
وف الدنيا
عجائب ))
ومابين الاقوام
سرائر
والله رحيم

قال لى القلب
يوما
سآتى لك بعرش
قلبها
قبل ان يرتد اليك
طرفك
وانتظرت
ولم يفعل

فتذكرت انى
ضرير

لن اترك فن
التعويذه
يكفينى قدح
البن على ضحكات
العامه
بيب بيب
ف الاوتوبيس
وسط صريخ
الحر
ولهفة شوقى
الساكنه
ف نقطة ميه...
..
كومبارس على
المانشيت التانى
بلون الدم
وانا لسه بالون
اسم حبيبتى
وهى تدارى
الله على رسمة
اسمك ف الكراس
سبحان
من خلى ايديكى
تدافع وتسلم
والاسم حروف
امى من الخوف
ندهتلى بلاش
ايه رايك ف
 التسابيح
على باب شراعة
بيتنا
يطل دبيح
والنجمه خميسه
ف ليلة القدر
اتفتح الكيس
جربت مراقبة
روحك
سبحان الله
الاسم براق
والشكل حصان
وعروسة المولد
نينتى خدتها
عشان ترقيها
ف صحن خشاف
وانا كنت وليد
ولا حدش فض
بكارة روحى
ذنوب
على مدد الشوف
عفاريت
ربونى
التليفزيون
مفتوح
رغم انى قفلته
عشان صايم
ف نهار رمضان
لن اعبث بقصاصات
العمل السفلى
الكل حريق
ملعون
وجوارحك واقفه
رغم ايات الله
بتتقال
اخنس
ها ها ها ها
العهد مابينى
وبينك
كف
وحاضن عين
فتعالى
بدون ملبوس
وتلذذى
 بماء الشمع
كرابيج
وعرايس
والجلد على
المكشوف
تنوره تطوف
اخلع جسد الظاهر
خلفك
واركض
وتخلص من اعراف
الشيطان
اثبت
الله ينادي فيك
البث
على طول البحر
 .كرامه
ومستغيث
الشيخه تتمتم
وتجول
وتبول على الاركان
طهاره
الارض سفاره
مع انك شارب
عرق التين
ولذوجة اكسير
الزيتون
الف باء
عجب تااااء
كل هموم الدنيا
بلاء
انا فى صلب العقد
يسوع
هام على وجهى
الجهلاء
مالك انت ومال
الناس
روحك تصعد
للاسراء
الله بك
وانت كل شئ
لا وقت
سعاده
لا وجد
ايش حال الدعوه
ترد
اذهب
واضم دراعى
 وحيد
يخلف من غاب
من الاسلاف
اتسوق خلف امام
القلب
اشترى حسنات
الجنه ماتحتاجش
الشهادات
ابكى
ما تحت القبة
غير فراغ
اسكت
ابكى
اصرخ
اتالم خوف
على مدد الجوف
يحيينى الذكر
اثبت يا قلب
اتمرجح
يا ايها العقل
قف
وكف
وعف
يا ايها القلب
استمر
ومر
وسر
ياايها المسخ
العجيب
استقر
ل ي ش ع خ ا ن
ا ب ن ع م
لم اقو عن
الكتمان
ازف
لاتسلك غير
طريق
الحق
وعافر
قد يكتب فى
الالواح
(فؤاد،)

قبس
من الليل
العفى
قمر يناجى
ربه
هل من نجوم
واراك تعصر
خمرتك
ف قزازة اليوم
التعيس
يا ايها الطفل
الشقى
قوم استقى
وغنى
لجل ماينحنى
ابليس

لا تنتقى
 الكلمات
منى
ارجوك بلاش
لسه مابينا
مابتداش
ازاى نسابق
واحنا اصلا
خرج حبو
الارض طالل
ع الخريف
ضمت عينيا
الاسئله
وسط الردود
متلخبطين
طيب بقى ...
لما انعدام
الموت يقرب
مننا
نبقى
ملايكه
وشكرا اللى
قولتها
للدنيا
تبقى صحيحه
جد
بتر الوجع سلسال
الام
جرب وشوف
حنيت مواضع
جرحى فجر
ماكافانيش
طنشت مت
اصل التزام
الصمت
ف الاركان
عباده
صليت بلاده
وقمت...
مش هى دى
الفاتحه
ولا هى دى
القبله
ولا توبت
بالقدره
هى كده الفكره ؟
متشكرين
استغفر الله العظيم
عن اى حدوته
شقا
نزل قوام المشنقه
على سلم
التتر
الاخير
ايوب يخرج
صبر
واحنا نكمله
ونركب سفينة
نوح
تشحط ف
طور سيناء
اخلع نعال
الخطيئه
وقابل
الله العلى
فى اى منظر
هو قابلك
م الميلاد
نرجع ف خلقة
يوسف الصديق
سجين الدنيا
الحر  فى
السموات
ابليس ما بيننا
يختفى
اصل الخفى
مكتوب ومعلن
كل شئ باوان
عيسى المسيح
يبرئ كفيفه
على الاله
يبصر ف حد الباطن
المكتوم
منك لطين الارض
طهر
وملتقى
تنزل جسد
والقلب نقطة
شمس
ف الملكوت
سبحانه من رفع
القلوب
من غير عمد
ولاقوت
للقلب صوت
ادن
وخلى الباع
يلين
انا لا ارى
غير الاله
عن اقتناع
انا لا ابالى
بالمبالى
وبالعدم
مادمت بين
الحى احيا
لايطرب الزمار
دوما
لا نعترف
وبحق خلق
الله
من ذاق اغترف
تلك الكرامات التى
يعطينى ربى
كلها
تلك النهايه
وف السقاية
منتهى

شوفتك حبيبتى
ف المرايا
حضنت كل الكون
قزاز
وشكرت عينتينى
العزاز
لساها فاكره
صورتك اللى
ف المرايا
اه ع الفراق
المفترى
ساق الخطاوى
بالجنيه
ووترنا واحنا
فى الحقيقه
اتنين
نموا من اصل
وتر
ياه ع السنين
البتر
لما بيحكموا
القلبين
بدين
الافتراق

استأذنت جدر القمر
قطفت من الليل
النجوم
واديتنى واحده
اكلتها
كانت حرام
وماكنتش اعرف
الا
لما
لقيت سحابه
مدمعه

...........

بأى ذنب تحتضر
...........
عد الذنوب
لا تستحى
من اخرتك
لا تعتذر
فهو السبيل
 المنتظر
على حر جمر
الخطوتين
كله بقى
سلف ودين
حتى ف
 عينيكى
لما توبت
قفلتى باب
التوبه ليه؟
الحمد لله
الذى
لم يخلق
الجنات
ايجار
كنت ارضيت
حضن الخطيئه
سبع من الليل
البريئه
انتظر
وانتى ف مكانك
تختفى
اه من البرد
العفى
يا نفس انى
انتفض
طوبى لمن سرق
الهوى
فالنفس منى
تنتحب
انضف بقى
وعرقت...
لم انوى الفراق
روحى ف صندوق
الضلوع
كبرت وداق
قلبى
يهيم
حاسب عليه
ف حضن
 الشيطان
اصلك جبان
والحوريات
خير وابقى
بس مغلول
الايدين
او سعرانين
للجوع
وف نفس
ترنيمه يسوع
مولود هلال
ادن بلال
وارحنا من هم
الحياه
ياتوك من النجم
البعيد
شمس وقمر
بالمختصر
شمس القمر
بيحبوا فى
سحابة سما
النطفه مش
متأكده
تنزل مطر
صلى على
الارض الحجر
ركعة رضاعه
واتبع المأموم
جماعه
كل ارض الله
مجاعه
كل خلق الله
طين
اين تذهب؟
عقلى بين القلب
ساكن
ف الحقيقه
عينى تنزف
 بالحرام
يحبل الخد
ف لقيط
تنتهى حروف
الشهاده
من شفايفى
ويبتدى التهليل
ان عين الله
تراقب
طب ساكت
واخلع النعلين
طب خر ساجد
لسه واحده
وتعرج السموات
تشاهد
تنتفض
لسه باقى
 المنتظر
لسه الردود
لم تكتمل

داريت النفس 
فى صدرى
ولست ب
دارى
ولا دار الحبيب 
اصلا
فى كام فصلا
على كام دكه
مرسومه
حواديتك
قابلتينى؟
اقولك لاء
طب ماتخافش
م الزحمه
امان خالص
وانا مالى
ومال الكل
حبيتك
قليل جدا
تكون الطالعه
منى
بجد
جواب واستنى
منه الرد
والاخلاص
وقد سمع
وما سمعتيش
اعاتب نفسي
يا نفسي
على نفسي
اللى ذليتها
منين بيتها؟
منين قلبك؟
طب الشباك
؟
كبرت خلاص
تنز دموعى
لبنيه
وبالنيه
اعيش مجذوب
اتوب يارب
هى التوبه
للمجاذيب
عشان حانتوب؟
تفوت على
خطوتى
اتاخد
ومين واخد
على الحيره
غير اللى
ماشافش
نور عينه
برئ دينه
من العتمه
وم التحسيس
يارب انا عينت
روحى
ف كيس
عشان
تبعد
وهى لازقه
ف الابعد
بغيرة الشوق
اشوف ضلعينى
لافين طوق
وخانقينها
اقول يارب
مستعجل
برئ دينها
برئ دينى
براءة الديب
حداشر اخ
اخ ع اللى
نسيوا البير
يعبطنى
وانا مادراش
غير انى دخلت
بطن الحوت
اشوف الموت
ويضحكلى
عليك واحد
ومش وقتك
انا ضليت
خطا الالبوم
قميص ابيض
وقلب ابيض
وقرش ابيض
وحتى فطارى
كان بيضه
ولقمة عيش
قوام تضحك
لبن ع الريق
بحبك
وانا كمان
يوووووووه
مانا عارف
مانيش عارفه
تفارق ليه؟
وانا استبقيت

وعز عليا
اشوف ميت
قريت على روحه 
كام فاتحه
وكام ميت 
وعز عليهم
الفاتحه
ولا طلعتش
على روحى

انا الولد 
اللى عاش وقته
عشان بكره
ومالحقهوش

ياريت يا بكره
تيجى وتشبه
امبارح
مابينى وبين
ولد كان نفسه
يكبرنى
عشان يعنى
ما يتحرر
لاكن الجرح
ف الماضى
احن كتير
من الوقتى
انا اللى كنت
من ديقتى
بلاقى مكان
ف قلب الكف
وبراحه
طوانى الليل
من المشاوير
وكتر اللف
ع الراحه
وع الفاضى
وع المكشوف
مافيش طلبات
من النوع ده
تكون خاليه
يقولوا مافيش
اشوفنى افيش
على كام حيطه
جرافيتى
يذيع صيتى
ف دنيا بتدى
كام ذكرى
عشان نعجب
انا اللى كان
قميصى
الفستقى بكومين
بقالى يومين
مافيش بينا
ولا رنات
يخونك حضنى
والعشره
دانا اللى بصمت
بالعشره
لقيت الحبر
بيغير ف خلقتها
رسملى الكف
مش كامل
تتوه الحيره
وتحير
سواد الهدمه
ع اللى مات
قليلة الحظ
ف الرمله
تشوف
خاتم
عجيبه الدنيا
فكرتها
توافى الشبعانين
قوتها
وتستحمل
على الجعانين
طويل الصبر
بزياده
وكالعاده
بترجح كفة
المطاط
وتتركنى
مابين الابيض
الداكن
وبين الاسود
البردان
رصيف الارض
يسمعنى
ويملى الفترينات
دباديب
بتتجوز
اشوف الكلمه
بتبوز
عشان تطلع
ومش عارفه
ف دنيا غريبه
بالمره
واهى بجملت
قسى الطيبه
على المشتاق
يا روح التوته
شيلتى الوشم
م الشجره
ماهيش ناقصاكى
بالمره
ولا ناقصه فراق
السهم م القلبين
قليل الذمه
واهو باعنى
عشان
هيا
ماتستاهلوش
صابون وصالون
والف مرايه
اشوف وشى
محل قفايا
متبدر
يا خلق الله
خلاص ماتت
وطال الدود
جوارحها
اكيد الفاتحه
على روحها
تكون ابقى
من الميت
باقالى شهر
على كام ساعه
بالميت نخش
مزاد
يا شهر... الزاد
ماتحكيش
الودان صامت
ولا صليتش
ع الغالى
يا كتر الزاد
من الحواديت
بلا ميه
ولا مليون
يرشوا الطينه
ع البونبون
وكل واشكر
طاعون علقم
من المكتوب
على حجرك
يا خلق الله
خلاص ماتت
وايه يعنى
مداد السيره
طافح جير
مع الارواح
وكام تعويذه
بالملطوش
يجيبوا مسخ
له اطراف
ماحدش شاف
ولا درينا
دا لسه الدم
ف ايدينا يقول
لله
ماتشحتونيش
على بابهم
دانا جوه
عقدت العزم
والنيه
بلاش ارحل
فإن اليسر بعد
العسر
جاء النصر
متشخبط
مع الصباعين
ف مين محسوب
على الجنبين
وانا نايم على
ضهرى
اتوب م المستحيل
والليل
كما الثكلى
يهرول ع الخدود
يرجع
سبع اشواط
يلاقى الباب
قفل وشه
ف وش الصبح
مش عاوزين
يموت التين
مع الزيتون
على عرفات
بدون احرام
صفح بيضا
من القرأن
يا عمر جبان
وسابنى قبل
ما اتشاهد
على نفسي

ط
و
ب
ى
لمن سهر الليالى
ولم يزل ف العشق
يجرى
يااااااااااا نعمة الاسحار
ط
و
ب
ى
لمن ركب النهار
وهاجر الى
ليل
اتى
وتعثر....
له من القمر
الاسير
ملئ الاجور
على المشقه
فلمن تجرع قلبه
دقه بدقه
سوف يبلى
جسده
والروح
تبقى

اطبق ايدى
على بكره
واعشم نفسى
بالطالع
انا المفتون
ب حور غنت
على النايات
ساعات باتمنى
ودقايق بتلحقنى
على الخطوه
اكش وطعم
حلقات السلاسل
جز ف لسانى
وماتكلمش
كمالة عمرى
ف الغالب
عيال جايين
شباب رايح
ف نص الليل
وعهد الله
مانيش مسئول
عن الوحده
حبيب قلبى
باشوفك خطف
نور وترد
عيون الورد
تستنى الندا
وتسرح
وتصحى تخبط
الاشواك
ماجاش لسه
ترد ماجاش
انا النتاش
تخصص نتش
ف الكلمه
عشان تعجب
بنات الجان
ادين بدين
طير سبح
لقى الحبه
ف قلب
الريح
رسمت القلب
ونسيته
وجت هيا
لقت قلبى
مانتبادل
خديه عندك
ماتتكسفيش
انا اتعريت
على ايدين
القمر
مرج الهوى
فيا
سقانى
جزر بحر الليل
ايا عبدا سجد
ليلا
ومستغفر على
العتبات
شفانى الحب
ف الرؤيا
متى الصب
يحاورنى؟
عليك الدور
ماتستعجلش
بتلمحنى
وتتشاقى
ونتلاقى ونتباعد
ولسه قلبى
لا يمسسه غير
طاهر
تفوت النعمه
ف الظاهر
ومالحقهاش
عشان بالليل
تلاحقنى
ماتزعلشى
عليك البركه
بالكومه
اقوم قومه
واعود حيث
انتهى غيرى
اطيع راكع
فلله اقوام
صلت
من حرقة
الاشواق
ايااااااااااااااا ربى
اوا  ايا من التأويه
تطلبه؟
وتسمعنى
صدى نفسي
يحاورنى
ويصفعنى على
نحو
فتدمع عينى
سا جده
رجاء
والروح بتتعافى
امل
وشجون
ادوب
والارض تشرب
من جسد
ملهوف على
الجانبين
حساب القبر
مستعصى
فمن ربك؟
وما دينك
وماذا فعلت
فى دنياك
ترانى الرملتين
تبكى على حالى
وانا مسجي
ومش ملكى
بدن
كان يوم من الايام
بيتحرك
على طوعى
لا عارف عطشي
من جوعى
..............
ولا املك.......
حساب نفسي
على الدنيا
يزوغ منى
مابين
ملكين
..........

شئ ف قلب
الولد
شئ ف قلب
البنت
يبقى حاصل حب
قلبين
حبوا بعض
(ان بعض الظن
اثم)
ان كل العشق
حلم
والنهايه
فضلت فوق
حاضن منام
المحرومين
اضراب عمومى
للملايكه
بلا انقطاع
الحضن ف
 الطبليه
جاع
شوفت القمر؟
مالك مغمى
نفسى يبقى
اخر شوفى
حضن امى
وانحنيت

كل البيبان
متزوقين
على لون
يتشكلوا
 لون الحيطان
ما اجمله
بس القلوب تتحمله
على اى جنب
مشاوره بس
ومستعد اكمله
على خد طفل
وكفته
النظرتين يتثبتوا
وتحن للشقاوات
تسيب اناتك
اللى مزعجه
فتح دواليب
البشر
هتلاقى جسمك
يتحشر
وتقول فشرت
فى عينك
الواقفين على
قبب الطريق
قسمتنى
فريقين
وقولنا اهو
ماتش
م اللى بنلعبه
واهى دنيا
مش مستخسره
فينا عادات
المشوره
والشوشره
فى المبشره
تنزل
كلام
سلملى على
كل القدام
صفين ورا
وجيلين امام
مش عاجبك الباشا
الهمام
مدفوعه فيه
سنين الركام
الذكريات المبدعه
تكسفنا مش من
نفسنا
واهو كله جاى
ع الظروف
تنسج طروف
الازمنه
مصلوب على
فرع الشجر
ناشف من
الشمس
البتول
يوم يبسبق
اليوم
اللى ييجى
 ف قلب يوم
مع دول ودول
وتلاقى نفسك
مش خجول
وتسفسط العمر
الحزين
عن انجازاتك
عيش وجلى
فى المسلى
وف اللذيذ
ويا مكتر الشعب
العزيز
اديله جوف
يديك ودان
سلملى على
صوت الادان
يفصل مابين
ساعتين صلاه
الذنب فوق
ع المقصله
قال يعنى
كنا ملايكه
يع من اللى
حاضنين الذنوب
روح يا بنى توب
 طب مانت توب
من قبل منه
واستقيم
ام النفاق
شيطان رجيم
ياللى خلقت
الالسنه
وحبة بشر
شوفت العجب
لما اختلطت
وعيشتهم
وف لحظه
التسابيح
مريح انك تفوت
وتهشهم
سبحانه ربى
الحمد له
مالك زمام
الكل له
مش مدركين
متدككين
وف وش مين
ننسى قوام
صايم عن النفس
الحرام
بس الحلال
سابنى وقام
هانعيده تانى
نقول دا زهد
المهد مش
محتاج كتير
الكفه مايله
للحرير
وانا طيرت على
كل الحقايق
والخلايق
نايمه موت
هسسسس
السكوت ما اجمله
شوفت الزواق
من اوله
 على كل باب
بس الحيطان
مستنيين يتجملوا
جن القصايد
مرعبين
يتكلموا من اى دين
بشر المعيشه
مربطين
وفوقيهم السقف
المعاد
طنش بقى
وحب البعاد
بلغ المراد
ما اصعبه
بطل كسل
راى المثل
سلسال جدود
من اصل جد
من جد ع الارض
اتوجد
واللى سجد
ماكانوش كتير
شقشق وطير
شق المسير
تلقى المصير
فحت الترب

حيا. . . .
انا
قلبا
اموت
 واستنزف...
والوقت يمر
مايسعفنيش
وانا بين الديق
والواسع
بتطوح زى
المطاط
انا تحت الباط
عاين حلم العمر
الجاى
من غير اكذوبة
ابريل
الشمس
الدنيا بصيص
من كتمة صوت
والعتمه تابوت
تنقش ضهر
 الابريق
مش طايق
كلمة( على قدى)
والودى مابينا
اللعبه
طاعون
القهوه العلقم
هى الحل
ليه تشتم امك
وتمرمطها
خسارة الحضن
قضيه مع مومس
بتليق بيك
الحق حلمك
٣٥
وبيستناك
ماعكاش بسبور
الهجره طابور
امسح دمعاتك
واحزق دهر
قولتلى من شهر
اه يا العن خلق
 الله
الله الله حكمة
 ف قنديل
بتنور طول الارض
راحات
طعم التبارح
شارع مبتور
اوك مبتووووور
البت اتدارت
حافظى على الجلد
خليه متعان
انا اصلا
مالمستش ايدك
للاحتياطات
غيرك طنش
وحلال
لاء
الجامع يومها
مايرحمكيش
الباقى رميته
ف قلب البحر
عشان الحمل
الكاذب
واهو لسه
ماجاش
ياربي انا اللى
 عشقت
لحد مادوبت
وحبيتك والصاج
مخروم
قرآن الفجر
يشدك
طرطق حلمات
دمعات الخد
و تجلى
يا مولانا
(صدق الله العظيم)
وعظيم بعظيم
مش هالعب
تحت الارض البور
انا مش عصفور
اه على المسخ
اما بيقلب شيخ
يابنى الشباك
قفل نواحيه
والبت خلاص
ماتت ع الحب
صندوق السجن
وزع قضبانه
صابونه وزيت
اعجن للعيد
انا ركبى حديد
حوشت الميه
ف كاسة الضهر
والبت فاتتنى
ولعبة لعبة
حسرة عمرى
وقهرة
 تحويشة الايام
دبله وتراويح
وخطوبة فشنك
ف حارة العيد
تاتا ترارا تا رارا
فرحانه يا خيبة
القلب
يا خسارة
حصص الدين
وحجاب
مع دقن خفيفة
وشبشب زان
فتحلى على
الاحزان.كونكان
وتعالى اغلبنى
طفوله
خلينى
اتنفس
ف
 المراجيح

ركن جوه البيت
مكان
متر طولى
متر عرضى
كله متر ف متر
طب فوق السطر
ساكت
نقطه واحده
والفراغ
كومة عفار
تتولد نجمات
تعافر
القمر اصلا
مسافر
شعلق الخلجات
وفك
شكة منى
شكه منه
خر
زفت
موجه
ع الاسفلت حاره
والرباط على الف
صره
اكسو بره
وانتهيت
شاعوا يومها
انى انتحرت
ومت كافر
بالتبنى
انما مين
اللى صدق؟
كله صدق
خدت  وقتى
مانتى ياما
دوقتى منى
لقمة العيش
الحلال
ابتدى بمانشيت
خلى
كل قطط البيت
تخاف
حد شاف الخوف
جبان
او جبانه
او لبانه ف بق
عاجز
نوح يؤدى
فرض واجب
يجمع الزوجين
وهوب
الدنيا مطره
تبتلع كل الخطايا
والوصايا
ف حضن مريم
وف يهوذا
قلب غير القلب
عشش
الخيااانه
والصليب على كل
شق
يوسف الولد
الحنين
قلبه دق دق
ع البيبان
ياعزيزى
الحيه سكنت
ف العصايه
الموت ولد
والحياه بنوته
هاديه
اما باقى الجسم
عتمه
نص كلمه ف نص
كلمه
فارت القهوه
ف حشا الكنكه
القزاز
فكرتنى الضلمه
هين ولا لين
ولا طيعت
لاء
مبين انى
ضعت
ف وسط طين
يا صلاح الدين
تعالى
فوق حصانك
انت مين؟
جاى لسيدنا
الحسين
اقرا عدية ياسين
والسلام على
الحنين
احنا نأسف
للمزاوله
عندنا الكشك
القماش
يبقى عاش
كل اللى باش
فتافيت
طراوه
اما ف الاخر
براوه
على الجناين
تتولد وتموت
سفاين مخروقين
كل من مات
ف المقام
قدم الصالح
ومات
بس انا اتقدمت
بدرى
للطاحونه
ريشه حمرا
ف ضهر
طوبه
جايه كركوبه
السنادى انما
قبل المعاد
والسؤال
فين السؤال
مولد الست
الرئيسه
ع البيبان
قوم وصلى
واغتسل
من كل باطن
بس سوء
جدتى بتموت
يا عالم
امى ماتت
جدى سلم
للحقايق
قبل بنته
اما باقى التربه
لاخواتى
الكبار
شوفت ربى
ف كل فرض
بس ساعة الجد
جايه
واحنا مش
متأكدين
ياكش تولع
واحنا فين
غير كل بكره
ف حلم واحد
بس ساحت
كل لون قابل
حبيبه
وحضنوا بعض
بس ساعة الجد
نهرب
او نقرب
م البراح.......
مانلاقيش
طعم الغموس
وهاتبقى
فل

بس مين فاكر
داليدا
ولا مين فاكر
امام
شد عينك للامام
مش هاتدرى
هو بكره
جه بقى
ولا دا ضهر النهارده
زى واحد كلبش
العنواين وسهم
كان بيفهم
واتاخرت وهو
مات
ساعة الذكرى
بتدعى
ع الموضات
اللاذقات ف الفاطميه
جوا مملوك ملك
بالبطانيه
نام ونعوس
سيس ادب
خرسيس
افانظيم
واتهلك
اشعل الغليون
وادخن
حد ماسخن
هوف كوف
عن الكلام
جوه تربيعة ايديا
شب حلمى
واتخنق
(قل هو الله احد)
قل هو الفرد الصمد
حاسس القدره
 اللى فيا
حد كابس ع الكابوس
سيبته يطلع
قام مدور ع الفلوس
طب ساكت
مش حرامى
 الضحكه
وصلت
اوبااااا
 فصلت
قول ساعات
صامت وصلت
هى جاعت
بس حبلت
بطن خضرا
تستوى ع الارض
 بودره
وتنتهى بكومة
عيال
هو ايه معنى
الجمال؟
غيركم انتوا
ف الحنين
للمفهوميه
الشافيه من كل
سوء
بالهدوووء
كل شئ بيحن
بدرى للسكات
قولتلك ساعتين
ومات
مش مكمل
زملينى زملينى
الشمس خافت
بلت السموات
مطر
هو ينفع ف النهار
يطلع قمر؟
اليوميه ف توبى
رقعه تجر رقعه
بس سامعه
وبابتسملك
بس دمعى
هو هو
مش فتوه
وبن سوق
كله يعرق
بالهدوء
حاره سد ف جوفها
شوق
نفسي ادوق
بس البلاستر
سد بقى
ارفعى الخلجات
وشقى
وعرى جسمك
و الدولاب فاضى
وامان
بس انا مش
 اولعوبان
بس جرب
الجعان ف الطين
ينفذ
عف جسمى
وفرض عين
زقزقت عصافير
جهنم
ف المدينه
حروقوا اجمل
مافينا
واتفقنا
وكل واحد شال
ضمير على كتف
غيره
ونط واحده
مش مكدب
بس كل الكون
بيحلب ف
 العيدان
والحبل ملو البيوت
الدفيانين
من غير رضاعه
والوضاعه
ف اللى باعك
واللى باعني
واحنا بيعنا
بالسكوت
بس مين فاكر
تاريخ العنكبوت
غير مصدق
بس ساكت
لما آمن

كتر البكا
بيعلم التراتيل
صليت صلاة
 الفجر ؟
يمكن
خطوتين
من غير مطر
وطلعت من
حلمى البتول
على
 الصبح الرشيد
السنادى
الصيف شديد
زيه ف العام
اللى فات
بس برد
الامنيات
خلانا ننسى
لون من الالوان
كلنا ف نفس
المكان
صدقينى العنكبوت
بيمص دمى
وانتى فين؟،
ضحكة الاحلام
مع الطعم العفى
لصوتك
ف المسدس
كام زناد
يكتفى الواحد
بواحد
جوه منه
بيشتهيه
يكتفى الكائن
عنيف
يكتفى رد السؤال
الله فوق الكل
واحد
يترمى من فوق
خطا المريخ
علينا
شبه نيزك
سب تفاحة
 الخطيئه
واليتامى بدون
غموس
ف الجدار
تلقى حل اللغز
لكن
ستنا العدرا
بتنده ع المسيح
الحى بيننا
لسه واقف
ف القلوب
مية صليب
على راس يهوذا
الالعوبان
يختفى النيل
 السعيد
فينا واحنا
بنتسحى من
وش بوذا
ف توب شيطان
اللهم بلغت اخر
يوم ف عمرى
مش مصدق
اننا نولنا
الشهاده
مش مصدق
ريحة الطين
المدمس
ف الصحون
اى دين
يمسح خطايا
الفلاحين
كلنا بنخاف
 نكمل
لاحسن اللقطه
الاخيره
ف كل واحد
شبه شوفناها
ف البوم الحساب
من كتاب
الانجازات
والهديه
شاب
(غنيوة قمر)
على كرسي معكوك
بالذنوب
مش هاتوب
غير لما هانتف
شعرتين
من ديل حصان
واكتوى بنار
الالم
على شكل
رفع الوشم
من سدر البنات
المختونين
مين يقول الاه
ف عز البطن
والضلمه
ورفس وشد
مين بقى يحتد
وسط النبرتين
الخوف
قد مدد الشوف
باعافر
لما سافرت
ايدى لجل
القوت....
......
ماجاتش.

عن الايام
وتكعيبة العنب
لسه قصاد عينى
وكيس مناديل
باشوفه لاول مره
ف حياتى
وجيب قلاب
ف جنب الشورت
والبنوته ف الاخوات
وعن اخويا اللى بعد
مامات
داريت اسمه
عن اللمه اللى
كنت باشوفها
تليفزيون
وكام حصه
ف قلب الفصل.
عن التوقيت
قليل الاصل
بالتيله اما كان
 يخلص
واول يوم
اشوف الصوره
ف بطاقتى
وعن اختى اللى
لسه ف نظرى
بنوته
وعن توته ف حضن
البيت
انا حبيت
بجد وكل شئ
ممكن
قديم القلب
فى الجته اللى
محبوسه
ما بين جوعى
وبين تصبيره
ع الواقف
اشوفنى با  شب
من ضلعينى
اموت م الخوف
اطب جبان
انا ف التو واللحظه
تجينى اللفظه
وتفارق
يادوب تخاطيف
مابين نايم مابين
صاحى
رماد يبهت على
الهدمه
سوادة ليل
وانا قلبى ف بدئ
هلال
نجوم دمى
تصبر كفى يستنى
نزول دمعى
مدى سمعى
فراق عينتين
على حالهم
و خد وخد طريقه
خلاص
بدون دمعات
ومين قال انى
مش مستنى
ادنى ممات
ولا لحظة حساب
القبر
ويفرغ صبرى
وماشوفهاش
قديم الشاش
على الرفين
ف اجزخانات
زمن عدى
وجاى ما جاش
وانا اللى فضلت
مستنى
مابين لاتنين
سلف والدين
يدين بالدين
واسده مابين
خرز سبحه
وسجاده
ودين بالعاده
وارثينه
بدون مفهوم
بيتطوح مابين
حركات
وقلب مافيش
انا دورت ع التوبه
النصوح
ف الطيش
نصحنى الشيخ
كما يعرف
ومين قال ان ده
بأمره
ولا أمرى
دى كلمة حب
تتدرس ونعبد
فيها حد الموت
انا ف الأسر
سلسال
التراب والدود
وكام تركيبه
على جدين
وام واب
ساقينى الديانه
شرب
وانا حبيت
ف شوف الفرق
يا طيب
مابين روحى وبين
جتتهم المكتفيه
بالاشباه
خميس العمر
بيلاحق حياتى
تواه
مايرشدنيش
سيبونى ازاحم
الصالحين
بدال الطينه والوحله
وكام رحلة عذاب
زايف
واموت اعمى
ومش شايف
ذنوب وماكنتش
اعرف ان اكانت
حرام
ولا
حلال
ولا
رماد ف الماضى
يستنانى لما
اموت.......
............
ويجلدنى......

الصيف وجب
لميت هدوم
الامكنه
اتعريت
من قد ايه واحنا
بنحلم
ان شمس الصيف
تمطر
نور علينا
واحنا نعرق
ذكريات
خدته عندى
ايوه بات
وقتها
ماكنتش
ست البيت
ف بيتها
وقتها كان كل
شئ
ناقص ف حته
حتى نفس الاوضه
داق
هربانين من كل
واحد شافنا
واحد
واحنا كنا مجروحين
ندمانين؟
لا ماظنش
اصلنا مش زى
جيلنا
قول تالتنا
حد ميت من زمان
قول على الدنيا
الامان
ع السرير
مرايات بتفضح
كل شئ
نقطتين الخوف
نشوفهم لما نصحى
واما نضحك
من سواد الليل
نشوف الصبح
ليل
خمس دخان السيجاره
خدته واحدك
اصلى باشربلك
ف سرى
الساعات عماله
تجرى
والعقارب
لادغين
شوف بطرف العين
عينين
اكتشف كف الحيطان
انه شقق من شقاه
طول ماحنا جنبه
هى حالتين
بس فارقوا
حاله واحده
ف نفس وقت
الشيخ ما
ادن للصلاه
قولنا حى
على القيام
ركعتين بيجروا ركعه
ف قلب ركعه
ف قلب عشق
الذكر
اسلم
انت مسلم؟
كان سؤالك
شئ فشيخ
الف مله والف
دين
ع الصراط المستقيم
يبتدى الجبروت يعافر
جوا منى
جوه سكينه المبادئ
احنا حالفين
ع البشاره
والاشاره
ان روحى تختلف
مع جسم ميت
مش هاعيد
غير ف حضن
ابويا وامى
طرف  رجلى
ف طرف كمى
روحت شديت الزناد
جوه حدوته العناد
المستديم
البكا يغسل
الهدمه من الشهر
اللى فات
والسرير يحزن
على فراق الليالى
وسط عفش لبيت
جديد
كلنا انسان
 سعيد.........

ليه نقول
ع الحب كافر
واحنا مش مطمنين
واما ييجى فراق
يسلم
كلنا بنقول امين
ليه بنسجد
ليه بنركع
للعذاب ونقوله
اوجع
واما نلقى عينينا
تدمع
زى مانكون
 فرحانين
زيينا زى العدايم
يمكن اكتر
لما يبقى الحزن دايم
موتنا  افضل

حتى بعيونى
البسيطه
كنت عارف
ان مدد الشوف
حنين
مش مبين
كم مر ف
اخرتى
باعترف للدنيا
وسط الاسئله
ان عمرى ماكنت
واقف بره مشهد
لاختيار
مدى ايدك
لما ايدى
فردت منها
الامنيات
حضن سكن
الكل بس
ف لحظه
مات
اه على الشوق
الغريب
خزق الالبوم
صور
من ميلادى
لحد دفتر
لافترا
مش بعيد
الموت
عن الاحوال
ياتوب
 الذكريات
كله ف الاخر
ورق
جوا كشاكيل
المراجعه
ف لامتحان
شوفت ابويا
وهو جد
بنفس صوره
كنا واخدينها
زمان
كمل الاركان
وبل الريق
بزمزم
لف كعبة
وبوس حجر
واوعى تنسى
انك نفر
مش هاتهرب
م الحساب
بس عنها
وروحت قافل
ع الحقيقه
قد ايه الواد
بنفسه مد
ايده وهى
لطمت
قد ايه الكون
بيشمت
ف الحيطان
قد ايه المسؤليه
بتكتمل
وسط الحلال
قد ايه ف الليل
عيال
امسح الدولارات
وعافر
جنب شط البحر
ترسى
انا بتولد
وانتى بتحبى
بس مين فينا
هايسبق مين
يكمل
اه يا اجرام
الطاحونه
لما تقفل
ع العضام
رب صليت
ربي صمت
ربى زكيت
ربى اشهد انك
انت خلقتنى
وانا باعبدك
تعرفونى منين
يا كمية بشر
؟
علشان تزايدوا
ع الحقيقه
سامحى يامه
كل من قالك
بحبك
وانتى صدقتى
البنوه