المجد للعدرا
التى
شافت وليدها
بيتصلب
من دنشواى
لحد لاتنين اللى فات
كل اللى حواليها
يشوفوا يهوذا فيه
الا قلوب الامهات
ف كل مره يشوفوا
ع الصلبان
مسيح

انا روحى
مخاصمانى
امنى نفسى
بالتوبه
الاقى التوبه
مغصوبه على
لسانى
ماليش غيرك
حبيب تانى
بقالى سنين
بادور ع اللى
يلحقنى
تكون جنبى
اكون ناسى
واشوف الطيبين
اعمل مانيش
شايف
انا خايف
ومين فينا
مابيخافشى
ف يوم تقفل
رموش عينى
اجى افتحها
ماتقبلشى
ساعتها الحسره
تطلب م الدموع
تنزل
وتنزل من عيون
غيرى
احاول استلف منها
دموع ليا
لسانى يخونى
ومايطلبش
تغسلنى الخلايق
وانا جواتى مضايق
طهارة الميه
ليه تلمس
جسد عاصى
ومش فايق
وهايلفونى ف الابيض
وانا قلبى السواد
ماليه
اشوف الحزن
ف عيون الكفن
ماليه
اقول للسانى ابعدنى
لسانى مات
وياخدونى على الجامع
لاول مره اشوف صلوات
خلاص اخرى على الدنيا
الاقى القبر مستنى
معاه لحاد
ويسحبنى كما الدايه
ما سحبتنى ف اول
نزلتى الدنيا
رجاء منى اليك
ياللى
خلقت النطفه
وجدتنى
لحد ماجيت
اذا كنت ف حياتى
عصيت
تسامحنى
وتجعل من يسامحنى
وتهدينى وتحيينى
لحد ما اموت

كان نفسي قبل ما موت.
ايديا تمسك روحى
ونسافر لفوق
لاكن سبقنى الصوت
والطلقه خانت روحى
من ديلها
صدقتنى يا صاحبى لما قولتلك
الورد بيقفل هنا
ويفتح هناك........

شوفت الملاك؟
كان كل يوم يبعت لروحى
كلمتين
(امتى هنتلاقى)
وكأنه مستنى الجسد
يتلاقى مع طلقه
وماضيه مع القدر
شبه اتفاق
يا صاحبى مين فينا
مجرب لاشتياق
غير اللى حب بجد؟
..............
انا قد ايه حرمت نفسي
من حالة العشق الالهى
اما التقيت الروح مابين
ايد الاله
تقرا الكتاب
من غير خجل
كان السؤال .
ليه الأجل مركبش عجلو
من زمان؟
وليه الفراق
ع الارض مر؟
فعرفت ان الارض
كان من نفسها
تقلب سما
علشان تشوف روحى
وهى منعمه ف البعد
صدقتنى يا صاحبى لما قولتلك
الورد بيقفل هنا
ويفتح هناك

انام الليل
يكون حلمى
بناس سهرانه
مش بتنام
وقلبين ع الوجع
باتوا
ويستنوا النهار
مايجيش
انا والشيش
وقدامنا عامود النور
تلاته وتر بنصلى
صلاة الحاجه ف الغالب
بيحضن وشنا
القبله
سحابه بتحضن السموات
تمطر ميه من زمزم
تنزلنا الشوارع لف
رايح جاى ونتلاشى
ونطلع للسما السابعه
بدون معراج
هنا شهدا وملايكه وانبيا
اتلاقوا
كمان داقوا من الجنه
وحورها العين
هنا جبريل بيستقبل
حروف يا سين
هنا الشياطين
بتركب بعضها
وسهم الله يحرقهم
هنا الجنه هنا جهنم
هنا المربط هنا العنوان
اشوف عن بعد ارض الله
بتتزلزل ادان ف ادان
ما عارف عصر من مغرب
ومستغرب اوفى ازاى
انا بالفرض
افكر ف الوضوء
ازاى
وهى الروح بتتوضى؟
ينادينى الملك
(جسدك ف سابع ارض)
دفنت النفس ياربى
وكان مثواها قلب الطين
وروحى ملك ليك عندك
يارب اكرمها لجل حبيبك
الهادى

كتر البكا منى
موضينى
صليت وسلمت
وماستكفيت
بصيت لسبحة
ايدى سابتنى
الذكر حجّر وقتها.

ف لسانى فكرت
انى ضيعت
وجريت مابين الفرض
والسنه
ع العهد متواصلين
مش زى ماكنا؟...
الروح تزعق
بصّلى
وانا جسمى نى
مش قادر انى
المحها بعيونى
خذيت.......
يارب غيتنى
من موات جسمى
ناديت....
فوصلنى من ركنة
حيطان البيت
صدى صوتى
( يا ابن ادم مكانك
بلل بذكرك لسانك)
الروح بكت من دموعها
بللت خدى برجوعها
وقعدت اذكر.
جسمى خدل
ولقيت ملايكه بتحمله
منظر يشيب ابن مين
يتحمله
العين بكت
الروح بكت
ايدى اشكت من قلة
السبحه ف ايديها
ناديت عليها
بارتعش
غطتنى بالحضن القوى
وسابتنى ساجد بالقوى
شكرا يارب

هاتخاصم الالوان
وتبطل الضحكه
هاتعيش هنا انسان
مش وش بلياتشو
ياسيدى
اقعد مع
الجمهور
سقف معاهم
حس بالتسقيف
قبل المعاش مايركنك
بينهم
تستنى حد يضحكك
ماتشوفش

الايد اتمدت لثوانى
ورجعت تانى
وكانه ما كان
هى الايام بتودينا
ولا عينينا
هى مابتشوفش
اما الواحد بيقى
يبقى بيتقسم كذا
واحد
اصله ف واحد
يرجع واحد
وكأنه ماكان
نتلاقى بنفرح
ونلاقى الناس
من حوالينا
قوام تجرح
حتى بنظرات
الطيب مات
من جوانا
ومكانه خلاص
اصبح خانه
يلعب فيها الكدب
بزيفه
ويشهر سيفه
واحنا اللى نصدق
تخاريفه
ونعيش توهان
ونقول الناس
وحشه وخاينه
مانبصش
لنفوسنا الباينه
ونعالج بعض
ونصلح مراياتنا
المكسوره
وتبقى الصوره
كما لو كانت
ماتخدشتش
الوش الواحد
يرجع واحد
مش بهتان
ويكون انسان

الشمس لمس
الدفيانين
والصبح من دونها
غريب
بكيت عيون البردانين
حد العطش للدموع
يا ورد امتى الرجوع
الجوع ملى نظرى
لاسفلت فاضى
من وجود الخلق
والبرد نازل سلق
ف الابدان
والعضم خايف
يدخل الميزان
حاسس بنقص الحلم
ف الضلمه
يا هل ترى بكره
اللى جاى
شريد
ولا يعيد ضحكايته
من تانى
و لاّ هايضحك بس
لثوانى
ويكمل الطقه
الم
الصوت بيكتم صوته
مايكملش
والحنجره حايشه كلام
يطلع
بس الحقيقه زارعه فى
الاذهان
لابد صبح الشقيانين
يطلع
اصل الحبايب عرقانين
بالصبر
على قد قد القوته
مابتجمع
يا طيبه فينك
والله واحشانا
ماحايشنا عنك
الا ليل الليل
الحلم داخل زنق
ف عشانا
والتكمله صعبه
تهد الحيل
النجمه ماتت
والبقاء لله
والمطره نازله دموع
على فراقها
لاسفلت بيطبطب
يدارى عماه
لجل المطر مايشيلش
احزانه
غربه ف غربه
ف عز عز الوطن
والتوهه بتحمل وبزياده
راح الكلام وسط المنام
ساكت
اصل الكلام ف الصمت
كالعاده

وبترجاك
تسامحنى
يا احن عليا من كل
اللى سامحونى
باعذب نفسى
وارجعلك الاقى
الباب على وسعه
تاخدنى ملايكه وانا باكى
على اللى عملته
من ندمى تموت قدمى
وماتحركش
اموت ساجد
وتحيينى
اموت اكتر
وانا ندمان
انا ذنبى ان انا
انسان
ظلم روحه
مابين جسمه
وداس بزياده
ولا هموش
انا اسف
باقولها والدموع
شقت خدودى
خريف
مريض قلبى
وذاد تخاريف
بروح مخنوقه
بتصّرخ كفايه سواد
وانا ف مزاد
بابيع عمرى اللى ماملكتوش
وناسى انى هارجعلك عضام
فانيه وتكسينى
وهاتحاسب والاقى نفسى
قدامك
مافيش غير رحمتك
تلحقنى م التوهه
ف بترجاك
بلاش عدلك
وخلى رحمتك تسبق
يا احن عليا
من نفسى اللى
سابتلى
الدموع
وخلاص

اشوف الطير
اشوف روحى
يرفرف اندبح
اشواق
ويعطش قلبى
اقطرله يبل الريق
ويدعيلى
ماحدش ف الغرام جرب
حبيب مكوى باشواقه
ابص لجسمى استغرب
ادوب اشلاء ف اشلاؤه
اشيل اسمى من المواليد
كانى ماجيت ولا عتبت سجاده
ولا مسكت السبح اذكر
مانيش محتاج طهاره لجسمى
م الاخر
كانه مافيش..........
يقولوا الفرض والسنه
وانا متهنى بالجيره
جوار اسمك
ياربى كل ده وانا
لسه ع العتبه
ماخطيتشى
خطاوى السلمه الاولى
اشوف الرحمه معموله
على مقاسى
ادوب حبا ف اول حرف
من اسمك
واعيش العمر مستنى
اللقا منك
على جمرى
اعيش العمر
مغلوبا على امرى
ليوم معلوم

حضن وفرح
وايدين بتدفى
كلام
واللى انكتبله عمر
بتشخبطه الايام شقا
وانا وانتى كنا فين؟
غير شعلقه ف حبل
الزمن
اطمنى لسه الوجود
عاين لنا المطرح
سيبى الكلام يهرب
من التخويف
وغمضى عينيكى
وتعالى
عمرى ماعيشت
ف دور بشر
ولا حتى ابليس
اتدفن
ف القلب
دانا حضنى واقف
للملايكه علام
والروح تنادى
ماتدخلوا ف الدرب
سبحانك الرب الاله
خلقتنى
مفطوم محبه
من الحلال
نزل الندى رضعنى.
غار المطر
سبقه وكان شلال
فشربت اول قطفتين
لما اكتفيت
اطمنى
منى الحياه
اتبروزت ايات
كل الدواوين اتملت
ابيات
سكن للعاشقين
ما تضيعيش وقتك
ف خوف
واتعلمى منى الحروف
اول كلامك

امجد
يا ابنى البكرى
ياشايل الضحكه
اللى جايه
لوقتها
باوصيك يا ولدى
اما يحين الاوان
لتردها لاهلها
وفوقيها بوستين
لجل تفرح....
بص لى
شايف عينيك
شايله طفولتى
من البدايه
تكبر قصادى بدر
ف نهاية الغروب
مانت الهلال
ف بداية الشهر
العفى
عرف اخوك معنى
الدفا
زى ماعرفتك
انا وامك.......
........
يا محمد ابنى
يا ابتسامة الريف
ف وقت الفجر
يا تانى ضحكة
عمرى
باوصيك ياولدى
تبدر الحنيه
فى الطين
لجل يصبر
ع القسى وتشكله
فرحة توزعها
ع البنوتات البكر
عارفك حنين
لاكنى باوصيك
لجل توفى بدين ابوك
وتكمله .........
.............
يا ولادى يا وشين
سما
يا نجمتين
اوعاكوا تتغروا
ف سحاب
اصل الشتا بيخذيه
مطر
وخدوا امكم شمس
وقمر
واتدفوا بالضلين
اصلى حجزت التذكره
على كلمتين
(عوده و ذهاب)

كان نفسى
وقت الوحده
حاجات كتير
كانت تونس وحدتى
الاستبقا جوه الضلمه
موت
والصوت بيطلع صدى
ومافيش امل من ان ييجى
اليوم واهاجر

الارض سابت بعضها
وفارقت
حتى اللى الماشيين
بصوا على الحيط
بالصدف
مالقوش خيال
كانت ساعتها ماسكه
ايدى متبته م الخوف
اصل السحابه دمعت
على فرقت الاحباب

ومابيننا سد
تمشى فى طريقك
ناحيتى
وبيمنعك
حيرانه ليه
مش شوفتى ايدى
ممدودين
وملو ننى العين
براح
يبقى لايه الجراح
وانا ليكى مستسلم

اسبلت عينى
وبانتظر ييجى المدد
والذكر هز القلب
حد ما الروح انتشت
كل الابالسه اتلبشت
مالهاش مكان
وانا والملايكه بدون معاد
ومكملين
الحضره فيها الحور
بتسبقنا عدد
اصل المدد
يعطيه كريم

عارفه لما تبقى
كل الدنيا برد
والشوارع شبعانين
من المطر
وانتى حاضنه كفى
وتدفى
ايديكى السعقانين
عارفه بابقى ساعتها
طاير م الفرح
والقى كل الكون سرح
شعر وبيوت
حسسينى اننا رسم الورق
قلبين مابينهم تلج دايب
نقطتين
اقوى من الحب اننا
متدفيين

حبيت عينيكى
اما الدموع
نزلت مطر
وجريت علي ايديكى
استخبى منهم
حضنتني
عريتنى
حسيت ساعتها
ان الشتا
لساه ماجاش
وقعدت بين كفك
الملم جتتى المتبعتره
واضحك على بنت الذين.
جالك معاد تتلمى فيه
اصل الحظوظ دايما
تفارق لانتظام
حبيبتى صدقتى انى
ماقدرتش اسيبك؟
ضمى كفوفك بالقوى
واستقوى على جسمي
اصلك ملكتيه من ساعتها
اما الدموع جريتنى على ايدك
وانا خايف
وباتلكك

انا قلبى مهبط
لانبيا
وروحى
سجاده صلا
وايديا باكيه
لجل ينزل دمعها
خرزات
تخلى الارض تذكر
ووهبت جسمى
للاله
بعد اما تاهت سكته
وفارق
سبحانه من دب الحياه
ف الميته
خلى الدم ميه للوضوء
شلال
ولقيت حياتى بترتعش
خايفه من الجسم
العفى
رغم ان جناحات الملايكه
ملست على شعرى
شيب
اطمنى
اصل انتى مش متعوده
على خوفة الاجلال
اطمنت
وبللت ريقى ندى
دايب ف عسل الذكر
من حبه
ارتويت..

يارب انا من شهقتى
قلبى اتشوى
والريحه طلعت
مسك
ملت البيت
بخور
انا بس طلبى منك
انى ادور
بالميه وسط الجنه
انقش بايدى الحنه
على ايد الحوريات
انا بس طلبى انى اعيش
قبل الممات
ف محبتك
وانك تاخدنى بايدك انت
ف رحمتك
يارب