اكيد فى السكه 

ناس تانيين

تمر الزحمه ع الزحمه 

ف وسط رماد مدى بصرك

مابتشوفهومش

بتطمن عشان عينك 

بتتعود على المنظر 

ساعات تصبر 

ساعات بتمل

فا بتغمض 

وتعمل نفسك اللى بيوجد الأسباب

تفر دفاترك المنسيه قدامك

قصص خربشتك النونو 

ف علم البدئ للتكوين

تشوف مريلتك الكاروهات

بتكبر سِنتين عنك

تكون مش عارف اللحظه

اللى بعدِت فيها وقت ما

شافت التوكه 

وشافت كراسات بيضا 

بدون كتابات

فتكتب فيها حرف البدء

من اسمك ومش عارف 

تركز مين هاتفوز وتركب 

جنبك الصفحه

فتطوى الصفحه 

وتسيبها 

ويبعد عمرك الماضى 

ويخضر الجسد ويشِب 

مابين الكتف والكتف 

الصِبا بيدوب 

ويستعجل خطى المكتوب 

مابين السطح والشارع 

وتتركز مشاعرك 

بين العصر والمغرب

وبين قلبك ودقاته

وبين تستنى وتفارق 

وبين ماعادتش بتفارق

وبين وماعادش شئ فارق 

وبين أنا قد ايه عيل 

وبين أنا كنت مستعجل 

فاتتمهل ويحضن جسمك السجاده

يقطعها 

وتنسى تانى وتكرر 

وتتحرر

فابتقرر 

تسيب الذكرى للذكرى 

تسيب الفكره ع الفكره

تسيب صفحه عشان بكره

تلاقى صوت بياخد منك الحاله

فا بالحاله بتفتح عينك المقفوله 

ع الزحمه 

ف وسط رماد مدى بصرك 

اكيد فى السكه ناس تانيين

اكيد فى الكراسات صفحات

بتستناك 

اكيد لساك هاتصبر تانى ع المكتوب 

اكيد هاتدوب وهاتكمل

 جواك مطر 

قلبك حزين 

روحك بتتغطى 

بجسد من طين

عمرك سنين

وشريط حياتك 

سف 

فا بدال ماتنفخ 

م الزهق 

قضيتها تف 

كتفك تخاف تبعده 

عن حيطه ماتت فيها

احلامك 

حتى ف كلامك

نصه جد ونصه إسقاط

فا طبيعى تحت الباط 

تخبى شعرتين 

كل ما تيجى تنام 

تشد

وتلعن العين اللى 

غفلت وانت حى

كان نفسك المحدوده

تبقى حد تانى بيندهك

كل اما بتشيخ ف المرايه

فا تندفن جوه الملايه

وتنحنى قدام دموع 

الانكسار

قوم تفتكر قلمك 

تقول أنا لسه حى 

فا تدعكه يطرطش

سواد ع الأرض

تبكى

تنوح

تشخر بصوت

 مبحوح

وتسكت

تعتذر للدنيا

انك جيت 

ومت

#حقيقه طازه#

 تعرف تقول

اللى اكتبه

؟

مين اللى قالك

تقرا من بين 

السطور

تعرف تقول 

الشعر ف الحلوات

او تشتهى النظره

من الخدين

تعرف تقولى 

انا مين

غير الحيطان الاربعه

والبروازات

تعرف تشد البنوتات

من بكرها 

وتسوق سواد الفجر

تعرف تدوق الصبح....

....

انا كنت فاكر نفسى

اكتر حد شاف القبر

شال الصبر

اتارى كتفين الجسد

فازوا

يا فرحة الدود الذى

يحظى بجسد الشاطئات

وانا الذى لا انتوى

احظى بكفة ايدى 

وقت الشقا

عارف بقى ؟

اسرقنى يمكن بنوتاتك

تسمعه

وتحسنى باكتب بجد

بس ياريت قبل اما 

تكتب جد..

تعرف تبوس خد 

الرضاعه وتشكره

على لحظه فيها 

كبرت 

لما كتبتنى

#مبيت جاردن سيتى#

القاهره

 نقط القزاز 

ف الليل 

كما النجمات

يسبق سكاتنا 

بخطوتين 

دق الساعات

مر القديم بينا 

يا ريته كان طول 

نترجى فى الايام 

رجوع 

غداره م الاول

نقط الدموع 

باقيه ومابتخلصش

تنزل على الخدين 

تدفى الوش

ازعق بطول صوتى 

هاااااااااموت

تيجى النهايه 

اركع واكش

قرفصتنى يا حلم 

كان حلمى 

بس البراح

واسع لناس تانيين

وانا اخرى فى

 المطاحين

بودره امل 

تتهف

يامبعترانى ايدين 

على رجلين

لا شوفت لون كفى 

ولا كتفى رمى حمله

قاسيت 

مرا 

على

صبرا

على 

كلا

على كلين

وف كل كل الاقى 

زاد الدين

وف عنبر المساجين 

سجين 

والله ماعرفش الحقيقه

فين

مظلوم وظالم 

ظلمتين

وانا تهمتى

 مولود

مفطوم على 

صبرى

فقران عدم 

من حقى ماتالمش

من حقى بس 

اللى بلاش 

صلى وصوم 

واركع وقوم 

وارضى 

ياااااااااارب

اشمعنى انا 

ادعى واقول 

محتاج

انا نفسى احبك 

بس 

مش نجده

ولا اسعاف

 الصوره سودا 

والكلام ابيض

والصوت عريض

اطفى وميض الفرحه

وادهن شباكات البيت 

بالازرق

وف تالته ثانوى 

كان لسه لون القميص 

ابيض

كل الحيطان مدهونه 

بالابيض

كان لسه لون الفجر الابيض

خارج من بلاك الليل

سامع أزيز الطيارات

مدى الامان 

كل ما عينه بتيجى 

على عامودين 

ظافر وقاهر.

البدله كاكى 

بتتولد من صلب 

اب ومات

امى التى صعدت سبع 

سنوات 

بتطمن بصوت الردايو 

كل أدان

ولدى الذى انسان

طارح عيدان جسمه 

على الرمله

تعبت بنا الجمله

التى ممره فى الحلق

عمرك رأيت لون الدهب 

لاحمر

بيخرج من شقاق الارض ؟

كل البشر شافت 

(وبلدنا ع الترعه بتغسل

شعرها )

ومش واخده بالها 

(جاها نهار) ماقدرش 

يتدارى ف عيالها

شبوره م الدخان مغطيه

الحقيقه

ويترسم فيها خريطة 

الكل 

(فى ناس بتلعب كوره 

فى الشارع

وناس بتمشى تغنى تاخد صوره

فى الشارع

فى ناس بتشتم بعض

 تضرب بعض 

تقتل بعض فى الشارع)

لما العيال يتكلموا 

تلقى الغلابه بتستمع

تيجى الرفاقه وتجتمع

لجل السبيل المشهدى

يبقى الدليل

واخرها صوره بتبكى

ف الالبوم 

وتدوب

 اخاف السِنة كى لا ابتعد

عنك

رحماك بى فالكبد ذاد تحرقا

لو كان لى فى دنيتى غرضٌ

باعد ياربِ بيننا مددا

ضدان نحن بينهم نحن

ثبت فؤادى يُبتغى الوصلُ

كلى ذنوب يا كثرة الذنب

والخير منى منك فى الأصل

أقسمت بٍسْمِكَ لو عبدتك روحى

والله ما عبدتك روحى خيرا

الا ان شئت منى عبادتك

ربى وبك منكَ اليكَ الماضى 

والآتى

انت المجير وليس غيرك من 

مجير منى ينقذنى

 رغم اننا اصلا

عايشين تناص 

من بعض

الاختلاف سنه

والاتلاف تكوين

ولاننا جوه السنين

كاينين

فا منين بييجى اللقا

نجرى ونتسابق.

مع اننا عارفين

ان الفراق سابق.

فا ماندِّعيش ع القدر

أنه السبب.

وان الخلاص

 ف القضا.

وان الرضا سقفه 

بعيد