مشتق الاسم حروف كلمه
من دفتر تسجيلى اليومى
انسان ف شهادة المواليد
حىٌ ولحين اشعار آجل
كان مين ادانى الاذن اكون
وسط الزحمه كائن آخر
ابيض واسود أعلى تكوين
رقمى القومى.
تسال نفسك ازاى اللون
رغم ثباته .
متغير من نظره لنظره.
وازاى بالفطره بيتحدد
حجم التقدير.
اتخيل أن السما ساكته
والأرض بتشتى ف بنى ادمين
مش ممكن كانت روحنا تنبت
ورد مابين طبقات الكون؟
كان ممكن تبقى الأرض
سكون؟
ومافيش مشكله ابدا
ان التربه مابين السموات
مليانه حسابات ..
اتخيل أن سيجارتك
وانت بتشرب قهوه
دخانهم وسط المزيكا
بيرقص ويلف
ان قلنا مجازا يعنى
ان القمصان اتعكت روج
وإذ فجاءه فى واحد منهم
بقى ميه من كتر الحضن
يبقى مجازا برضه الخلفه
اللى مابينهم تتكلف على حسب
التوليفه.
واخده سمار البن وشيبة شعر
النيكوتين.
استنساخ كوباية البن العذرا
من لفة بفرا اتلاقوا ف وقت
مايعرفهوش.
اوقات المخ بيتكلم
وف وسط سواد العين تقرا
المكتوب.
وساعتها الصمت يكون باهت
وقت سماع صوت العرض
لشريط سينما ف وسط
تراك فيديو بادى من اول
ادم ولحدة اخر ادم.
طب شوف كام ادم دون
دفتر تسجيله اليومى
وكام انسان كان حى لحين
اشعار آجل
وف وسط الكام آجل
عاجل
ارقام .
وحروف.