افلامك
حكاياتك ضاعت
من بين الصور
الملزوقه
صندوق الكرتون
اتفرفت
من كتر رطوبه
مشاويرك
والعمر الفاضل
بتخطه
بطباشيره
ف جدرانة
سجنك
خايف من ايه
هه
؟
حبيت كام يوم
هه
؟
اخرتها حبيبتك كبت
ع الايام الجرح
هههههههههه
..........
هو انت نسيت؟
طب ايه نساك؟
ان انت وحيد
راجع عمرين
فاتوا من عمرك
كانت مامتك
ملياك بحاجات
وحاجات وحاجات
حد ما منيتك
تمسك ايد
واحده شبهها
وتقول حبيت
شوفت الالعيب
عملت فيك ايه؟
بس ماتزعلش
حبيتها بجد؟
،(امال تخاريف)
طب هيا كمان؟
(ماتدمعنيش)
بس ماتبكيش
طب اتفرج ف مرايتك
شوفتها؟
كلمها
(وحشتينى..
الدنيا بعدك كل حاجه
بس باهته
الفيس مضلم
حتى الهدوم مش
طايقه جسمى تلمسه
بالبسها غصب
انا عاوز اقولك......)
(سس دانا اللى اقولك
وحشتنى
يا غيبه العمر اللى
جت مش وقتها
الله يسامحك
كنت فين
والوقتى جاى
دى سنين ف بعدك
فاتوا صبر
تقدر تقول العمر
مر)
(طب نبتدى.........)
ايه ؟
كلمتها؟
(زادت جراحى بحزنها)
لملم حكاياتك
من بين الصور الملزوقه
وجدد اوجاعك
واكتب على دنياك
واحد مقطوع
وابقى استنى
يمكن.........؟؟؟؟؟؟

تسالونى
هيه مين؟
هيه دين
والبعاد بيساوى
كفر
هى سفر
هى انجيل والسلام
تتولد عدرا وتحبل
تولد الخلفه يمام
هى موسى لما
بيناجى الاله
وف عصاه
تتولد مليون حياه
هى سبحه
هي برحه
تفهم الشقيان
ف لمحه
هى مصحف
لما تحلف
هى قران مهما تخلف
دمعتين ف الوش تذرف
بس
هما الدمعتين
ليلها يقلب ١٠٠
نهار
حتى لو ملقاش
دليل
هى توبه وخير جميل
هى امى هى امك
لما حضنونا فبطونهم
هى دينهم
دين ابونا
قبل حتى مايعرفونا
هى زى ماهى ولا جاعت
ف مره
حتي لو شقت طريقها
ب نص تمره
هيه سمرا
هى قمره
هى حره
حبها من اى دين
واما ترجع
هاتلاقيها هى دين

(اخبارك ايه؟)
مبسوط ومرضى
(كل اما اقول
اخبارك ايه
مبسوط ومرضى)
طيب خلاص
من غير زعل
الحلم مات
والروح بتتنفس
رماد
حلوين كده؟
(سامعك سكات)
بتموتى ليه؟
هو انتى عاوزه
توحشينى
اكتر من العمر
اللى فات
(انا مش بموت)
بتقاوحى ليه
متعذبه
دى الصدفه مش
مترتبه
ملعون بدين الكركبه
اللى احنا فيه
دا الرب ماخلقناش
سدى
ولا انتى مش متاكده
ان احنا روح متمعجنه
جوه العذاب
طب يرضى مين ان
التراب
يحتاج مطر
وان السما تبخل عليه
طب ساكته ليه؟
مش هاتعبك
اخبار سجايرك ايه
وحشتنى

ايام بتجلى
وتنسانى
والعمر بيجرى
ومستعجل
مخلوق مستهبل
ع الاخر
فرحان بالصوره
المنسيه
والضحكه مرار
يمكن خايف
من سرقة بكره
لمحفظتى
تحويشة العمر
بتتسرسب
وبواقى التنهيده
تعافر
دخان مش باين
ف مرايتى
وباعين للجاى
ومش دارى
بحلاوة روحى
المدبوحه
بتطلع للجاى
شقايا
والجاى بياخده
وبيلفه
ف سيجارة شوق
للاستبقى
مسكينه يا ضحكة
تفوق واخرى
على مادة جسمى
على سريرى
تتبخر روحى
زفير باهت
والطين يتلاقى
مع اصحابه
واحشانى الارض
اللى انا منها
والموت بيمص
التكشيره
بيغسل جسمى
المتعرى
ويتف الضلمه
بتقشيره
سلاماتى لحزمة
اوجاعى
مات اللى بيقلق
ف مناكم

الروح مش تايهه
ف سكتها
والعمر الماشى
بيتعجب
وانا بين لاتنين
واحد ميت
مرمى ف طريقهم
بالصدفه
صندوق وحشاه
الرب
كنوز

انا اصلى الطالل
على بكره
مخلوق متمعجن
ف الايام
قلبى المطمن ومامن
ان النهايات 
مش بالساهل
وحلاوة روحى اما تعافر
تجرحنى زياده ف زياده
كائن متعود ع الحيره
والحزن انا باخده
 على صباعى
(مش بني ادمين
ولا حتى ملايكه
لاكن مخاليق)
عطشان الصبر
حضن ايوب
شقلوب واتشقلب
على بوزه
محبوب من
بين ضلعينه
حياه
او ممكن اه
مكتومه ف بقه
وخوف
مش قادر يفتح
 ننى الجوف
وسواقى الترعه
 المهجوره
يسكنها الشيخ
 المتعذب
على جسم صليب
وهلاله بيضحك
ف الجنه وهو الخسران
ماتمرتش فيك
لما فردت الدرعين النور
او بتمثل
على خدك واقف بتذلل
تستخسر فيا دموع عينك
يلعن ابو خاش اللى طاعونى
وانا اصلا مش موجود بينهم
حاسين بالموت
وانا باعمل اكلى على الكنكه
وما صدقتوش
ان انا شفاف
الهوا يشغل عنى الحيز
اتجوز الوان الطيف
تفتكروا هاموت؟
علقوا صورى على كل
حيطانكوا
واكتبوا كان ايه؟
كان واحدكل مايلقى
الميت
يجرى على الميه
ويسقيه
عريانه قلوبكوا المخليه
من دم الناس
ركبوا مواتير
وانا هاغزل توبى على
الشمعه
واستنى
الصبح

مشتاقة الغربه
ومدفونه
ف طريق الصبر
معبيه
وانا جسمى اتمرمط
ع الدكه
قدد
مستنى التقشيره
اه ع الايام لما بترجع
والاقى الشمس
على سريرى
بتقولى انا جيت
مكسوف من ايه
يخرب بيتك
دانا لسه صغير
فتاخدنى ف احضانها
الدافيه
وتغرب لون خدى
 ف ايدها
لسه صغير
وانا حبيتك
تتلف مشاعرى
 وتهبدنى
و ف طرفة عين
 افتح مالاقيش.....
..
الدكه طاعونه
وانا استنيت
والصبر بطيييئ.........
اشرب ف سجارة
احزانى
وانفخ توابيت
مليانه الام
دخان الذكرى
بيتلاشى
وانا كماشه
باطبق ف الروح
وتزوغ منى
وطريق الموت
صعب وديق
والروح بتعافر
ف السكه
اه يا سنين العمر
الشابكه
الايام ف مافيش
كان  نفسى
اكون الوردايه
الارض الخايبه
ماساعدتنيش
طرحت تين شوكى
على الناصيه
لسه الرسمه بذى
ماهيا
قلبين بيبيهات
واختاروا الحيط
شوفت الملاعين
عرفوا يحبوا
وانا وانتى لحد
الوقت بنحلم
 ماعرفناش
ياااااااااه ع الايام لما
بتضحك
فجأه
ماتبقاش

بنصدق ضحكتنا
ف كدبه
وغلابه بنسكت
ونكمل
وروليت الوهم
يخسرنا
ايام ف زماننا
المتنيل
تتسرسب من ايدنا
سنينا
كا العيل بيسلم
عيل
والعمر بيتعشم
دايما
ف حياتنا المبتوره
ايدينها
نلاقيه بيعيط
ويريل
يتندم على انه
امنها.
مسكينه دموعى
بتستنى ف الفرحه
تغيب ولا بترنش
وتبعتر دقايقها
الفكه
ف الحيره الساكه
وماتردش
تطلب من عينها
ترجعها
ترفض وتزود
اوجاعها
تنشف حزنا
من تاتش الشمس
على الدكه.
وانا اصلى خدتنى
الدوامه
وانا لسه سوالفى
ماطولتشى
عملتها الدنيا
واخرتها
خليتنى اسقف
على وشى
راح فين الزمن
المتعافى
على رست دراعى
ومش قادر
إخيي ع الحلم
اما بيقدم
ويزيد ف مرار
التنهيده
والاقى كلامى
المتنتور
من بين ايدى
بيبقى قصيده
واهى دنيا
وألشت على
عمرى
ورميتنى مابين
ياما وزحمه
حبيت اتلم
على بقيتى
الصبح اتشقلب
بقى عتمه
من عتمه لعتمه
لدوامه
سمانه وداخت
ف طريقها
من تحت الارض
العطشانه
من فوق السما
ذلت ريقها
وتعبت خلاص
انا م التوهه
متحاشه
ف حلقى سنين
اهه
ومتاهه بتوسع
لمتاهه
والحمل تقيل
انا مش قده
استنى جواب
مالقاش رده
غير رفض الدنيا
لمشاويري
وكتر خيرى
شيرت الحب على
العالم
وعشقت الحزن
ف مواجعهم
استنى الدنيا
تغنيلى
تطلب من عينى
مدامعهم
اكتر من كده هاظلم
نفسى
وانا نفسي اتدفنت
ف حيطانها
باشكر ايامى اللى باعتنى
للغربه ف ريحة
اوطانها
وهاموت بسلام

انا ليه متغرب
من صغرى
مع انى ماشوفتش
طول عمرى
غير حوالينى
واحاول اشب
عشان اهرب
تطلع عينى وارجع تانى
لمطرح ما طلعت
انا عمرى ف يوم
ماطبعت على الشجره
الحرفين
واما اترجيتك تستنى
كنت بامنى
اكتب قلبى واشبكه
بين سدرك
يندهلك ساعة
ما باغيب
وتقولى عيب
انا مكسوفه
وانا بالزوفه
اخدك احضان
ابعد عنى
بس استنى
دا انا لسه محوشلك
عمرى
تقوليلى بلاش
بتاخدنى مابين
عينك حيره
اضحك لك
القى التكشيره
استنى اعيط
تتداعى
من غير داعى
تستنى مرارة اوجاعى
وتدوسي عليا
اموت حوادبت
وانا ليه اكتبلك
ف جروحى
واملالك كل الدنيا
عييط
اوك انا ماشى ومش راجع
لا فى مانع
الليل توابيت
استنى الصبح
اقول حاضر
صبحى استنيت
فتحت الشمس
على الاخر
زادت مطره
وغطتنى غيوم
وانا ايه فاليوم
غير صفحة جرنال مقريه
قريناها انا وانتى ف ليل
باهت
واراهنك لوكنتى عرفتى
هى بتتكلم عن ايه؟
تسليه لوقتك؟
متشكر
انك طلعتيلى مواهب
بلياتشو يارب
على الاخر
دمع كحل كل خدوده
حطيتى ايديكى على الذكري
فاتغير يومى من موده
الحد الطيب على فكره
مات من دلوقت
واهى حبة وقت
واكون انسان كاره نفسى
كان نفسى ف واحده
تبدللى
الوحده اتنين
لكن على مين؟
دى الدنيا عجوزه
ومنبوذه
والعوزه يتيمه ومبليه
وانا واقف ع الشط
وخايف
نقطة ميه
تشتت حلمى
حلمك ايه؟
هو انت بتضحك
على قلبك ولا
بتبكيه
يابنى اتاخر
يمكن اقعد جنبك
او يمكن تيجى مكانى
البنوته
اخر مره اقولك
بنوته
انا اصلى كبرت
على البلكونه اللى
قصادى
لاكن حلوه الذكرى
اللى باعيشها
سنين عيل
مانا متنيل
راقد ع الفرشه
وعايش جنب
حلاوة الروح
ومرايتى قصادى
بتتلكم
انا اصغر منك على فكره
عينى فعينها
شعرى لابيض يصرخ
ابوح
احيه ع الزمن اللى
اتسرسب
زى العمله من بين
رجلينى وانا بيبى
ماهو دا عيبى
ماعملش حسابى
لحد ماييجى اليوم
واطب
وافوق على كل مطب
اتشقلب شقلبة
الغربان
دانا حد غريب
اقسم بالله ان انا
دورت على الاصحاب
مالقيتش الحد اللى
ارتاحله
واعطش ايام
مالقيش غير قلبك
يفتحلى
تقوليلى احبك
مانا اصلا اسمى
على بطاقتك
ولا انتى شقاوتك
نسيتك
روحى ف بيتك
واحنا مسافرين
مع بعض ف نفس الحته
اللى ماشوفناش
فيها الا الجنه
وريحة الصبح المدهونه
على حيطان الكون
انا مش مجنون
انا حبيتك

ضمت عينيا
الالسنه
وفضلت لاضم
ايدي فى فروع
القمر
امشير عجيب
و ف وشه
كم الاسئله
(اخرس يالا)
كنيت .
عكيت تراب الارض
بهدومى
يا جتتى باستسمحك
قومى.
كتر العجز كسر كفوفى
خطوط
كالاخطبوط رجليه خلاص
اتحكمت
انا مت ليه؟
مش وقته والله..
الدور على اللى صاموا
ولا فطروش
يارب دانا لسه
ماحنيتش الاراضى
سجود
ونويت اصلى ركعتين
تنهيد
رجعت همى على التراب
وقرفت
شريط حياتى يمر
ادامى
استنى لحظه ..
انا فاكر اليوم ده
لما استلفت من
الحزينه
الكف
دمعى صرخ
لما مرجعتوش
(حافظ عليه يمكن
ماتلمحنيش)
ااااه ع الفراق
شرّخ ضلوع
شخابيط
قضبان حديد
بتكمل الرحله
حبيتنى بنت الحب
وسابتنى
تابت عن الذنب
الذى منى
انا مش شيطان
انا بس حبيت
انى اهادى نص
تفاحتى.
يابنت حوا
انا وريث ادم
خلفه مابين الروح
وبين الارض
كتبونى ف شهادة الميلاد
(صبار)
وكل خطوه ع الاراضى
نزيف
ياعمر طاير بالقوى
خليك بطئ
مش قادر انى الحقك
نفثى خلص
بطل بقى
دا الافترا
ماضى فتيئ
دا الرب قبل الابتلا
بيوجد علاج
ع الصاجه فارش جتتى
لحد ما جافت
والطير اكل منها راقات
مات منى متسمم
اتكلمى ولا بلاش
اصل الكلام ف الوقت دا
شماته
ماتت عيونكم عنى
مارحمتوش
شايف وشوشكم
فرحانين فيا
غموا عينيا ارجوكوا
واتداروا
وماتأذونيش بعفن
قلوب
فيكم

انا جسمى
كائن نصه تلج
لا
ربعه تلج
لا
كله تلج
تفرق ف ايه ؟
وانا اصلى مش
 محتج...........
العاده غلبت
طلبت .
الاستماته
ف كل شئ
مرتاح قوى
مانا طول حياتى
زى سن المسطره
عايش  ف زيق
كائن برئ
واضح لكم
لكنى جوه الجسم
اشبه بالميدان
ساعة ادان الضهر
وسط المدعكه
واما لقيت الفبركه
ف عيونكم المليانه
موت
حسيت بان الكون
تابوت
حبيت اعيش ف وسطكم
كائن كيوت
من بره بس
 ال جوه
صايع بالوراثه
اصل الطفاسه ف كل
شئ
من طبعنا
ماهو ربنا خلق الخلايق
بعد مااتخلقت خلايق قبلنا
واهو كلنا من كل شئ
بس احنا سيبنا كل شئ
ومضغنا طعم الابلسه
حد العصاره المفلسه
صبح الجسد
مخلوق عجيب
من بره انسان انما
من جوه
ديب
(ساعة شيطان)
والاربعه وعشرين
حصان
هادى ووديع
انسى وبيع
كلك خسيس
ابليس برئ
 وانت اللى ابليس
احتويته من زمان
مش بس حضن
ولا. بس مسكه من الايدين
دانت زرعت النطفه
لما استحلمك
وقت المزاج
وصبحتوا
عاج
بتثور ف وقت الاحتجاج
وتهدى نفسك وقت ماتبقى
ضعيف
معبود جبان
نهجك جبان
ملعون ب وش الالعوبان
ومصدقين
على اى دين
مابنختلفشى
انما
شكل البطاقه بيختلف
علشان تعيش
العرى ادام الحقيقه
بيبقى قمة لافترا
على جتتك
سيبها بقى
وسيبونا نعرف قد ايه
ف جناحتنا ريش
نقدر نطير ؟
ولا احنا مسخ
من المسوخ
ساعتين نفوق
وساعات ندوخ
مانسيبش بعض
الا اما نبقى
واد وبت
بيحلموا
ويفوقوا على زلزال
يفتت حلمهم
يالله على كل اللى باع
واللى اشترى
واللى اختشى
واللى انجلى
ملعون ابو الخفافيش
بريش المعيله
والهرى وسط
 المحرومين
كله ب دين
الاستلاف
يالله نخاف او نختشى
واما نلاقى العمر من ايدنا
مشى
نبقى نموت

ست البنات
يا ناس
حدوته باحكيها
لامّه البنات
يا ناس
من نظره فى عينيها
من حسنها غنى
طعم الحليب فى الريق
مسكين مالوهش طريق
ياقلبى غير شوقها
ست البنات
ف الغزل تضحك لها
الحكايات
دمعة عينيها عسل
ياما دوبت نايات
نداهه ياربى ندهت
على السموات
بات القمر مجذوب
اواه من الاهات
حدوته باحكيها
وما بانتهيش منها
شبّكت عمرى مداد
مشبوكه ف سنينها
اصلى على دينها
طعم الحلاوه براح
عنب الدموع عناقيد
شهد الخدود تفاح
والشمس كل صباح
عارفه عناوينها
ست البنات هيهات
خلفة نجوم السما
وحدى شريد الذات
عشق القلوب توأمه
جنبك ماشوفشى ظما
تروينى باديكى
ست البنات
يا ناس
حدوته باحكيها
لامّه البنات
يا ناس
من نظره فى عينيها

وش القمر
بيطل على صفحة
سما
ديل شعره فيه
متشعبطين
بنت وولد
بيحبوا بعض
والارض ضد الحلم
لكن هما فين ؟
غادروا السنين
المفروضين
على حلمهم
نظرة قمر
بتبص ليه
متعجبه ؟
ماهو اصلها
متتعودتش
على الملاك
لما ابتسم
واللى اترسم
فى المكتوبين
حبة بشر
عاشوا بشر
وماتوا طين
هو انتوا ليه
مستكترين
على الملايكه
يعشقوا
دا الحب دين
والعشق رب اللى عرف
سيدنا قلبى
عاش ما بين ايد
الشقا
وقاسى عمر
عشان يكمل دعوته
ليه تكفروا
دا الفرض مش مستنى
حد
والعد نازل من زمان
ليه تدهنوا ايدكم
عذاب ؟
دا الرب بيحب الخلايق
كلها
مع انها اصلا تراب

انا والزحمه
مخلوقين
بنكره بعض
وبنعاند عشان
مانشوفش
خلقتنا بتتقابل
جرى لنا ايه
اكيد موتنا
وصحينا
تانى خلق جديد
بنتعرف
كده برضه؟
اطمن نفسى
لاحسن اعيش
ب جن الفكر يقتلنى
كتير النظره ع المرايات
بتسالنى
مش انت بجد ؟
اقول ماعرفش
لاكنى باحس
انى جديد ف تركيبى
وطعم الحلق
مش هوه
يكونش جسمى
متغير؟
يا دين امى
على الحيره
اشوف امبارح اتكرر
ف كام لحظه
ف نفس اليوم
تقولش اتولدوا
فوق روس بعض
افوت على جسمى
واخبط
ويفتحلى
تزوغ عينه على جوه
اشوف روحى بتستر
نفسها منى
وتتخبى ورا الملايات.
يا بنت الكلب انا
لسه ماعجزتش
عشان تخونينى
مع جيفه
ارد الباب واصيع 
ف شوارع الناس
اللى ماعرفهومش
عينيا تطاطى
ابصلها
تقولى بكره
مش ملكك
اقول من امتى
كان ملكى
مانا طول عمرى
بقضيها ديون على
نوتة الاحلام
ومين فينا
عايشها بكام
وفين ومنين
يارب انت اللى
عارف كيف
خلقت الجته
عريانه
ماكانش ليا فيها
قيراط
وقبل ماييجى
شعر الباط
يحاسبنى
يقولى كبرت يابنى
وشيل
عصاية بؤجة
اللى جابوك
واشيل طايع
وتكمل رحلتى
مشاوير
بتتشاقى
على الدنيا
تاخدنى الزحمه
ف احضانها
ونحضن بعض
مغصوبين
والف يمين اكون
حاسس بغرز خيانه
من ضهرى
وتقتلنى
وتقتل غيرى
مش فارقه
اموت سرقه
مابين الناس
ولا يدروش

كل الحيطان
مستنيين
يدن ادان العصر
لجل السجود
يوجب
مين اللى بات
مذنب
ومين مجاوره النصر
وانا الوحيد من
مصر
وانتوا اللى من
دوكها
عطش الهوى فيا
فشربت من شوكها
دورت ع المجدع
وناديته يشبكها
من فرحته
الشهقه ماقدرش
يملكها
انا حلمى رشرشته
على الاراضى البور
وحلمت انه تقاوى
تطرح بنات الحور
اتارى حلمى خريف
خلى الشراقى تثور
عطشانه من غلبها
بتولع الفحمه
واحنا مافيش رحمه
غير اننا معناش
يا مصر طينك باش
وانا عرقى على قوتك
فكرت فيكى العيش
مالقيتش غير موتك
صوتك ومش صوتك
ماتلخبطيش فيا
بزياده مداديه
والهرى ع المكشوف
دمعة عينيا تطوف
وتشوف خدود غيرك
ترجع بكل كسوف وتنام
على خدك
يا بلدى مين قدك
مانتيش على قدك
غيرش الزمن هدك
وانتى بتتشاقى
وانا ذنبى ايه يامه
قلبى اللى يرعاكى
يلقى الشقاوه حصاد
والقوته مش باقيه
يرضيكى اشوفك
كده
بتلفى ف الساقيه
احرت اراضى الغير
تيجى حرتتك ميه
وتلف ع الفاضى
والله انا راضى
وباتمنى اشوفك وتد
مانتيش كمالة عدد
ولا ربطه ف الخيمه
دانتى اللى فى غيمه
باقيه تضمينا
جواكى يا سمره

اصرخ وكسر
كل شئ
بس ماتقلقش
الجيران
جارك جبان
اصله مولف على
الزعيق
وانت كمان مانتاش
برئ
حابس حياتك جوه
زيق
مش دا حرام
على روحك انت
بتفترى
عمرك جرى
اجرى وراه لو
تلحقه
هاديك كلام
وتصدقه
لو بينك انت
وبين مماتك
خطوتين
خد م اللى
جنبك حلم
تايه حققه
ماتخافش مش
هايعورك
ده
لو درى كان
يوم جرى
على حلمه
وماسابهوش
يتوه
هو احنا ايه
غير النفث
واحد بيدخل
يستلم
من اللى خارج
عهدته
ويسلم
اللى بعده
وانت بتتنفخ
وبتفضى فيك
يالله قوام
اصرخ وهات
دانت سكاتك
خد راقات
كل اللى حوالينك
سابوك
وانت وحيد ميتين
ابوك
ايه يعنى واحد
يتنسى او الف واحد
يكرهوك
مادريتش بالعبط
اللى فيك؟
وجاى تدور
ع الجيران
صرخ ومايهمكش
كل الكون جبان
كله بيستنى
الحمايه
اصرخ معايا
الكل خان
وسابوك لوحدك
ف الميدان
بصوابعك
الخمسه
ف ايديك
اتقطعت
كل الصوابع
الا واحد لاشريك
وخدته كله
لحد كفك
لجل ماتحس
انه ليك
رجع زمان يشهد
علينا انا قولتلك
تحت الخشب
داالسوس حويط
حطيت ايديك بين
الخشب
مين اللى قالك
تتعطب غير اللى
زقك
وانت صدقت انه
حقك
روح يا شيخ
شقلبت دين ام
التاريخ
وجاى تنام؟....
دم اللى ماتوا
ان كان حلال
ولاّ حرام
اهو بين ايديك
يالله الحسه
حس القرف
صرّخ وقول دا ماكانش
قصدى اللى حصل
قرقش بصل
يمكن تفوق
اصرخ وموت
موتة شرف

وحدى انا
والناس بتتزاحم
هنا
وانا من عيونى
الضيقه
باضحك شقا
والروح تنادى
ع اللقا
و اقولها ساعتين
وجاى
صوت الالام
ف ودانى
ناى
والمطوحه
ترسم خطاى
وانا اصلى عيل
من زمان
مفطوم على
صوت الادان
ورن اجراس
البيبان
وحدى انا
من بين عيونى
الضيقه
شوفتك خلاص
اطمن القلب
اللى داس
على كل جرح
جرحته
انا
لنفسى انا
من غير درا
وسط الشقاوه
المبهره
وف قلب تدليع
البنات
قلبى صحى
دقيقتين
ومات
على كل حال
اصل السكات
بيبات ساعات
على سفسطه
ويشد بايديه
الغطا
وينام حزين
يصبح ينادى
المحرومين
يعطيهم اللقمه
الحلال
وف قلب غنيوة
عيال
تلقى الجمال
جنب الدلال
معجون
بخفه صغيره
امتى بقى
نرجع ورا
الرد يبقى
مستحيل
عمرك خلاص
بيسابقه
فيل
وانت بتستنى
الخلاص
تفرك عيونك
م العماص
على شبه
يوم وبينحرف
وتشوف بعين
اللى عرف
واللى غرف
عدى وسابك
ف الهاويس
بتلاقى سبتك
ف الخميس
واهى كلها ايام
شقى
من بين عينيك
الضيقه
تعبر تفوت
هاتعيش
سنه اتنين كتير
الموت على
بابك اسير
بيفكه عمرك
بالنهايه
والحكايه
ماتنتهيش
هاتلاقى غيرك
عاش حياتك
بعد منك
قوله
عيش
اخرك كما اخرى
مافيش
لملم هدومك
ما الخلاص
قطّع لنفسه
التذكره
شفت بعينيك
ابن المره
ازاى بيخدع
وانت مستسلم
معاه ؟
يا صاحبى
فات زمن النصيحه
والكلام
ماتقوم بقى
ساعتين ننام
ونسيب عيوننا
الضيقه
تقفل بقى
تبطل كلام

هزيت فروع القمر
نزلت نجوم عناقيد
الروح ساعتها سرت
صلت صلاة العيد
وانا جسمى مستبقى
قوم يا ضعيف الجسد
دور على روحك
الجسم مستلقى
دامع على حالى
دمعات ف ايد دمعات
لؤلؤ عمى عينى
اتهزت السموات
وانا جسمى مستلقى
والروح ف ايد ربها
تصعد سبع سموات
متغسله بطهرها
وسط الفرح تايهه
من بين فروض اليوم
وبين فروض الورد
جسدى ف هواه معدوم
استنى ييجى الرد
ييجى الجواب
(عندك)
اثبت مكانك طيع
مش قادر انى اطيع
يارب ان مجذوب
ومفارق الدنيا
والرب رب قلوب
ثانيه ورا ثانيه
جسمى انا رافض
روحى ف طريقها
خلاص
جوه الصفح تسكن
ايه من الايات
افتح انا المصحف
وف سورة الاخلاص
تسقط دموع عينى
وضع السجود ع الارض
جسمى انا ف الضد
واقف مالوهش شريك
ادن سنه يا ديك
م الفجر للمغرب
القى الدموع كرابيج
والقلب يصلبنى
الروح بتجلدنى
والاه ماترحمنيش
وكل شئ فارق
اصبح يتيم فارق
دواخله خلاص
اصعب على روحى
روحى تبطل جلد
وتزملنى ف احضانها
(اسكت)
ماباسكتشى
عاوز اقوم امشى
(اسكت)
اموت م الخوف
الله ينادينى (اركع)
يصيبنى الخجل
اركع انا بالعجل
اسجد طواعيه
روحى تبات فيا
جسمى يصير ميه
يروى شقوق الار ض
الذكر يصبح فرض
والسنه ف الحضره
يا صاحب القدره
رجعت جسمى وليد
صليت صلاة العيد
هزيت فروع القمر
نزلت نجوم عناقيد