غير كتيرك

كتير غنوا ف ملامحك

كتير قالوا ف كلامك

ولما ايديكى شاورت
كتير ردوا سلامك
لاكنى غير كتيرك
انا خيط ناسج جبينك
انا ورد ينبت ابيض
لما الربيع يطولك
بمزاجى ومش مزاجى
صبصب نهرك مزاجى
منك يطرح نتاجى
ساقيه للعطشانين
وآهين يا تمر نخلى
لو تطلع بالنهار
ابعتهولك فطار
يغسل سدرك غناوى
قلبى الاخضر تقاوى
رشيه ع الارض يطرح
فدادين م الحب تسرح
تحضن قلب العيال
موال بينك وبينى
ياليل يا عين يا ليلى
العين ماشافتش غيرك
ليلك ضفر ف ليلى
حيلك دانا كلى ليكى
فيكى من بدأى عاشق
فارق حب الصبايا
مطحون بين الرحايا
معجون حلمى بحبك
باحلف بيكى وباحبك
يا سمره ياللى لونى
عشقك ضلل سكونى
خلالى الضحكه موجه
توكه من بين شعورك
خلينى ف حضن نورك
يمكن اوصل ل ليلك
يمكن اكونلك دليلك
يحضنلى الامنيات

اسمى عاشق

تسلم خدودك يوم ما رضيت تبقى لونك
يوم ما باتت فوق شفايفك راسمه كونك
وف عيونك
كانت الوقفه اللى بيننا
فيها حبك كان ساكنّى بالنهار
باختصار
اسمى عاشق
اسمك انتى سهم راشق
جوه تكوينى البدائى

مين اللى قالك

مين اللى قالك يابن ادم بيع نصيبك للهوى
داحنا اللى بايدينا السبب وربنا بايده الدوا


ورا عندك مافكرتش
ركبت الموجه وماخوفتش
حاولت تحقق الاحلام
لكن يا خساره ماحلمتش

عرفت طريق مالوش اخر
وقولت لصبرك اتتاخر
ولما شدك التيار لقيتك برضه ماوصلتش



عجبى عليك يا زمن خدت القسى غيه
داسوا البشر على بعضهم والموت مالوش ديه


قسيت بالعافيه على خوفك
سرقت اللقمه من جوفك
اخدت الشوك من الصبار
رضيت بالموت على ظروفك

وقولت الدنيا ضحكتلك
اتارى الدنيا بكيتلك
حاولت تبص قدامك
ماحدتش مدى شوفك