مافيش مرتاح
ولا مرتاح بياخد
حقه م الراحه
فى دنيا نشوفها
من بره
بتوسع مره ورا مره
وهى لافَّه من جوه
وضيقها زى ماهو
بتعصر فينا بالقوه
وتشربنا
وننزل منها محضونين
نبص لبعض
خلق جديده نستغرب
ندقق تانى ونقرب
نشوف جماجمنا من جوه
نموت م الخوف
تاخدنا الريح وتتشاقى
وتغرسنا ف جدر الشجره من جوه
لاول مره بنشوفنا
ف خلق جديد
بيتفرع
ونتفرق
ف جذع اصفر
بتتشاقى عليه الريح

قتيل الخوف
وتعذيبه
ف وقت ما تبقى
مش شايف
فى نور
والعتمه جواتك
بتبحث فيها عن ذاتك
تشوف ضلك
تخاف منه
وهو كمان يقلّق
من وجودك جنبوا
تترعشوا
تموت فيك الطمأنينه
وتهرب من فضا جسمك
لبره النور
ينسيك الشعاع اسمك
وتتغمى
وتتلخبط مابين جوه وبين بره
خيالك نفسه يتكرمش
ينط السور
وتبقى وحيد
ساعتها تخاف من الوحده

وحشانى ندهة اسمى
من بين شفتينك
خلت دموع عينى
تكون بينى وبينك

رسينى ع اللى
باقيلى منك
من حنينك
دا كل ليله باطمن
قلبى يلاقى عينك

ماصعبش يوم
عليك قلبى
لما بيتوجع
بص فى دفاترك
حبى ليك
مش مرتجع

ولا كان محطه
وقفت فيها
من سنينك
ـــــــــــــــــــــــــــــــــــــــــــ
محتاجه ليك دلوقتى
اكتر من زمان
فبلاش تحسسنى
انه بيننا حب كان

دا ماكنش
فى بينى وبينك
حد خان
داحنا علمنا الحياه
معنى الحنان

ماصعبش يوم
عليك قلبى
لما بيتوجع
بص فى دفاترك
حبى ليك
مش مرتجع

ولا كان محطه
وقفت فيها
من سنينك