جواك مطر
قلبك حزين
روحك بتتغطى
بجسد من طين
عمرك سنين
وشريط حياتك
سف
فا بدال ماتنفخ
م الزهق
قضيتها تف
كتفك تخاف تبعده
عن حيطه ماتت فيها
احلامك
حتى ف كلامك
نصه جد ونصه إسقاط
فا طبيعى تحت الباط
تخبى شعرتين
كل ما تيجى تنام
تشد
وتلعن العين اللى
غفلت وانت حى
كان نفسك المحدوده
تبقى حد تانى بيندهك
كل اما بتشيخ ف المرايه
فا تندفن جوه الملايه
وتنحنى قدام دموع
الانكسار
قوم تفتكر قلمك
تقول أنا لسه حى
فا تدعكه يطرطش
سواد ع الأرض
تبكى
تنوح
تشخر بصوت
مبحوح
وتسكت
تعتذر للدنيا
انك جيت
ومت
#حقيقه طازه#
تعرف تقول
اللى اكتبه
؟
مين اللى قالك
تقرا من بين
السطور
تعرف تقول
الشعر ف الحلوات
او تشتهى النظره
من الخدين
تعرف تقولى
انا مين
غير الحيطان الاربعه
والبروازات
تعرف تشد البنوتات
من بكرها
وتسوق سواد الفجر
تعرف تدوق الصبح....
....
انا كنت فاكر نفسى
اكتر حد شاف القبر
شال الصبر
اتارى كتفين الجسد
فازوا
يا فرحة الدود الذى
يحظى بجسد الشاطئات
وانا الذى لا انتوى
احظى بكفة ايدى
وقت الشقا
عارف بقى ؟
اسرقنى يمكن بنوتاتك
تسمعه
وتحسنى باكتب بجد
بس ياريت قبل اما
تكتب جد..
تعرف تبوس خد
الرضاعه وتشكره
على لحظه فيها
كبرت
لما كتبتنى
#مبيت جاردن سيتى#
القاهره
نقط القزاز
ف الليل
كما النجمات
يسبق سكاتنا
بخطوتين
دق الساعات
مر القديم بينا
يا ريته كان طول
نترجى فى الايام
رجوع
غداره م الاول
نقط الدموع
باقيه ومابتخلصش
تنزل على الخدين
تدفى الوش
ازعق بطول صوتى
هاااااااااموت
تيجى النهايه
اركع واكش
قرفصتنى يا حلم
كان حلمى
بس البراح
واسع لناس تانيين
وانا اخرى فى
المطاحين
بودره امل
تتهف
يامبعترانى ايدين
على رجلين
لا شوفت لون كفى
ولا كتفى رمى حمله
قاسيت
مرا
على
صبرا
على
كلا
على كلين
وف كل كل الاقى
زاد الدين
وف عنبر المساجين
سجين
والله ماعرفش الحقيقه
فين
مظلوم وظالم
ظلمتين
وانا تهمتى
مولود
مفطوم على
صبرى
فقران عدم
من حقى ماتالمش
من حقى بس
اللى بلاش
صلى وصوم
واركع وقوم
وارضى
ياااااااااارب
اشمعنى انا
ادعى واقول
محتاج
انا نفسى احبك
بس
مش نجده
ولا اسعاف
الصوره سودا
والكلام ابيض
والصوت عريض
اطفى وميض الفرحه
وادهن شباكات البيت
بالازرق
وف تالته ثانوى
كان لسه لون القميص
ابيض
كل الحيطان مدهونه
بالابيض
كان لسه لون الفجر الابيض
خارج من بلاك الليل
سامع أزيز الطيارات
مدى الامان
كل ما عينه بتيجى
على عامودين
ظافر وقاهر.
البدله كاكى
بتتولد من صلب
اب ومات
امى التى صعدت سبع
سنوات
بتطمن بصوت الردايو
كل أدان
ولدى الذى انسان
طارح عيدان جسمه
على الرمله
تعبت بنا الجمله
التى ممره فى الحلق
عمرك رأيت لون الدهب
لاحمر
بيخرج من شقاق الارض ؟
كل البشر شافت
(وبلدنا ع الترعه بتغسل
شعرها )
ومش واخده بالها
(جاها نهار) ماقدرش
يتدارى ف عيالها
شبوره م الدخان مغطيه
الحقيقه
ويترسم فيها خريطة
الكل
(فى ناس بتلعب كوره
فى الشارع
وناس بتمشى تغنى تاخد صوره
فى الشارع
فى ناس بتشتم بعض
تضرب بعض
تقتل بعض فى الشارع)
لما العيال يتكلموا
تلقى الغلابه بتستمع
تيجى الرفاقه وتجتمع
لجل السبيل المشهدى
يبقى الدليل
واخرها صوره بتبكى
ف الالبوم
وتدوب
اخاف السِنة كى لا ابتعد
عنك
رحماك بى فالكبد ذاد تحرقا
لو كان لى فى دنيتى غرضٌ
باعد ياربِ بيننا مددا
ضدان نحن بينهم نحن
ثبت فؤادى يُبتغى الوصلُ
كلى ذنوب يا كثرة الذنب
والخير منى منك فى الأصل
أقسمت بٍسْمِكَ لو عبدتك روحى
والله ما عبدتك روحى خيرا
الا ان شئت منى عبادتك
ربى وبك منكَ اليكَ الماضى
والآتى
انت المجير وليس غيرك من
مجير منى ينقذنى
دلع حيطان جنتك
وارقص على بكره
اصل اللى جاى
ع القد
والبيع على
المكشوف
يحكى ف زمان
العبر
نص النهار ملهوف
على نص ضهريه
ينهى بكمالة عصر.
ضل البنيه قصر
يروى غريب
معدوم.
خرق الهدوم سنه
حافى على الاعتاب
فرض الغلابه الفقر
قافل على الابواب..
زمن اللى فيه عارف
مات ف اللى معرفشى
طنش وماتخافشى
ملعون ابو التوهه.
صبح الصباح قالع
الفجر كش جبان
والدنيا نداغه
قالعه ف كل
لسان.
فاكر زمان ان كان
فيه القصب واقف
لما السحابه تنام
يغدر ومايهابش
تحبل ف واد زى
المطر ينزل
على الارضيه
مايرويش
الليل كما درويش
مجذوب من الحسره
قاعد يقيم الليل
على سجادات الهلس
بركات يا وش النحس
زايد على فكه
اصل العتم سكه
والمغريات ياما
أمه اعملى معروف
مايغركيش مزروف
نأبه على شونه
اكسى الصبايا
سكات
شغل التعالب فات
لغمط فخاد الضى
وبايه يفيد ترقيع.
كل الملوك مقاطيع
لاكن عليهم دور
شاى مغلى كام
مره
علقم كما السكره
ف الموت واه ع الشوك
ف الحلق والمعكوك
اخد البراءه شخر .
شق العذاب ف الصخر
اصل اللى كان شادد
بكره اللى جاى
مرخى
لا يفيد ولا يحبل
زيه كما القله
تكمال عدد يقفل.
دقن الاغا موضه
تكسى على الفاضى
قاضى البلاج صيف
مابقاش هناك قاضى
روح بقى يالله
والله منا راضى
تناديك..
تستنى..
وقت ما تلمع عينك
تقلع بورنيطتك
وتلف دواير
قلبك مش موجود
جواك
حد نداك
من غير اى كلام
بتفكر
تكتر اكتر
داخلك يملاه البانوراما
الف افيش
وذياده
حبك للسينما الحراقه
لدمعة عينك تنزل نيجاتيف
جوه الننى الف نهايه بتاخدك
منى
تتمطع فارد دراعاتك
مستمتع
ركبك لسه بتعرف تقف
بس كتافك لسه بتحلم
عقلك ينتج بطله ف سنك.
تتمرد وتفوق .
تلاقيك
قدام كشك سجاير
تاخدك لسه علامة البيبسي
وتتفاجئ
أنه باصصلك
جنبه التليفون
والقرص بيحضن اخر صابع
من بنت مالحقتش الدرس
فا تحس ان الرعشه بتاخد
قلبك
فا تطلع ربع جنيه مخروم
تشترى كلورتس
وتمشى
لميت عيال الوجع
وسهرت ف الضلمه
قَرفَصت فيك كل
الحقايق
جرحتك ؟
معلش
دمعت؟
بليت الف وش ركنتهم
جواك
(بلياتشو قال ايه بس
فايدة فنونى)
كحلة حبيبتك من هناك
أدت خدودها ضهرها
وماتكلمتش
بينك وبينها كام كاوتش
وسلك شايك
وانا كنت واقف ع الحدود
جندى مجند عبسلام
ع الكل
باحشى سلاحى بُن
وافرقه فناجين غلابه
على الرفاقه
والِف دخان البارود.
الارض كانت يوم بتاعتى
ويوم بتاعته
بس هو كان مركز جوه
ساعته
و هب نط عليا دغ دغ لى
العضام وانا كنت بحلم
بالرجوع
ميل عليا الجوع
هربت وسيبتهاله
(سبعون عاما وانا ابحث
عن وطن وعن قضيه )
تعبت
لميت عيال الوجع
وهربت
عذرا نسيت جلدى
وحبة ذكريات
الكل مات
حتى الصور دابت
حتى العيدان خابت
حتى العضام خاخت
وماعادش فاضل منى
غير الزمزميه مشبره
دمعات
بصوا ف جيبى
هاتلاقونى فى البطاقه
باحضن العمله القديمه
ونمره معدن واعرفوا
انى كنت عايش
واتنسيت
بصوا لحيطان البيت
شباك قديم مرسوم
عليها
وجوه منه
انا
لامم ف حضنى الحقايق
ومقرفص
......
كان نفسى القى
يوم ف بعدك
حلو
كان نفسى ما اسهرش
الليالى
معرفش انه كان هايبقى
صعب
وان الفراق غالى
يا صاحبى ليه خونتك
وانا معرفش
انك مش مسامح
داحنا اتفقنا والايدين مع
بعض
ان الاسى بينا يكون رايح
وان اللى جاى يمحى
ومقدرك صاحبى
عدت سنه. اتنين. تلاته
شهور .
وايام جمايل ما انا
كل يوم فاكرك
وانا لو سنين هاجرك
لسانى بافتكرك ف بعدك
وانت مش فاكر
