وقصيده كانت
ف الأصل
بضفيرتين
كبرت.
ناديتها.
ماتكبريش وحدك
فَ سابتنى عيل
لسه بيحبى ويتهته
وجابتلى بنوته
بتلعب أولى فى الشارع
اما انا ..
اللعب عفر جزمتى ال باتا
من تاتا تاتا لقيتنى بالعب
الاولى..
.المغربيه هلت خبطت لابواب
مابقاش على جتتنا غير
الدرمغه باينه.
امى برغم الفرحه
خافت .
وانا.
خوفت على خوفها .
نسيت ف لحظه أنها
صَرّه الرغيف بالع ف
جوفه حتتين جبنه.
كان من نصيبى النص
والتانى .
لابنى اللى لسه
ف ضهرى ماتكونش.
اتاريكى يامه مسبقه
لغيرى
واعز ولدك يبقى وِلد
الوِلد.
كبرت فجأه فى المرايه
وبقيت اوطى لما اشوف
شعرى .
كام شعره بيضه وكام شعره
راحوا .
تجاعيد خفيفه ع الجبين
بعدد سنين عمرى.
وابنى اللى كنت باحوشه
والنقطه ع النقطه.
مش لاقى جنبى مكان
فَ بيتحشر فيا .
