سهران
وحال الطيبين
ناموا
اتنين تلاته صحاب
ورابعهم الوحده
الليل يلم النجوم
لمة سبت واحده
والسله جاحده
أما السحاب دراويش
كنا شباب مليان جناحنا
الريش
كنا عيال مسكوا ف ساعة
طيش
بلى وزلط
نكشف ف ساعة الدرا
احضان بيوت من قش
بتحبنى ؟
ساعة البراءه اتفاجئت
بحبك!
وماكنتش اعرف ان لل
البنات مثل حظ
الذكرايين فى المشاعر
وان الولاد م العبط بيصدقوا
اللحظه..
مكاره يامه كنتى بتحمينى
وتأكدى ع الميه تسخن
لجل ما تغسلّى الذنوب
وانا كنت لسه يادوب
من غير بلل ف الحجر.
اسكت؟
تندهنى ضحكتها
تعالى نكمل امبارح
فاشرب حسابى العسير
مدلوق على الاسفلت
اغمض .
الاقى نفس الصوره
بالطباشير
افتح.
تغمض عينيها
وتكمل.
يارب مريلتى القديمه
تموت بقى
والبس بدل مريلتى
بدله
وتفك هى جدلة الشعر
الكحيل.
اليوم بخيل
قفل بيبانه وانتهى
خربش علىّ بمنتهى
التنكيل.
الليل لمح عرى الهدوم
بالكوم
وانا قلبى كان عاوز
يزوم .
جربت اسهر
لقيت ف حال
الطيبين
النوم
واتنين تلاته صحاب
بكوا
وانا لسه حالى م البكى
مابكيش....
