لما تلقى الدنيا مطره
غمسى ايدك ف حضنى
واما تبقى جنب منى
انسى كل الناس
فى كفة ايدى
وقت البرد

ولا يهمك
دى زى الفل واللهى
وحسيها عشان خاطرى
كانك عايشه ف ملاهى
وعديها ولفيها
ودورى بينا نتلاقى ونتباعد
مابين واقف مابين قاعد
وانا عن نفسى مطمن
مدام فيكى القلوب صاحيه
تلف الناحيه فى الناحيه
وتبقى طريق يعدينا

كل يوم تتمنى ارجع
كنت فين لما الدموع
كانت بتنزل من عينيه
وعايزه ترجع
شوف عملت ف قلبى ايه ؟
ولا مش محتاج تبص
دانت واحد قلبه ميت
حد مش عارف يحس
كل ده وعاوزنى انسى
كل شئ
هو ممكن حد ينسى
عمر كان عمال يضيق
وانت فيه كنت السبب

صعبان عليك
اعيش بنص جراحى ليه؟
وعاوزنى ليه اعيش معاك
وكأن شئ لم يكن
طب قولى مين هيداوى جرحى
ومين هايدفع التمن
هاتقول انا؟
طب كنت فين من كام سنه
وانت بتقتل فيّ
مش قادر تحس

شوف عملت ف قلبى ايه؟
ولا مش محتاج تبص
دانت واحد قلبه ميت
حد مش عارف يحس
كل ده وعاوزنى انسى
كل شئ
هو ممكن حد ينسى
عمر كان عمال يضيق
وانت فيه كنت السبب

اللى اتلسع م البرد
ينفخ ف قلب الحجر
واللى شرب من البحر
يسأل على اللى صبر
لساه بيستنى وﻵ على قديمه
عايش على الذكرى
رابط ف ابزيمه
وﻵ نسى الذكرى
ودوب اﻻبزيم

بين الحياه والموت
اقل من لحظه
تفرق مابين الكلام
والسكوت.................................
فيه ناس ف قلب الحياه
بتكون ايدين عاجزه
وناس ف قلب الموت
بتواصل الرحلات......
ليه الحياه محبوسه
بين ضلعين؟
والروح بتنسج خيطها
على جوفنا
هو الزمان حضن
الكتاف لاتنين
ولا اتنسينا وضيعنا
من خوفنا
واحد وواحد والبشر ياما
والعضم مكسى بجلد من بره
وكله ماشى ف دايرة الخلافات
مع ان حبل الصره كان واحد
شكل الخروج م البطن كان واحد
طعم اللبن م السدر كان واحد
ورغم دا كله شكل الكلام اشلاء

يعنى ايه تتمنى
كل الكون
يحبك
وانت واقف زى مانت
مستحيل الضل ييجى
بدون دليل
مستحيل المستحيل
انه تقضى العمر
واقف بالساعات
وانت جنبك لون بيضحك
ع الهدوم
حس ايدك لما بتطبطب عليك
مش موافق؟
حس شكلك فى المرايه
مش موافق؟
حس نومتك ع المخده
تلقى كل الكون بيبنى
واحده واحده
شكل حلمك

مين كان بيحلم؟
مين فينا
ساكن جسمه
ع الاسفلت
وبيستحمى بالمطر
فى عز عز البرد؟
مين مره زعق فى السما
وقال كمان
انا نفسى مره اتغسل
وامسح حياتى من الزمان؟
مين اللى عايش فى الهموم ؟
ومغطياه بدل الهدوم
مين اللى كان
ف الحلم يمسك فى الرغيف
ويدعى من قلبه مايصحاش
قبل مايلقى الغموس
مين اللى كسبه النوم
ونام من غير عشا
مين الصبور؟
مين البيور؟
مين فينا راسم
جسمه فى القبور
ومغطياه الضلمه والاشلاء
مين فينا فاق
كل اللى فينا
معدى بينا من سكات
يزعق ينام
يلحق قوام
وبتسرى بينا الروح
بدايات الممات

مين فينا كان يتمنى
انه يكون بجد
ليه يا جميله عملتى
فينا كل ده
عيشتى معانا المخمضه
شاربه حياتنا مضمضه
خدتينا من ايدنا اليمين
ورجعنا تانى لليمين
طب كنتى قولى فينا مين
يرضى معاكى بكل ده

لو يوم ماحسيتش بالم
بتحسسينى بالندم
وان يوم فرحت بخطوتك
القى المقابله فى العدم
اسف دى كل المشكله
ثابتين فى علم القلقله
بس اللى مابيننا صله
خلانا صابرين كل ده

يشهد على كل شئ
انى بصمت بكل شئ
برغم مابينا اتفاق
مين اللى يقدر يفهمك
ابوس ايديكى فهمينا
لا نظلمك
ونفسرك زى مافاهمينك
كده

اندم
ولا كفايه ندامه
والف سلامه
ويالله بعيد

عاوز ترجع
لا مش هارجع
مش وقت انى
هازيد وهاعيد

كتر خيرك
دا من بدرى
خليت العمر
بقى بيجرى
منك للايام
يا بعيد
--------------
عايز ترجع تانى
هاتلاقى واحد تانى
بس ماتعرفهوش
هاتقول انا هاتحمل
طيب كان م الاول
ولا انتوا مابتجوش
غير بالبعد
وفرقة وعد
وجرح ونار بتزيد

خسرتنى عمرين فوق عمرى
كنت الغالى رخصت ف نظرى
رغم دا كله انا قولت دا قدرى
كنت ف جرحى تعيد

اندم
ولا كفايه ندامه
والف سلامه
ويالله بعيد

عاوز ترجع
لا مش هارجع
مش وقت انى
هازيد وهاعيد

كتر خيرك
دا من بدرى
خليت العمر
بقى بيجرى
منك للايام
يا بعيد

انى احلم يوم
واحلم تانى يوم
واحلم فى التالت
ينزل حلمى
طب كنت استنى ياحلمى
استرجل للتاسع
دى اللى بيروح فى حياتنا
عمره مش راجع
الطابع لازق ع الجوابات
ووراك وراااااااااااك
كنت تتمنى تاخد
شقلب واداااااااااااااااك
لو كنت فاكر ان الحلم استنااااااااك
تبقى وهمت روحك
واشربلك دوووووم


كنا زمان بنقول كلام
كتر الكلام
كبس علينا النوم
كملنا جوه الحلم
وحلمنا اول يوم
وتانى يوم
واليوم التالت
ماستحملش الحلم
شوفناه رضيع
قبل الجميع ماشاف
يا خساره بدال مايرضع حلمنا
شرب السم

انزل بالتتر يا صاحبى
دا كان اعلان
عن رابسو كان هاينضف
فى الهدوم
واللى فاكرينه صابون طلع
معجون
واهو خادنا وش ف وش
وسنفرنا
عيش الحقيقه كوميديا
بلاك
اللى ف ضهرك شيطان
فى وشك ملاك
كنت تتمنى تاخد
شقلب واداااااااااااااااك
وانت  وهمت روحك
قوم اشرب دووووووووووووم

عاشقك انا
لاكن
العشق بالمقلوب
ازاى اكون ساكن
قلبك واكون مغلوب
الحب فيكى بتمن
والفرح فيكى بتمن
وانا اللى اخر الزمن
حبيت وخاوى الجيوب
ولا كنتش اعرف ان
التوب هنا مرحرح
مهما ان لبست فيه
سادد هوا المطرح
والدنيا ايه غير نفس
واقدام وخطوة رجل
ندخل ونخرج خفا
غالب على مغلوب
الطيبه كانت بلد
والعز كان للولد
والغربه من قسمتى
جوا دفا المحبوب

كنت حاسس
من زمان
وانتى برضه
كنتى حاسه
ان واحد فينا
هايفرق مابيننا

ماوحشتكيش؟
بجد باسال
انتى ليه مش
ساكنه حلمى

رغم انى فى شدتى
كنتى دايما جنب منى
رغم انى
حبيت ماحسسكيش
بشده

وانتى مش ممكن تكونى
ناسيه ايدى لما حضنت
لحظه خدك

فاكره بوستى لما دفت
يوم ايديكى
واما حزنك غطى كل الكون
وقلبى كان شاريكى

كنت حاسس انى
بس اللى بحبك

بس احساسى ماكنش
محل حبك

كان قليل

بيوت ومفقوله
وناس فيها عايشه
ومن بدأ الطفوله
حواديت جوانا طايشه
اه م اللى حدفه الزمن
على حلم مش بتاعه
مش قادر ع التمن
لاويه الحيطان دراعه
ناس فيها مستنظره
واخده الحياه منظره
وناس رشرش وشوشها
غلب وحياه نتوره

اه م البيوت ديه
واخدانا تسليه
غيه ومش غيه
بين طوق وبين اسوره


احنا اللى ع السلم
طالعين مابنسلم
نازلين بنتسلم
واخدين وبنودى
ع الرف فى السندره


اشباه على اشباه
اشباح على عفاريت
ساكنه ف حيطان البيت
شبابيك ومتكسره

الهيش معشش فى العشا
والفجر
مستنى يوم ليلته تكون القدر
ولا النهار يسبح ف ملكوته
تيجى العصارى تكمله بالستر

بنقضى فيها وهى مقضيه
ناهيه مابيننا وهى منهيه
فاكرينها لما بتبقى ويانا
واما نسيبها تبقى منسيه

مكتوبلى اعيش الدنيا دى بوشين
مادمت بينك وبينى
مليون طريق
الصبر مكتوب ع الجبين
عناوين
ومنين اعدى فى الليالى الضيق



شايل غيطان الشوك على كتفى
جايب حياتى ليكى ف الزحمه
يمكن ف يوم البرد تتدفى
وتلملمينا ف حضنك الرحمه

امتى بقى هاقدر احبك ع الملاء
وادخل ف احضانك سبق
واقطع شريط العاشقين ليكى
مكتوبلى اعيش فى الدنيا شاريكى
لاكن سكوتى فيكى مانعنى
حبوكى ياما حبهم ليكى
فرقنا ع الجنبين
وشين
انا
ولا عمرى كنت لك وشين
لاكن حقيقة حبك المحتاجه
واقفالى

ومين فيكى ماكانش بتحضنه اللمه
ومين فيكى ماكانش بيقسم اللقمه
ومين فيكى  فى عز الشده ماغناش
وباس ايده على الجنبين وقال نعمه

حبيبتى يا كلمه العاشق
دانا من صغرى وانا ناشئ
على كفوفك
حضنت البحر علانى
وخلانى قدرت اجيب
مدى شوفك

ساعات بالمس حيطان بيتنا
وبالعب كوره فى الشارع
واشوفك وانتى مبتسمه
بتاخدى ايدى للجامع

واشوف صاحبى وحواديتو
مقدس هل من بيته
بيدعى الرب ويزيده
غنا وبركات

واه م القلب اقولها وانتى سامعانى
ماليش غيرك حبيب تانى
وقبل دموعى ماتجينى على خدى
الاقيكى بتتاخدى بكفك لما يلمسنى
اشوف الحنه حاضنانى

اه يا ايوبه ياصابره
عرفت طريقى من صبرك وانا صغير
وشوفت حلاوة الخضره على ايدك
قطفت الليل وشبكته عناقيدك
وطبطبت على جراحك وشيلت من عنا   ايدك
لقيتك فى حاضنانى
وشايله لى طفل وليد
يارب تكبروا وتزيد فى ضحكتها
والاقى الشمع على بيتها
صفوف وصفوف

اديتك الهنا
اديتنى جراح وحيره
وماشوفتش يوم هنا
والحزن ف كل سيره
ماسيبتليش مكان
وسديت البيبان
كرهت الحب منك
وحبيت القساوه
دوست على قلبى اكتر
بقيت انا والزمان

ادعى عليك بايه
وانت فيك كل العبر
يدوخك الزمان
وماتلاقيش مكان
يساعك وقت جرحك

_____________________________
حضنتك وقت جرحك
وكنت على قاسى
زودت الحزن اكتر
بقى اكبر من مقاسى

متشكرين يا دنيا
ع القسمه والنصيب
دا جرح الحب قاسى
لايمكن يوم يطيب

وخلاص من النهارده
وبكره وبعده مافيش حنان
كله قسيه ونار وحيره
مش انت اللى امرت

ادعى عليك بايه
وانت فيك كل العبر
يدوخك الزمان
وماتلاقيش مكان
يساعك وقت جرحك

كل اللى بيننا
مستحيل يرجع مابيننا
ولا حاجه بيننا
تقبل تكون
من تانى بيننا
سيبنى احس انك بعيد
يالله بقى
ابعد بعيد وبلاش تعيد
تانى اللقا
__________
بينى وبينك
كنت باكدب لما اقابلك
كنت مش محتاجه اقابلك
يوم ماحسيت ان قلبك
كان بيكدب قبل قلبى

عينى ف عينك
كنت مش محتاج تشوفنى
كنت احس انك ظالمنى
لما حسيت انى جنبك
بعت قلبى رميت فى حبى

مين اللى قال ان الحلال
نفضل لبعض
يبقى حرام ولا يرضى ابدا
اى حد
وحرام علينا يفضل الحب
مابيننا

كل اللى بيننا
مستحيل يرجع مابيننا
ولا حاجه بيننا
تقبل تكون
من تانى بيننا
سيبنى احس انك بعيد
يالله بقى
ابعد بعيد وبلاش تعيد
تانى اللقا

هاتفضل على مخبى
مشاعرك وخايف منها
وقلبى يجيب ويودى
حبيبته ولا بيتسلى؟


متلومش على قلبى ان سابك
وتقولى احس بيك؟
صدقنى واعمل ف حسابك
دانا صبرى كتير عليك
________________________
قولها بقى دى عدد حروفها قليله
حرفين وبس كتير عليك؟
قولها بقى دا القلب
من حيرته اشتكى
وانت فى ايه بتادرى فيه؟

حرام عليك استنى فيك
وانت كده
حسسنى حبك قولى ليه
ساكت كده
؟


متلومش على قلبى ان سابك
وتقولى احس بيك؟
صدقنى واعمل ف حسابك
دانا صبرى كتير عليك

بتضحك ف وشى
وانت ليك مية الف وش
واديك ف ايدى
وايدك التانيه ف ايديها
تلمس مشاعرى
ف بيت بنيته كله غش
وعين ف عينى
وعينك التانيه ف عينيها

ليه ترضى لينا
نشرب الكاس ويا بعض ؟
لو هى ترضى بكل كده
حلال عليك
ليه ترضى لىّ
دموعى تنزل كل خد
ماتسيبنى اعيش وروحلها
وتحب فيك

_______________________________________
مابقتش قادره
استحملك بالشكل ده
مابقتش قادره اوصفك
حتى فى خيالى
ازاى تحسسنى
انى ممكن ابقى لك
وازاى بتطلب منى
اكون فوق احتمالى

ليه ترضى لينا
نشرب الكاس ويا بعض ؟
لو هى ترضى بكل كده
حلال عليك
ليه ترضى لىّ
دموعى تنزل كل خد
ماتسيبنى اعيش وروحلها
وتحب فيك

الله عليكى
اما الربيع بيفوت
ويسيبنى وحدى اموت
بين شفتين
ويسيب على شعرك
حبيبتى ورود
لما الليالى تعود
بطعم الحنين
وانا ويا ايد واخدانى ايد تانيه
تخبطنى  فى الثانيه
مية الف كف وكف
تعبان من المشاوير
مرمى ف قرار البير
معجون حواديتك
بين غمضتين م العين
انا ايه اكون غيرك
شبهك ومش غيرك
اسمر بلون الطين
يا غربتى ف موكنتى
يا وحدتى وسط الزحام
والليل
جايلك على رمشى
قتيل
والريح يلملمنى م الارض
شيل
واتعبى ف  خدودك
اعطش واشرب من دموعك
سيل
واتوه ف ملكوتك
الله عليكى اما الرصيف يضحك
من خطوتك لما بتمشى عليه
الله عليكى اما الاسير يتفك
من نظره
على عودك
انا من زمان با ترمى
وارجع لباب شقتى
الاقيكى فاتحالى
تداوينى من حالى
وتقربى منى
وابقى ومن حالى
شايل على حيلى
دراعين محاوطنّى
يا نحلتى طنّى
واعطيها من عسلك
دانا لو هاشيب وانحنى
وانتى معادك وجب
هاشهد على غسلك
وتدور بنا الساقيه
ولا فيها م الميه
مقدار قدام ع الايد
نعطش مانشربشى
لحد يوم العيد

من قد ايه
وانت مارديتش السلام
من قد ايه
واحنا مافيش بيننا كلام
بس مش محتاجه اشوفك
ولا مشتاقه لحروفك
دانت جوه القلب قلبى
حاجه مش عاوزه لكلام
____________________________
يا حبيبى لما بتغيب عن عينيه
بانسى كل الدنيا ديا
وافضل افتكرك فى كل مكان لاقيتك
وافضل اطمن بكل حروف ناديتك
دانت جوه القلب قلبى
حاجه ماوصفهاش ف حبى
دا القليل منك يا قلبى
يبقى جوايا الكتير
سافر انت بس وارجع
مش هالاقى عينيه تدمع
اصل مافرقتش فى طيفك
اصل مش محتاجه اشوفك
دانت جوه القلب قلبى
حاجه مش عاوزه لكلام

يعنى ايه كلمة فراق
بيننا واحنا قلب واحد
بس لازم نفترق

قد ايه قاسيه الحياه
لما الاتنين يبقوا واحد
بس روحهم تتحرق

وانا وانت ايه
غير بعضنا
لكن يادوبك حلمنا
طلع النهار
اصبح مافييييييش..........
_______________________________________
كتب القلم كلمة خلاص
سابت ايدينا بعضها
مع اننا كنا يا ناس
كلمه بتشبك ردها

تاهت عينينا م الالم
ف وسط قلبين كانوا
واحد واتظلم
ونص روح هاتعيش
حياتها وحدها

يعنى ايه كلمة بلاش
نبقى الاتنين ويا بعض
يعنى حب وراح بلاش
يعنى عمر ماليه دموع

وانا وانت ايه
غير بعضنا
لكن يادوبك حلمنا
طلع النهار
اصبح مافييييييش..........

كنتى فين 
لما كنت عيون حبيبك
لما كانت ايده شابكه ايدى
وقت ماكنا نحلم
بالامان
كنتى فين؟
واحنا كنا بنبنى بيت
كل واحد منا كان بيقول ياريت
حلمنا يكمل حنان



كل دا كان من زمن
من سنينا دفعنا احلى سنين
كتير من عمرنا
بس مين راح يؤتمن
بعد مااخدتيه بعيد عن حلمنا

_____________________________
مش حرام لما احس
انه كتير على قلبى كلمة يا حبيبتى؟
مش حرام اما اكتم الدمعه وتخرج من عينيه
بعد غيبتى؟
كل دا ممكن يكون قسمه ونصيب
ييجى قلبك يوم يصيب القلب اللى
مليته طيبتى
كل دا لو من زمن كان هايفرق
الكتير من وقتنا
بس مين راح يؤتمن
بعد مااخدتيه بعيد عن حلمنا

بتحبنا احنا 
ولا انا وحدى
مع اننا روحنا 
تايهه بين مرايات


بتحبها الصوره ؟
وتحبنى احساس؟
ولا انا الصوره
وهى ليك احساس؟

انت بروح واحده
ولا قاسمها اتنين
بتحبنى وحدى
ولا احنا الأتنين؟
___________________
هى بقى الصدفه
حطت مابيننا الحد
اياك تقول صدفه
دا كل شئ له حد
انا هى ولا انا
هى ومتلونه
صوره وصاحبها اتنين
بس احنا الاتنين
انت اللى تالتهم
وانا قسمتى بينكم
بس المهم الحد


انت بروح واحده
ولا قاسمها اتنين
بتحبنى وحدى
ولا احنا الأتنين؟

عمرك حسيت 
بايدين على خدك 
وقت البرد بتحضن فيهم؟
اوصف احساسك ياله بسرعه 
مافيش اوقات
لو يوم حبيت
حبيت ازاى ؟
طب قولى ازاى
جت رعشة قلبك
دق ساعات؟

حبيتك .... حبيتنى
ومافيش بيننا مسافات
وعرفت انك حسيتنى
ومكانش مابيننا حتى اللقا
من بعد معاد
_____________________________
انا شايفه عينيك
اما بتتكلم
بتقول حواديت
مع دمعه بتحكى
معاها اهات
ليه توصف خوف؟
قلبك ملهوف !
لقلوب اشتاقت
تعرف ايه معنى الحنيه
جربت ف مره تكون اللمسه
اللى بتلمسها لكف ايديه؟
جرب ماتخافش
وانا ماوصفلكش
الحب بديله مافيش
غير الاحلام
اللى ماتملكش
تمسكها بايدك وتجرب معنى
الايام
حبيتك .... حبيتنى
ومافيش مننا شبوره خوف
وعرفت انك حسيتنى
وماعادش مابيننا
حتى اللقا من بعد كسوف

معرفش ليه ساعات 
باحس. 
الناس شمال.
حتى العيال الطيبين 
مابقوش عيال.
فين لما كنا صغيرين 
كان حلمنا 
نلعب بيوت
والبنوتات الاشقيا 
كان حلمها يخلص 
فى بوت 
وقت الشتا
ـــــــــــــــــــــــــــــــــــــــــ
الراديو كان وقت الفطار 
بيضمنا
والكراسات فى الشنطه وعليها
التيكت
مكتوب عليها اسمنا من غير 
قيود
دلوقتى لون المطره عاااااج
والاتوبيسات راحت 
وجه مكانها السكات
والبنوتات الاشقيا 
قصت ضفايرها 
وتاهت فى السنين
ماعادتش عينى مكمله 
لما لقيت ابنى الصغير
سنه اكبر منى 
تايه فى الجديد
ـــــــــــــــــــــــــــــ
ايه الجديد
غير الوانات ومزوقه 
حبه ورق 
والباقى قش.

وعلى الورق مرسوم بيوت
فاضيه وماليها البكش
كله رخيص
ميت فطيس
والهيصه اكلت كل شئ 
حتى البرئ
معمول له محضر اشغالات 
علشان وقف فى البلكونات 
كان نفسه يعرف ايه الجديد
ملقاش جديد
غير الفتات

خد م السنين وقتك
وادينى من وقتك دقيقه
دانت اما تبقى ف يوم بعيد
بابقى حاسس ان كل الدنيا
ديقه

ارجوك تحس انك بتصعب يوم عليه
وانت وحدك
ارجوك تحس انك ف وقت الشده
ممكن تلقى راحتك
بين ايديه
ــــــــــــــــــــــــــــــــــــــــــــــــــ
باسال كتير

هو لسه فيه يا ناس واحد كده؟
حساس قوى؟
عايز يعيش فى الدنيا و حده
عايز دموعه لما تنزل غصب عنه
يلقى ايده بس بتطبطب عليه

ارجوك بقى
حس ان فيه من كام سنه
واحد وحبك
حس ان فيه واحد
بتصعب يوم عليه
وانت لوحدك

كنت صغير وانت ف بالى
كنت باربى فيك
يا ما صبرت ايام وليالى
عيشت العمر ليك
واما كبرت رميت القلب
اللى وهبتهولك
دانت يادوبك ايدى ف ايدك
ماغسلتش ايديك
دا اللى ماربتوش
العين ولا الرموش
مالهوش حد تانى
لاتقولى الحنين
والايام السنين
ولا حتى الليالى

راجع نفسك قبل ماتمشى
احسن ييجى اليوم تترجى
فىّ تلاقى واحد غيرك
بيسلم عليك

اجرح واظلم واتعلم
سيب الايام تتكلم
وانا من ظلمك هاتالم
ولاهادعى عليك وهاسلم

وازاى انا هادعى عليك
وانا لسه علامى فيك
مابردش وناره ف قلبى

دا حرام بقى على ايامك
لما دموعى قدامك
تنزل وانا مهما هاخبى
وهاخبى ازاى عليك

دا اللى ماربتوش
العين ولا الرموش
مالهوش حد تانى
لاتقولى الحنين
والايام السنين
ولا حتى الليالى

راجع نفسك قبل ماتمشى
احسن ييجى اليوم تترجى
فىّ تلاقى واحد غيرك
بيسلم عليك

كنت صغير وانت ف بالى
كنت باربى فيك
يا ما صبرت ايام وليالى
عيشت العمر ليك
واما كبرت رميت القلب
اللى وهبتهولك
دانت يادوبك ايدى ف ايدك
ماغسلتش ايديك
دا اللى ماربتوش
العين ولا الرموش
مالهوش حد تانى
لاتقولى الحنين
والايام السنين
ولا حتى الليالى

راجع نفسك قبل ماتمشى
احسن ييجى اليوم تترجى
فىّ تلاقى واحد غيرك
بيسلم عليك

اجرح واظلم واتعلم
سيب الايام تتكلم
وانا من ظلمك هاتالم
ولاهادعى عليك وهاسلم

وازاى انا هادعى عليك
وانا لسه علامى فيك
مابردش وناره ف قلبى

دا حرام بقى على ايامك
لما دموعى قدامك
تنزل وانا مهما هاخبى
وهاخبى ازاى عليك

دا اللى ماربتوش
العين ولا الرموش
مالهوش حد تانى
لاتقولى الحنين
والايام السنين
ولا حتى الليالى

راجع نفسك قبل ماتمشى
احسن ييجى اليوم تترجى
فىّ تلاقى واحد غيرك
بيسلم عليك

جيت م الاخر
جبت تمامك
مانا طول عمرى باضيع قدامك
وانت بتضحك

عيش ايامك
وابعد عنى
ياما معاك راحت ايامى
غرقت ف كدبك


اتكلمت كتير عن قلبك
قولت يسعنى وانا صدقتك
اتاريك عايش من غير قلب
كنت معايا بتاخد وقتك

عيشت علىّ دور الاخلاص
شوفت ف عينك كل الناس
بس لقيتك واحد تانى
بدلت الاحساس لكهرهتك

ابعد عنك وابعد عنى
وكفايه اللى قاسيته بسببك
ــــــــــــــــــــــــــــــــــــــــــــــــــــــــــــ

انت حرام يتقال عليك كلمة بشر
مش شايف انه كتير علىّ اعشق حجر
ولاّ انت تفرح بالقلوب حواليك كده؟
متعلقه وانت مافيش حتى النظر

الله يسامحك كل ده بتخبيه فين؟
قسوه وجراح وعذاب تداريه السنين
ماكنتش اعرف ان فى انسان كده
لكن اعمل ايه ماهو كل شئ كتبه القدر

اتكلمت كتير عن قلبك
قولت يسعنى وانا صدقتك
اتاريك عايش من غير قلب
كنت معايا بتاخد وقتك

عيشت علىّ دور الاخلاص
شوفت ف عينك كل الناس
بس لقيتك واحد تانى
بدلت الاحساس لكهرهتك

ابعد عنك وابعد عنى
وكفايه اللى قاسيته بسببك

رمضان بينقط صوم
 ويقوم على كل البنى ادمين
ينشر حواديت الناس بالكوم
الساعه بتلحقها الساعه
والصيف بيصوم
فوانيس بتنور
رغم هلال رمضان
ماينشر نوره على القواديس
وانا وانتى يا مصر
بنتشاقى ف قلب الازمات
ونقول للغم التعلب وفات
وف ديله بيربط فى اللفات
جوه المتاريس
انا قايم علشان اتسحر
وابدا فى اليوم اللى بيفطر
بايات الذكر
ويتغدى بحبة تسابيح
وان عطشى ملانى انا هاشرب
صلاه فى ركوع وسجود
وافطر على تمره من المغرب
وانا باتشقلب من قلب ادان
الله الله يا موائد تسابيح الرحمن
القلب جعان
م السنه للسنه مستنى يعود
بين التباريح

راجع..............

راجع وفاكر انه ف يوم هاسمحه
لا .. ينسى ويعيش لوحده
ينسى وياخد اللى ياخده
خليه بذنبك ياقلبى
يقاسى العمر كله
خليه ماهو وقت جرحك
نساك وفرح بخله
حرام عليك حرام تسامح مرتين
ماهو اللى باع ف مره
ممكن يبيع سنين

________________________
العمر بيفوت
وانا نفسى اعيش بقى
كفايه عذاب ف فرقه
كفايه خصام ف لقا
ايه اللى نابنا من كده
غير البكا والدموع
هايقولى ارجع وسامح
ولا والله مافيش رجوع
خليه بذنبك ياقلبى
يقاسى العمر كله
خليه ماهو وقت جرحك
نساك وفرح بخله
حرام عليك حرام تسامح مرتين
ماهو اللى باع ف مره
ممكن يبيع سنين

قعدت لاخرة الليله
وقولت الشارع اتفضى
اتارى ماشوفتش المرواح
لحد العضم ما صدى
بلقمة عيش وهاتقضى
وخرقه جينز م الباله
هاعليها تكون خيمه
وحته نستو منطاله
ودوكو على الحطان سيما
انا قابل اسيب بيتى
لو ان شالله هاموت م الجوع
واكون ع الحيطه جرافيتى
مانا قبلى كتير موجوع
شهيد ولا وايه يعنى
ماياما ناس هنا اتدفنت
ولو طين الوطن ساعك
هاييجى اليوم وهايسعنى
رضيت والصبر على صبرى
وانا اللى صبرت طول عمرى
وقولت هاسيبه فى الكوابيس
لقيت الدود على قبرى
بتبكى ليه ياوردايه
يا تفاحة خدود تنيس
نسيتى ولا مانسيتيش
دانا ع الفرش مستنى
بابمبط خوفى فى الضلمه
يا صالحه يا صلوح غنى
وشدى ايدى م الزحمه
عشان اقف مكان دليسبس
دانا الانسان انا مش جبس
مكانى البحر
وماعشتش عشان الحبس
ف تهمه ماليش انا فيها
ومخلى سبيلى من بره
وفرح اتقام على موتى
وشق البطن والصره
وانا مظلوم
ماطول عمرى بكيت
مظلوم مع كسرى
ودوقت البورى م الروضه
وابو الحسن اللى ربانى
ماشوفتش فيكى يوم حسره
كبرت فى حضن تلاتينى
وجاتنى اوجينا تهادينى
شربنا الشاى ف ابو طريه
وانا الفرحه ماساعتنيش
وليه يا زمانى تستكتر
على الفرحه وتقدرنى
م الاموات
دانا فى الاصل ابن ذوات
وشاهد على اللى كان حاصل
ف قلب عرابى فى العدوان
وجامع صبح بيأذن ومارى جرجس
بتتزين عشان قداس ايفون وموريس
وقلب حميدى عايش ضمة فى الغورى
وانا المنصورى باتفرج على الاعتاب
وقلبى عريس
صحيت م الحلم ع الكوابيس
ياريتها طالت النومه
وياخساره فى دى القومه
صحيت على وش دى البومه
بتزعق موتوا يا ولادى
ونستنى ونرجع تانى نستنى
نعيشها سواد نموتها عناد
لحد الفرحه ماتجيلنا
على الاعتاب

صاحبى اللى مات
كان ماشى فى الحال والسكات
عمره ماكان له اى نوع م الاتجاه
غير انه عايز يوم يعيش
الظاهر ان اليوم كتير
محسوب عليه بعدد الساعات

هو التراب اللى نده صاحبى الحنين
كان هناك
ولا هنا
ولا على الحيطه رسوم

ياريت سكاتك كان يدوم
بس السكات ازاى يدوم
من غير هدوم
من غير رغيف
من وعد مرمى ع الرصيف
بيبيع رصاص

الموت صبح كوبايه دايره
فى البارات
واللعب ع المكشوف بقى
اصل الرهان
بس الخساره دايره ع الطرفين
والكسب تاه بين الدما وبين البدل

الاب شب
الام حلم بيتجدل بين الضفاير
والتي شيرت
والابن مهما تكبروا الايام
وليد
ايه ذنب ريشه يتحبس جوه القفص
ايه ذنب جلده يترفص
ايه ذنب حلمه يتفعص
والجانى مين