صعبت علىّ 
الروح 
متعذبه ف جسمى
جربت اشنق نفسى 
100 مره
وف كل مره .........
الاقى الضحكه
راسمالها الشفايف .
سخريه منى
ادق فى كفتين ايدى
200 مسمار
عشان ماجروءش انى
احاول احضنها
اشوفها نايمه على سدرى
بتترجانى
(ماتسبنيييييييش)
دانا بدونك بلا
مأوى

كان نفسي اشرب بق
من ايدها
الارض نشفت

عيطت من بكره اللي
لسه ماجاش
من غير دموع
لقيت خدودي بكت
فكرت بتعيط
علي كيفها
اتاريها من بكره
شايله الهموم بدري

يا ضحكة المصلوب
علي الشجره
لا بتشفي ولا بتنادي
علي بكره
اخرك شفايف 
ياااااما قالت اه
جناحاتك المبتوره
ياولداه
زادت دماه كتره ورا كتره

ان الاوان ابكي
ودموعي تغسلني

من قلب زنزانتي
راسمك علي القضبان
واناديكي يا مدينتي
وباعاند السجان
اصرخ ف وش الحجر
ويرد صدي صوتي
يقفل تابوت بكره
يديني م المتعان
يابسمة المظاليم
قومي اغسلي وشي
رشي الامل رشي
ابني بقي عشي
وكسري القضبان

كل الاهات مرميه 
على حجرك
قومي اعملي الفرحه
وفطري فجرك

كان المطر اقوى 
من الحواديت
والعتمه مجدوله
ف حيطان البيت
انا قولت المس 
المطر يمكن
اسمع كلامه ارتوي
لقيت سكوته صوت

كان نفسي اشرب بق
من ايدها
الارض نشفت

ولما جيت
انفخ بالون العيد
طلعت منى الحزن
ملى البالون وشى
مسح الدموع منه
وربطتها فرحان
لقيتها بتدمع

ريق العطش حادق.
حضن السحاب.
عافر جدار القمر
لحد ما اتشقق.
حست ساعتها الروح
هاتكون بلا مأوى
اتمسكت بالجسد
كان القدر اقوى

لما تلقي ف كل ناحيه
خرقه بيضه ب١٠٠ مقاس
والتراب م النبش صرخ
ارحموني كفيت
واما تبقي ف كل بيت
دمعه علي خد الحيطان
اعرف انك حزن داير ف
البلاد.
لما تلقي الواد بيشهق
ع الحدود
واما تلقي العيله بتنزف
بارود
اعرف ان الموت مافرقش
البلاد
وان رمضان السنادي
صام عن الفوانيس
وان كحك العيد بيتوزع
قرص ع الشحاتين

مد ايده ف جيبه
فكر
السنادي
ممكن يديها ايه
١٠٠ جنيه
ولا اكتر
ولا لعبة نونو
ولا حاجه حلوه
لاجل تفرح
مش كتير علي حضن بابا.
علي بوسه بلت خد منه
جريه تجري وتسبق الرجلين
جوه فترينة القزاز
شافها تترجاه يسيبها
( اصل ربنا السنادي جابلي
لعب كتير قوي)

العتمه خيط للعنكبوت
غازل على وشوشنا
والصبح شاب م لانتظار
لفتحة رموشنا
وغريب يا حق بتملكك توهه
مندوه بدون نداهه ولا ابوها
وعشان نجيب لاختشا
للى غواه الزمن
نصبغ شعور الزمن
يانغيته يا يحوشنا

العتمه خيط للعنكبوت
غازل على وشوشنا
والصبح شاب م لانتظار
لفتحة رموشنا
وغريب يا حق بتملكك توهه
مندوه بدون نداهه ولا ابوها
وعشان نجيب لاختشا
للى غواه الزمن
نصبغ شعور الزمن
يانغيته يا يحوشنا

لبست الكاكى
موهته بلون الدم
عشان عارف بان الأم
باكيالى
ماخدتش بالى
من بكره اللى ف التوابيت
بيحضنى.

دا ابويا لما كبرنى
سقانى النيه اكون سنده
تقوم الدنيا دى تعانده
ويخلص عمرى ف الصحرا.

ماتبكوش ياللى ماسمعتوش
خيانة الغدر بودانكم
ماتبكوش ياللى ماشوفتوش
رصاصه ماشيه ف مخالف
ف ايد واحد ومش شايف
عدوه فين.

حاولت انام على جنب
ارتاحله
ملقتش جنب ف ركنة الحيطه
مسكين ياميت
نومته متر ف متر
والرحله بتزاحمه
تقاسمه
حتى ف الموته

الصبر عشش
ف الصبايا البكر
الصبر ذاته ماقدر يصبر
صعبت عليه البنوتات
دمع
لاكنه مابايده انه كان
يرجع
حاول يطبطب .
كان ناسى ان ايده شوك
سالت دماهم
دا اللى كان اوجع

كان الوجع اقوى الحواديت
من قلب توته بتتولد توته
والام بتيجى وتنتهى بموته
والقبر ياما يلم ف التوابيت
ولا تنتهى ف الدنيا حدوته

وربطت عينى
عشان ماتلمحنيش
وانا باسرق الضحكه
من الخدين
لكن ايديه ف لحظه خانتنى
ماهى اصلها متعوده ع الطهر
صرخت طول الدهر غيتتونى
اتبسمت كل المواجع شهر
فعرفت ان اللى مابيننا عمر
مايفرقوش الا تراب قبرى

البنت سابت قلبها
وكتبت فراق
سافرت ف قلب الحزن
دفنت جسمها
نسيت عينيها فوق تراب
الدفن تستنى
يمكن يكون القلب
راجع ف القرار
نشفت عينيها
وقلبها ماعرفش يرجع

خدت كام صوره ف حياتك
عد علي ايدك كتير
تفتكر كام صوره منهم
وانت حاضن يوم ضميرك
ولا كام صوره ابتسامتك
حاضنه تقاسيم الرضا
عمر اشبه بالكبير
لاكن الكتره بتمضي
لما بتغطيك نهايات الطريق
مهما تزعق او تعافر
مش هاتلقي خيط
تخيط بيه جيوب
كفنك
والاجابه عن سؤالك
تبقي جوه الحشو
هيكل
الوحيد اللي لايمكن
يبقي صوره ف البوماتك

انا قلبي كان مسجون
مابين اربع ضلوع
ورفض زيارتي
لما فكرت اني ازوره
صعبت علي نفسي
لما.
شوفته بيحضن السجان
دمعت علي حضني اللي
باعه ف لحظه
قلبي

صعبت عليه عيني
من كتر ماشافت
مش ذنبها تبقي ف يوم
مني
مارضيتش ادمع منها
عشان مازودهاش
وكتبت علي قلبي
(عيون)
علشان يدمع

لحظة سكوت.....
الضلمه زحمه.......
مافيش مكان
للنور يشاور من بعيد.....
انا فيّه متقرفص.
الخوف معبط فيّه بالدراعين.
رفعت راسى للحظه
كان العرق سايل بيلمع
ع الجبين
النور يزاحم ويشاورلى
اشوفه.
عكس العرق الضوء
ف وشه اتعمى
قرفص قصادى وطاطى
فى الضلمه جه جنبى.