من مفردات .
حبتك
من مجريات.
عشقتك
من ذكريات.
حستك.
حواديت ف وسط
كلام.
مش كنت بتهزر ؟
كان ايه قلبها
جد؟
داير تدور فى الشوارع
على دبلتين
اسفلت.
وخلخالين من طين
لجل أن ينوب شفتك
من حبيات التين.
تغنج تفتّح خطوتك
عن بلحيات امهات
ينزل عسلها ف الدرا
تشبع هدومك ترتوى
وتنام.
البن جاهز تحت بيت
البيت
دموع فراق بعد اللقا
كالزيت على جلد الخدود
..هاتسيبنى وتفارق؟
رصيدى م المشى انتهى
اول ماحوش خطوتين
هامشى.
الكرسى فاضى
فردٌ
لا شريك له.
والذكريات زحمه
مع النيكوتين.
فاكره أما كنا بنتولد
واحد
بنوته لسه عينيها
مابصيتش.
ولانى اصلا ف المنام
ضيف من قزاز
مبروك عليكى حد تانى
يهِم.
صدقت انى ماليش
مدد ولا عون .
وبكره هايأجر بيبانه
للى راح يدفع.
الباقى من الدكه
اللى تحتى
لوح
زى السفينه لنوح
راح ترسى
جوه القبر.
