بانده عليكى وانتى لسه
بكر
والمح عينيكى بشاير
يدوبونى سكر
استكتر الفرحه مادمت انا فيها
واطير وانا مجذوب .
بين الصفا والطهر

وقت العذاب
لما تلاقينا مشتاقين
للاغتراب
والارض بتحضّن علينا
بالايدين
ودموعها بتبل التراب
صعبان عليها الغربه
واحنا منّها.
فبيبقى قدامنا الحلول
علشان نرد
او ينشف الدم ف قلوبنا
ويبقى صلب
نمشى على الارض
اللى دمعت
تنجرح بين الخطاوى
ودمها يغسل كفوفها
وهى ماسكانا
ساعتها ....
نبتعد عن لاغتراب

شوفتك حبيبتى
ع الحيطان
جرافيتى
حبيت اقولك
ان حضن الحيط لصورتك
قصد .
انى اعيش محروم
م الدفا
وان دمعة عينى مش كافيه.
ترسمنى جنبك .
واحضنك

فكرت مره
ف ضلى ......
ازاى ماخدتوش
بين دراعينى
وحضنته.
فعرفت انه
حب دراعات الحيطان
_________________________
كان نفسى اكون
ساند على الشباك
وانتى بتستنى.
بكره اللى مابيجيش
لكن خساره الليل
اخدك ونام ..
_________________________
ولما جيت احطك
وشم على جلدى
لقيت رسمك ف قلبى
مرايه للصوره
خدتنى الحيره احب ف مين
مابين رسمك وبين وشمى
_________________________
ارجوك بلاش
تكسر مرايتى
علشان عيونى لو بكت
اشوف دموعى
نازله كامله
لحد اخر الوش
_________________________
   قولتله قبل اما نحلم
ليه ماحبيتش القمر
صمته كان ابلغ من الحواديت
عرفتني الدهشه من بين العينين
انه كان خايف
ابقى بالنسباله حب واقف صف تانى

ولما جيت احطك
وشم على جلدى
لقيت رسمك ف قلبى
مرايه للصوره
خدتنى الحيره احب ف مين
مابين رسمك وبين وشمى

يكتمل فيك كل شئ
لما تلقى الصمت
ف عيون الحبيبه.
هى توليفة مشاعر
جوه منها
سكّنتها
وانت مش قادر توفى
يكفى انك تبتسمها
فوق شفايفك.
تختلف بينكو المعانى
السنين بتروح ثوانى
وقت مابتقى فى ايديها
كرمشة قفل الايدين

ف المكان.......
لسانى شايف.
واحنا الاتنين جنب بعض
بصيت علىّ
شوفتنى وانا باعشقك.
طمنت خدى بابتسامه .
وانا حاسس ان
الذكرى لسه ع الكراسى
من وقفتى بره القزاز
كنا احنا لاتنين مبسوطين
كل اللى كان ف وسعى
انى اعمله
بروزتنا بقلبين .
وخدت ابتسامتى ومشيت

حتى الخيال اللى حاولت
المس ايديه
خدتيه معاكى
ف قفلة الشباك.
يا هل ترى نامت عيونك مرتاحين
وﻻ سهرتى لحد مالقيتى النهار
حرمان للمسة ايدى؟
----------------------------------------
تفاعيل مشاعرى بتختفى
وانا باحضنك.
واما شفايفى بتلمسك
بتدخلى جواتى
احرم حياتى من الهوا
علشان ماتبقيش بره منى
واموت......
ونشبك اﻹيدتين ونطلع للسما
ننزل دموع ع اﻷرض.
عشان فراقنا يكتمل
----------------------------------------
جربت مره انحنى لنفسي.
ومسكت ايدها
وقت ماحطيت لون شفايفى
ف كف ايدها
دموعى نزلت
اصلها
ماكانتش واخده بالها منى انى عايش
----------------------------------------
حبيبتى لما اطمنت
جابت ايدين حلمها
وحضنتنى من حلمى
واما صحيت
سابتلى ورقه وكاتبه فيها
(ياريت نكون تانى بشر ....)

انا ذنبى ايه لما اعشقك
تزداد جروحي
ولما ايدي بامدهالك
تبعدى
هو انتى يعنى بتفرحى
لما ابكى
ولا اما دمعى بيوحشك
بتحب عينك بس تطمن
عليه؟

ماتوفريش الدمعتين
ولسه ف عينيكى الدموع
واصرفيهم ف البكى
او حتى ف الضحك الحزين......
.....
ماتعوديش خدك يبات عطشان
وتقولى انه م الندا يشبع
اصل الندا متربى ف احضان السما
اما الدموع اتولدوا جوات العيون
.......

وانتى مجروحه ف مشاعرك
كنتى احلى
بس لما كنتى احلى
من كده.
.
.
حبيتك.
.
.
وانتى كنتى ف حد تانى
جوه حلمى
بيكدبك
وسط امنيتين طلبتيهم
وقالك اه.
صدقت تجاعيد مشاعرك
صدق كدبه
والحقيقه كانت اغرب من كده
هو كان مستنى حلمه
ف حته منى
واما قدام المرايه شاف حقيقته
قال
ماخونتش.
كنتى مستنيه منه
انه كام مره يخونك؟
ولا كنتى عارفه انه
حد كان عايش بدونك
وانتى كنتى عايشه فيه ومكمله
يبقى ليه ترضيلى ابقى
.
.
امر ناتج ف انتهاء المسأله

لو لسه فيكى حضن منى
رجاء .
بلاش تسيبيه ف حضنك
وافتحيله الباب يروّح
هو محتاج للدفا
ف حضن الشوارع

وفضلت مستنيه يقوم
لكن خلاص
وقت الفراق
حتمى.
حتى الدموع مالحقتش انى
اخدها لو بالاستلاف
سبقتنى غمضة عينه
خبيتهم
وايديا كان من نفسها
تلمس ايديها
من ايديه
حسيت ايديها ورده ف كتاب
واتقفل
ارجوكوا
لاء
ماتغسلوش من عمرنا
بصمة قزاز
على شفايفه اما ضحك

بصيت عليا
لقيتنى زحمه
خرجت منى
مالقيتش غيرى
..............
مع انى كاره للرجوع
بس الحنين للزحمه
بيقلّق
بينى وبين نسيانى
للماضى
ماكانش فاضل
منه غير ثانيه
.......................
وانسى .....
وسط الممر الضلمه
وانا ماشي
عمال يضيق
فكرت ان ف اخرته
باب الخروج
جريت لاخره
دخلت فيا

حضنت نفسى
من زمان ماقابلتهاش
وهى كانت مشتقالى
من سنين
اول عينينا ماشافوا بعض
اتكلموا
نسيت ايدنا يسلموا
القلب كان واقف للحظه
من بعيد
شافنا ماكملش ومشى
من غير ردود
وقفت عينينا والكلام
حضن السكات
نمنا على الارض
وماكملناش لقا

لما السحاب دمعت
خد السما اتفاجئ
ازاى تدفى الارض؟
مش عارف ان الغرض
كان ف الفراق للشتا

بدئ الزمن ارزاق
بتلف بينا بلاد
وتغير الخلقه
ونزق فى الزنقه
وتزقنا فينا
من بين خطاوينا
شوفنا العجب حكايات
لحد ما ايدينا
طبعت على روحنا
من بين صور ياما
صوره ورا صوره
علت بنا الهامه
وطت بنا القوره
ارجوك كده كفايه
دمعى مشوكنى
لانه لسه جديد
استر عليه بكفن
وحطنى ف الطين
وهات معاه الدود
ياكل جعان كفنه
ماهو جسمى
مش بفلوس
قادر يجود ويعين
رغم انه كيسة عضم
مبقاش فيه ريحة جلد
من كتر مر العد
والصبر بالزوفه
اشكال ومخلوفه
سلمتها وشى
دهنوا الخدود اوساخ
ارجوك كفايه بقى
دخلنى ف المحرقه
يمكن اشوف عضمى
ف النار عليه القيمه

بصيت عليها
م القزاز
ومشيت قوام
كان نفسى ماتحسش
ف ثانيه بنظرتى
اتاريها ضحكت
بس علشان
يوم بكيت
حسيت بضحكتها بتمسح
دمعتى

حبيبتى كانت من زمان
والوقتى وهم
من يوم ماشافت
فيه قلب المتهم
وماكنتش اعرف انها
حبت تروح
عشان تبيعنى وحد تانى
كان اهم
ليه الخيانه تبقى اخرة
كل شئ "؟
وبعد قصة حب
كل الكون يضييق
صعبان على حبى
اللى بعت العمر فيه
يا خسارة الوقت اللى
ضاع من غير تمن

انا من زمان
كنت الحنان بتحمله
دلوقتى قلبى اما كبر
مابقاش يحن
ليه لما بنعجز
نشوف الذكريات؟
وبنفتكر مع بعضنا
كل اللى مات
وبننسى اخر حد
زارنا من دقايق
اصل البكا موجود
معانا ف كل شئ
حتى اما نفرح
بنلاقيه اقرب صديق
ولما نضحك بنلاقينا
قوام ندمع

جوانا الف بيحلموا
والحلم مات
واحنا نكدب بعضنا
جوا السكات
مين فينا قادر
يوم يصدق كدبته
ومين بيقدر يبقى
صادق للمات
م المستحيل الارض
ابدا ترتوى
ولو ارتوت
هاتموت شقوق
لازم تعيش
على قدنا بنعيش
ف حد المستطاع
كله بيتمنى انه يؤمر
كى يطاع
واقفين بنستنى الحقيقه
قد عمر
والكدب فارد ع السنين
وكانه امر
مساكين بنخدع نفسنا
نحلم نصدق نفسنا
نصحى نلاقى نفسنا
والحلم مااااااااااااااااااااااات

وفضلت 100 سكه
احلم وانا صابر
مافاضلش غير سكه
فيها العذاب صابر
فكرت اجرى عليه
سبقتنى احضانه
خدنى بايديه لسكه
وانا قولتله حاضر
يألم ؟ مايلم فيه
انا اصلى متعود
طعم الوجع ليه
دوقته ماجسيتشى
من كتر ما دوقته
غيره ماحبيتشى
شافنى العذاب كرمش
رجعنى للسكه
صعبت عليه ضحكتى
رجعنى للاخر

اصل الوجع مدفون
جوانا من بدرى
من غيره دى الدنيا
فاضيه ولا تتعاش
يترجى فينا نسيبه
واحنا مانستغناش
لاننا من زمن
متضفرين ف الالم
وحاضننا بالراحه
بنحس فيه بالدفا
يبقى يسيبنا لمين؟
عجبى على المولد
من قبل مايفتح
يبكى بعلو الصوت
حلمه يشوف غيره
مع انه لو عاش الحياه
وماشافش
هايكون كتير اريح
بس احنا نعمل ايه
ف سنه الدنيا؟
ننزل كده ف ثانيه
ونعيش سنين العمر
واخدين على دموعنا
تخلص مواجعنا
نجيبها تانى كيف
ماهى حاجه مكتوبه
لا قانون بيمنعها
ولا حد سامعها
لانها ف السر
كتبت معانا العقد

باشرب ف كاس العلل
شفطه ورا شفطه
ورغم دا يازمن
تحاسبنى ع الغلطه
قال يعنى انا وحدى
اللى اشتريتنى ملك
ونسيت بانك ايجار
وفيه خدوك واسطه
....
ليه عندنا فى العرف
ان الكاس
لازم يكون واحد؟
دا لكل شئ الوان
بس الالم واحد
على شكل عله ف كاس
ومأجره الشنطه

ماشى ف طريق
الليل
مدهونه جنبينه
من بين خطاوى
العتم
تحضن خطاويه
وبين حيطان الطريق
سادد دراعينى
استنى نور الشمس
يقابلنى
الاقينى وسط الحلم
اخر الطريق مسدود

لو مره سافرت مركبك
ارجوك تسيبها
واقفل عليك بابك
ولا تستنى فيها
زى مانت ليك حقوق
تحلم
هى برضه نفسها فى
الحلم