الدمع بيطّفى الخدود
والضلمه تدخل ع الشفايف
يخاف القلب م الوحده
ويرعش جسمى من خوفه
تحس العين
تبطل تبكى وتغمض
وانام واحلم بكوابيسى
تشك فيه دبابيسى
واقوم مفزوع
اوموت م الجوع
واحيا بلقمه مركونه
بقالها سنين
من العفره ملتها طين
وتدخل جوفى وتزرع
غيطان صفصاف
ويرجع تانى قلبى يخاف
من الوحده
وتحزن عينى وتدمع
وتطفى خدودى وتضلم
شفايفى ليل

سا عات بتبص م الشباك
تلاقى البرد مستنيك
تجهز له
تخش عليه
وتشبك ايدك الدفيانه
بين ايده
يسيب ايدك وياخدك
الف كف وكف
ويضحك هو
وانت تلف
وبعد الوقفه بص عليه
قابلنى لو لقيت وشه
بيلمس فيك ؟
ماتكدبشى
بترعش منه وبتمشى
تخش الاوضه
م الزحمه
بتتمنى
تعود
تانى

بافكر تانى ولوحدى
اكيد فى حاجه ناقصانى
وابص لبكره من عندى
واعيد حساباتى من تانى
اقول يمكن امل بكره
يرحع حاجه من نفسى
كانت من عمرنا ذكرى
هاييجى اليوم وهاتمسى
وادور ع اللى كان رايح
من الالبوم ومارجعشى
وابص ف شمسة امبارح
ف حب كان ومانفعشى
هايرجع تانى ويكمل
او امبارح يرجعنى

اديته كل مشاعرى
واطمنت ليه
ماستنتوش لما هاشوف
يدينى ايه
اتارى كل اللى احنا فيه
كان اخره كدب
واتارى قلبه لسه
مش عارف يحب

طب يعنى ايه
لما قابلنى وقتها
وقال حبيبتى مصدقك
كان يجرى ايه
لو كان بعدنى وقالى
ماقدرش اعشقك

_____________________________________

بالمس ايديّه لقيت ايديه
مسكتها
عينى ف عينيه
ماقدرش يمشى بعدها
وقال كلام عرفت منه
اننا م المستحيل
نبعد ف يوم او نفترق
لقيته سابنى بعدها
وسابلى قلبى بيتحرق

وقال بجد
مش هاعيش
فى اللى احنا فيه

ساعتها ماقدرتش
ارد واقوله
ليه؟

كل اللى بان منى
لقيتنى بابتسم
ماهو مستحيل بعد الكلام ده
ابان ف عينه باتهزم
ولقيت عينيه مستنيانى اقوله رد
لقتنى بابعد
احنا لازم ننسى بعض

ساعات بنحلم
ونلاقينا فى الحياه
ابيض واسود
وايدينا تبعد
ونلاقى فى الحقيقه
ايدينا لسه مشبكه
وساعات بنحلم
بالرجوع
واحنا فى دايرة الافتراق
ماسكين بجد
ايه معنى يبقى بيننا وعد
لكن بروحنا مش قادرين
نصدقه
ليه كل مانقول الحقيقه
نبقى خايفين م اللى جاى
وتلف بينا الدنيا طول
مالجسم حى
ونموت وبرضه بنقترق
واحنا يدوبك من ثوانى
مصدقين