تعرف تقول
الشعر ف الشارع
تعرف تقول الشعر
فى الشارع
وتغطى جسمك
شحم وتصرخ
تعرف تقول الاهه
من جوه
يطلع أزيزك للسما
السابعه.
أنا كنت بياع الندا
للورد.
وكنت بياع المطر
للارض
وكنت بياع العرق
ع الجبين.
مين اللى قال مناديل
للحلوين.
دا كل من داق الحبيب
اتغرب.
وكل من هاجر طواه
الجوع..
لما الولاد تموا ال حداشر
هجرى.
رموا للبنات الميه فى الفنجان
أنا كنت عيل بيقرف من دموع
العين.
وكنت عيل بيقرف من المكياج
قضيت سنين الحب
ف الضلمه.
كل البنات خافوا جروا من
طلة الابنوس.
حبيت اكون جوا الكابوس
الجلد ماخرجشى
وأمسك عصاية واطيح ف كل
الخلق
يالله بقى كل اللى حب
الشرنقه ماخرجش.
بصيتلى مره لقيتنى واد
فينو
م اللى يدوب ف البق
من كلمه
تنزف عروقه كلام
مابيحبلش
يارب ليه ماخلقتنيش
طايش.
أو حد م الاشقيا
يختار كلام مقصود
الحمد لله الذى خلانى
عايش
وخلى كفى ورق
يتبل مايطولش
..
عطار ف ايد عطار
والتمر مانشفشى
وقت اللمون ما اتنشر
على السطوح بالكوم
وانا كنت فاكر أنى واد
فارس
اول ما شفت الغسيل
نقط ما بين الحجر
..
هى السيجاره الميريت
مع كوبايات الشاى
بتنبت الشنبات
ولا البنات اخوات
راضعين ف نفس السدر
..
ياعم .أجبر بخاطر صاحب
الجته ولفه بملايه
لجل ان يقولوا مقطع الحواديت
ذهاب و اياب
لا طولت فيش الكف
ولا استنيتش ف الحبسه
اصل البعيد اخضر
مالوش ف الهرس
...........
