والحد الفاصل
بينى وبينك
حبة وقت
من امبارح
وشوية حواديت
متعانه
علشان الجاى
انا اصلى مطنش
سيرة الحب
ودقات قلبى
اللى بتفتكر
ان دا كان حب
ودعت الطالع
على فكرة
ف شنطة لايام
بصيت قدام
ملقيتش الحلم
بيتحقق
اكمنه قديم
تحت السلم
تلميذ ومدور
ف الكراريس
مالقاش اسمك
ضفيراتك فين؟
طب فين الصبح؟
وكبرت قوام
على شلة احزان
اتبعونى
وانا غويتهم
استغفر ليه
على ذنب ماكانش
ف حسبانى
ولقيتنى اخوه
مرمى ولقيوه
جنب السكه
وخدونى اسير
اما انت كتير
بس معافر
دا الشوق كافر
واللقا احسان
حبيتك جد
ولقيت الفاصل
بينى وبينك
حبة وقت

انا العشم اللى
زاد ف القلب
حنيه
انا الميه ف نهدين
السما
سحابه
انا اللى صومت
عن باقى البشر
تمه
ودوقت فطارى
ضحكتها
يارب الحلم على
قدى
حيطان حب
وجناين شوق
وسقف يقول
غنا ومواويل
وانا وهى
نداوى جراحنا
حنيه
وحبة صبر

جايز تكونى
يا غربتى
مأوى
جايز نسيم
الصبح
ف الرحلات
مكتوب عليا فرحة
التغريب
وسط الوشوش
اللى مابعرفهاش
طاهر عجين ايدى
ولا خبزتوش
ماهو لو خبزته
يكون نصيب غيرى
قدر الحبايب يعشقونى
ولم يشوفونى
والعين بترأي
بس
قريب القلب
لا الغربه لا الرحله
ولا التباريح
دا العشق هو اللى
مالوهش ذنب
بلد المعافر ع الخريطه
مافيش
بلد المسافر قرب
نن العين
وانا بلدى ننى عنين
حبيبة الروح
لكن حبيبة الروح
ف حور العين
الجنه مش للساجدين
وبس
للى عشق ولا طالش
من عشقه
فيه ناس على الارض
وشميتها
وناس تراب القبر
شمتهم

توارد خواطر
خواطر لبعض
تبان الحقايق
بتحضن ف بعض
افى العشق يرنو
حبيب الحقيقه
ثبوت المجايز
مجايز ل بعد
وف الانسانيه
تجلى وتعذر
تموت الف تحيا
ف ميت الف منظر
وتحيا اللى ماتت
وتنعى وتزجر
اصون كل من صانت
الامنيات
وباصحى وبفارق
 على كل عشقى
با عين الجباير
يا جبر الخواطر
تبارك نشاطر
ونستنى بعض

قد صام ف الحب
دهرا
وتجرع الاعتكاف
حسنا تخللنى عطرا
عذرا تجلى وخاف
يا نفس ملئ الثنايا
قبس من النور يخفى
عذرا اتانى وتجلى
عبر السنين العجاف
والطيبات العذارى
فينا وف كل صوب
لكن من شاف يدرى
داق الحلاوه وما خاف
صعبه الحلايل عليا
سهله الحرايم بتأذى
يا خلق صبوا عليا
صبوا عليا الحدادى
الحادى سابنى وفلق
جريت جمال الحقايق
يا توبى م الصبر شقق
والليل اخدنى وسايق
لا الشمس ف الليل
تشقشق
لا الليل يفارق مضاجعه
غاب القمر عن مداره
دور على النجم ضاجعه
ملئ السحابه حبايل
مطره وتروى الشراقى
الذنب سارح بطبعه
والقبر هو اللى باقى
عجب الملوك لم رؤنى
والرؤيه خير الاعالى
النعمه ف الصالحات
الذنب يفنى الجبال
يا نار كونى سلاما
ع الجته ولا تفتريش
دانا توبت عن كل مخزى
ودموعى مابتنتهيش
اوا ف الامان النهايه
يارب زيدنى امانا
لو م الضمان العطيه
لاغمس بتوبتى
 عشايا

اعشق تراب السفر
يا مفارق يا إبن الليل
درب هواك دنيا واخرة
مسيرك للفراق متعان
والعمر ينطق
انى بريء منك
انى اخاف الله
وانت هنا المحتاس
ضمير انداس
ف حاذر وآذر فرقتك
لجل النجاه

نفس الغريب
بتشوف
والعين ما ترءا
غير سواد الذات
وحدى انا والقصد
منزوع العفا
لجل التراب مايتاوى
سفر الجسد
على الكتاف ملك الحساب
واقف
بيضم كتابين والرقيب
واحد
اقرأ كتاب عمرك ف يوم
واحد
يا بخت من كان له وسيط
ياخده
يا غربتى ف دراع رحايا
وشوق
مطحون ومفرى
وعصبتى مابيدى
تربطنى
لملمت جرح الباط
من الشقاوات
عافرت
وقت انتزاع الروح
من الاشباه
من كان يسكن ف الجسد
زايل
من كان يسجد ف التراب
هايل
من كان بيزعق من وقته
سكت صوته
وانضم الأصنام
 بلا جسد
يا نفس وقت الاغتراب
قرب
وفات الوقت
لا تصعب على حالك
وحدك ووحدى شريد
الذات بالمره
مره ف حلقوم اللى
مات مديون

نترات العشق 
على السجاده
بتتفاعل مع خلط
جبينى
يطمن قلبى 
بزياده
ويزود الله
ف شرايينى
انا مش محتاج
انى اطمن
واآمن اكتر م الاول
والفايده ف ايه
وانا مستسلم
والجسم متابع
تأكيدى
الحب اتبعتر
لملمته
والكف العيل
يتشاقى
مسكين بيعافر
بالفطره
مع روح القلب
بيتلاقى
ركعات الشوق
المدلوله
محلوله بكلمه
تزوغ منى
وتجر العمر
ف لوامه
اسرق لحظات التوبه
واعمل بالتى هى احسن
انا لست وحيد
اطمن
والكل خشوع

وياما عيون 
بتضحك 
بس من بره
وجوه النن
ملو الام
توفر دمعتين
للجاى ماتعرفشى
ما يمكن بكره ييجى
اصعب من امبارح
وكان بيكمل الضحكه
بكى وتجاربح
وكانت هى بتجيب
بالبواقى
نهار
يقوموا بنص طقه
فرح
وكام مره صعب
ع الحى يتقاسم
عشاه
الموت
وكام ميت
وكان نفسه
يبيع عمره
عشان بجنيه
حلاوة روح
وكام مطرح بيستنى
قدم ناسه
وكام مر اشتهى كاسه
ولا لقيوش
فى ناس تلقاها من بره
دهب صافى
ومن جوه ماتستعناش
تبصلها
وناس من بره مرمطها
السباغ قول ييجى ميت
مره
ومن جوه جبال دهب
ان تتاقلها.
بتعجبنى البنات من
سن ستاشر
اشوف الكحل ربانى
على العينتين
ويعجبنى البنات
انتيم ضفايرهم
ولسه الكراسات
ماقريتش ولا فاتحه
حبيبى العمر انا وانت
صحاب بالجبر
وبجغرافية التجاعيد
ماتعزمنيش على طول
الاجل منك
مالوهش لزوم
ياسيدى الشكر للى
جمعنا على طبلية
الرحله
وسابنا نموت

ووشوش بترسم
خطوتك
من ضحكهم
وعيون بتسأل
ضحكتك
شبهك بجد؟
دى الشقاوه بعين
حبيبك
طفل نونو
وقلب بيبى
لسه نازل
م الرحم طازه
ع اللذاذه ف كل
حته
شوفت بدايات النهار
امال ف عز الليل
هايحصل إيه؟
غير قمر
بعيون سحابه
ودمعتين فرحه
على خد وش الارض
يبعتهم
ويستنى الندى
حد عدى من هنا؟
ولا مستنى التجلى
قولت اجلى اما اصطبح
بنهار جديد#

وابيع مناديل
عشان دمعك
ماينزلش
واكون شايفه
ولو ترضى اكون
خدك
يبات من تحت عينك
ارض
يتبلل مطر عينك
ويغرس ضحكتين
فيكى
على شفايفك
صحيح ماملكش
ف الدنيا غير
الكلمات
عشان جيبى العزيز
عزيته على قوته
وكفنته
البقاء لله
ولا جناينى
يجيبلك من جنينته
ورد
انا من يوم ميلادى
ارض
وسقايه
وكام شمسه عشان
بكره اللى مابيفهمش
م النظره
باقولك ايه
انا عاشق نصيبى
من الشقا دنيا
على حبة بواقى
عمر مستغرب
ياريت اقرب من
اللى داق حلاوة
زاده قبل فطام
يامكتر عجنة الايام
ومستحمل##

وع الكورنيش
اشوف الطيبين
شباب وبنات
يا جاى بتكتب الاسم
اللى ع الدبله
ياريت تكتب معاه
ضمانات
صحيح الحال
بيتغير
صحيح الحب
بيفارق
ونادر لما بيعلم
نادتنى البت ع السلم
وماطاوعتش
بحب جديد
ورحمة امى
مانا عارف
دا حب بجد ولا
كلام
بقايا هزار وداخله
تطل ع المرايات
فتستعجب لشيب
الشعر
ماتستصغرش تجاعيدك
ولا تستعجل الموته
وكن صابر
بنتفرج
على المقادير
على رأيك
دى كام عرافه
ندهتلى
بإسم امى
وكام فنجان
ف قلب العمر
ماتشربوش
تدور مين هايشربهم
خخخخخ يامين غيرك
ياعم انت هاتستهبل؟
نصيبك جى
لا محاله
يارجاله
نويت والنيه
توب ابيض
وسجاده
على سبحه
وكف بخور
واشوف
كعب الجريحه
مداوى
واتدارى ف ركن
الفجر
خلاص خلصت
لا لسه بقايا العمر
تحضنى
تنز ضلوعى
كسرات
على سكرات
على شخرات طلوع
الروح
صيام الذات عن الزاد
الحرام ابقى
ماليش بركه الا كوز
الزير
ومش هاتيمم المرادى
الا اما الحبيب يمشى
انا ضحكى
على فركى ف كفينى
ينزل (وقتين) كيف
للى عشق الصعب
ولا كمل
يا مستهبل
على نفسك
يدوب نفسك
بتتكلفت
ف عز البرد
فلا عمر هايشفعلك
ولا نوم هايركعلك
ايا
درويش###

قصير الحب
ع الضحكه
طويل الليل
على الاشواق
وانا وانتى
صيام الحور
عن الغلمان
وايه الجنه
غير حبة روايح
طيب
غريب اصلا
غريبه الروح
بتتعرف على بكره
انا لست الحزين
ف الدنيا م الاخر
ولست بعابئ اصلا
من المقادير
يا ميت عذرا
وف الاعذار
توسل للمريد
يرحل الى ما دنيا
ويعزز غرام العرف
اشكالا على اشباه
على الوفات
من الاشياء
بتتلاشي
واشوف غيرها
ماتستعبطش
 وسايرها
يا بوز ابرم
على سجادة
الصلوات
ماتعزفش الايات
نوته
مقام العصمه
ف العالى
نواح القلب
مش صادق
بلاش تبكى
ووفر دمعتين
الفرح للاخره
بدال سهر الليالى
قرب
اعطي القلب كام
فرصه
وما ييسألش
انا عاشق
واعصر من دمى خمرا
واول من بيسكر
كف ايد الحال
معانا عيال
بتتشفع
معانا الورد
ف الشرايين
وكل الوصل
مجانى
ومين يفهم
مافيش عذرا
 هاتتبسم
على امبارح
ولا عشره هاتتندم
على المالح
ولا الخاين هايتربى
خدوا كل حوشته
وهاتوا محبه
بالباقى
احاول الم اشواقى
ف رفقه ركنه
واتلملم#

طابت الليله
وتجلت
وف ما خلت
ضحكتين على
قلب يوم
كل كان ف الكوم
وكوم الاسئله
راكن بعيد
شد ايد للحلم
طبت
اه وسبت
لما كبت نص فنجان
الحنان
يا غلام كل باليمين
لخبط الشمالين
يمين
كام يمين على بق
طاهر
قام مجاهر
حى على كل الجمال
جنب تربيعة عيال
ياما لمستنا
الشقاوه
باكو كونشينه
وبنك الحظ
وبشلن الملبس
شوفت بختى
من زمان وانا لسه
عيل
شوفت رؤيه
ان ماريو نط على
سطح الجيران
سرق البنات
والخايفه سرخت
بسبس القط اللعين
شرب اللبن
من تلاجتنا
والكلاب اللى ف حارتنا
حبله من كل الدكور
حلمنا اتصنف بيور
الكفوف النونو
بعد الكلبظات
اتأنتمت
كفين شقاوه
كل اصناف التجنى
ع السطوح
وقت الغسيل
تاخد براحها
شيبنا بدرى
هو ايه ما العمر
يجرى؟
بس لما كبرنا حسينا
الكلام
شكرنات على
غدر احلام الزمان
وسط العيال
المكتوبين
عواجيز....

كل عتمه
وانت فى المرايات
بتسكن
كل خلق الله
سهارى
طعم كل الطيبه
جاره
هى حاره
وع النواصى
شد كتمان التوسل
رن
رنيت
قام مكنسل
غالبا انا غير متاح
قمت حى على الفلاح
والسماح للانسانيه
دبت الطاقات عيون
قولت زمزم
زملينى ياروح
ف قمقم
ها هنالك شيخ
يتمتم
قس للتراتيل يغنى
هذه ليلة
سجود الشمس
ف العلياء ترنو
اب يحنو ع الغلابه
ام ثكلى
والف غابه
بالانابه مصطفين
يا صلاة الزين
على الورد اللى
قبل الفتح قفل
ف الحدايئ
لسه قلبى ف عروة
البدله بيضحك
لسه املك
طعم كرباج
العزيمه
هى ساعه
بالف سيما
تشتهى
النظره الحلال
طالت الرحلات
با كمل
قد ضى الفجر
صابح
قد نور الشمس
طارح
ع المحبه
كل صره
هى لسه الارض
ف اطوار المجره
ولا بره
ولا ايه؟
طيبون او كاتمون
او منكرون معنى
العواقب
احنا ايه ؟
احنا جرذان التجارب
قوم نحارب
لسه بدري
قوم يا عم
وعزى جارك
قوم يا فقرى
 جنب دارك
واعتمر
 وسط الصوان

دنيا ومتبهدله
داقت خطاوينا
طعم العتم فينا
لساه غريب اخضر
وانا بين كيان ابتر
شأنى ك شأن كتير
زنقه من المشاوير
والجلده بتعلم
الكلمه تحدفنى
من الاهة للترحال
طيب يا طول البال
من واحنا لسه عيال
والغاب بيتكسر
حلم الدموع سكر
تصحى طبيخ بايت
والخد مستحمل
الناى على بكره
مسنود من التفكير
الخلق لسه كتير
على طلعه ورا طلعه
كتر الهموم دلعه
مسخين كمل حلمهم
والخلفه ممسوخه
يا مطلعين العين
الطله منفوخه
حملت بطاطينى
لميت جنيهينى
وسافرت واتعكيت
العمله مش عمله
جوع السنين زارنى
يارب صبرنى
رجع الشقا قبلى
على بيتنا ومسبق
يامه الغراب جايب
م الغلب مستكفى
كف الملوحه حلال
حسسنى بالشقيان
عرقان انا وانتى
والصيف جواز الطين
كجواز مرات الاب
صب العرق اكتر
شقق خطاوى الطين
عرفنى مشوارى
القبر داق بيا
عاوز جسد وحده
وانا كنت بالتلاتات
كفن الجسد والروح
ابوح عليك يا عجز
كسرتنى قتافيت
ياريت ماكونتش جيت
ولا شوفتش الزحمه
امه على امه
يا ما خيبت فى
الكتاتيب
الشيخ ف سورة العلق
اقرأ
مانيش قارئ
اضرب كمان وكمان
الجته اهى ببلاش
والعذر مابيحفظش
طنش يا ابن الليل
واعشق بنات القمر
واتداروا ف النجمه
نخرج كتير وبنات
حلاوات على شقاوات
والقسمه ربانى
وسط القلوب تنبت
نبت الصبايا الحور
لسه الامل ف البور
حد القيامه
الجد

العشم ف المستحيل
والسكوت المستفذ 
والحقيقه المفرطه
دبت العفاريت تشق
المرمطه
والمملوكين ع العين
رموش
على سن الطريق
حالق وكاتب قصتى
والشعرتين انا سيبتهم
لجل الندور
على قد قد المكتوبين
حالة تجلى
وبحب فيكى الاعتنا
كنا سنه متودكين
على شمس كل صباح
غريب
هو السؤال يفرض تباشير
البراءه
ولا هوة لانخفاض
الانعطاف على ضى نور
الافترا
والبيع صبح تمثيل
يا حب عمرى من الجدايل
باعترف
انا فى سبيلك انهيار
طوبى لمن اخد النهار
على جتته
واللحم طازه
ولسه نقطه ف القزازه
بتتسجن
يالله بقى قومى تا نرقص
ونعيط
على نكستين
يونيه الحزين
حاضن فى صرة حضرته
رمضان كريم
اصل العيال ههههه
نازلين ف بدر مصيفين
وانا لسه عايش ف
الشتا

بقالك قد ايه
ناسيه ان فنجانى
بيحتاج القرايه
ومن قد ايه
ناسيه الدعا
كتر البعاد
خلا شفايفى
مدمعه
بتستنى ايدك
تعتع بقى
وقرب بعادى
وبصلى مره
ياموت مابتجيش
الا مره
وتختفى
بصى بقى
لسانى شايل
بطاقتك
وصورتك
وشكلك ف
وشى
هاتصدقى
ان انتى لما
بتوحشينى
انا باشتهى
بصة مرايه
ياهل ترى لو خدت
كل الادويه
راح توصلك؟
ولا نسيتى الاجزخانه
طب بصى رمضان
السنادى
بينتظر لك
كل كلمة
والا حالف ينتهى قبل
المجى
(بطل زعيق علشان
مابطلت السجاير)
بطل بقى هو انت
ظابط ع الصيام
مات الكلام
وفضلت انا
وسط الكتير
ال مانساويش
اخبارك ايه؟
ماوحشتكيش؟

قطع من الليل
القريبه
وبصلى 
ولقيته واقف 
جنب تعميرة
حنان
شميت بقايا
واترشيت طيبه
طبيت وطبطب
قلبى ع الضلعين
سكرت دموع
ياربى ع الاهه
شقت هدومى
سهم
وانا منهم باحلم
وهما ماجوش
شوفت الخبر
ع الحيط جرافيتى
لعونت ام الحيط
وماله ذنب
على جنب منه
بكيت
شوفت القمر
بالليل وكان اخرس
افرس
من السموات
عشان بكيت
ياخيبة العاليه حناها
الشيب
اما شراقى الارض
تتصابى

انا كنت راكب
مشيتى 
وباكدبك 
يا دنيا ضحكت 
ع اليتيم 
واتمسخرت
مليون امل
على قلبتين
وجوزين شفايف
عرفوا بعض.
يا طيبين
مين اللى حب
يدلنى
او ينحنى
دا الجاى عارف
يبتسم
فاتحملوا

يا طعم القساوه
ف قلب البيوت
وقلب القساوه
ف طعم البيوت
عيونك تابوت
وقلبك مسافر
واشوفك باموت
ف حضنى المهاجر
تبات المشاعر
ف قلب السكوت
حبيبتى الشفايف
وخايف اقولها
دى كلمه تدوب
خيوطى ف نولها
تكسر اصولها
واكون سكت صوت
دا طعم القساوه
ممرر كفايه
ك شوق الاراضى
لضل السقايا
فطارى عشايا
عشايا نقايا
نقايا غوايا
واخرتها دود

انا قلبى 
منعكش شرايينه
ودموعى
بتنزل لموناته
يشربها الخد
فيستهدى
وانتى اللى بعيده
بعين بارده
بتاخدنى واتكتك
جواها
اخيه ع الالشه
اما بتبقى
من حد ماصدق
تضحكله
وانا اصلى الواقف
على بكره
شباكى بيفتح
على فكره
ويفقل شيشه
اشتاق للباب
انى افتح به
بقيت الاسبوع
وانتف ريشه
الشارع مبكى
ومتحير
خلفتنى حلاوه
ايامى
ولقيت الجاى
مر مكرر
اه ع التسعيره
على الفاكهه
بترخص فيا
التحويشه
اعمل ايه تانى
على العافيه
غير انى اشدشد
ف الفيشه
لو كان ع الشعر
انا متعاص
شوق بحلاوة
روح
قدامى يدوبك
تصبيره وافوت
وهاساارخ ابوح
مش وحدى
وبس
مين عاش
مرتاح؟

كنا سبعه ف قلب جمعه
والفراق كان لينا تابع
كل ليله تنز دمعه
والشتات للروح يجامع
اه وكل الخلق ضلمه
مره جوه مره بره
انما ماشوفتش ف مره
فرح ف الدنيا دى سامع
كلنا ساعتين شقاوه
كل وقت لازمله هدنه
زى اى سواد بيهدى
زى ضافر سابله ودنه
والظروف ع المعطيات
تشتهى لدمعات عياط
شد شعرك م البطاط
اتوماتيك تنزل دموع
هو شرط الحزن جوع؟
ولا حمل الكتف تقل؟
وسع المزنوق بصابعك
تصرخ الانات ب غل
يالله ايه والليله فل
وكله ف الشراشيب
يفوت
كنا سبعه ف كل جمعه
بس ف الجمعادى فرد
اه نسيت دا ف شهر
سته
كل عام يحصل له
جرد
الف شكرا للعموم
المستفذ
تعظيمات للكون
بحاله
كلنا واقفين نفز
و مااستحينا
الف مبروك
ع المباشر
واللى عاشر
خير ما ربى
كلنا وارد بلادنا
اما خيرنا
من الطبيعى
وارد اوربا
رقصة الزوربا
مع السكران بتخلق
الف زوربا
بس هيش
تنتهى الاحلام
مافيييييش
واحنا نسكت
ما السكوت مصنوع
ف فابريقة دهب
افأينما ولوا ذهب
من غير رجعه
تفترق دمعه واه
عن الف دمعه ؟
ماتجاوبش يا محترم
كوز المحبه لو بجد
ماهو يبقى م الحب
اتخرم
شوفت الهرم
مبنى من السبع
العجاف
والسبع ايات المثانى
يرقوا بيهم الف عله
حط جله واتخرس
ياتموت غريب
وسط البانر
غربتنا لمه
مع كوكولا الكل غنى
بالف ضحكة شيبسى
هانكمل فطار
رمضان كريم
والله اكرم
قم للصلاة
وكبها
اوا فى الصلاة
المنتهى
وطنش تعيش

كانت هناك 
واهو كان هنا
كل السكك 
بتؤدى ف الاخر
الى 
مجهوله....
معقوله ..
تبقى واقفه
ساكته ..مدمعه
قصاقيص كلام
ف عينيها
مش متجمعه
اما مع
صاحب حزين
بيكمله
او حد تانى
بيحكى وبيتحمله
لكن الظروف
كانت ف موقف
مذبهل
ايه يعنى لما
الامنيات
ورا بعضها
فضلت تهل
وهى مش فاهمه
الكلام
بس الحرام
الحيره انتمت
الظروف
واتلخبطت
فى لسانها
تركيبة حروف
مابقتش عارفه
ترد كم الاسئله
اما هو
كات ازمته
ازاى سوا
وهما كل
الحد منهم
ف انتظار

فكيف اكون ذليل
الحب 
والسكرات
وعين الناس قصاد
عينى 
مافارقونى
ـــــــــــــــــــــــــــــــــــ
عجبا خطاك
فلا عجل
القلب يسبقنى 
اشتياق
يا ويل من ذاق
الحلاوه
يعتذر
للباقيات
عن الهوى
ويسير
ـــــــــــــــــــــــــــــــــــــ
سألتك ليه؟
جاوبتينى 
بان الحظ داق
بينا

من سكات
الليل 
ووشوشة
الندى.
تبتدى الاركان 
تدمع
ف اشتياق.
هو دا القمر
اللى فارق
ليله فاتت
؟.
ف المرايه
وش كمل
ضحكته ..
اه باعافر
بس ليه باقى
الايدين متعذبين
؟.
هو شكل ف دايرة
الساعه
فلاش على اى
منظر..
كنت طفل بيرسم
الصيف
ع الرصيف.
وبيترسم تكوينه
سنه ب سنتين..
لسه باقى ع المدارس
ملو كراسة شقاوه
امى كانت وقتها
بتربى فينا
لاعتكاف
لجل ننشف..
كلها ركعات
وخلص
بس تخلص .
واحنا ف الاخر
نطربق ع الحقايق
والشقايق تتوجع
من مرتجع
بلى التمرد.
لا ء.
تجرد
وامتثل ..
جنب صباعين
العسل خلص
الفطار...
اقلع البيجامات
وعرى النوم
وكمل
باقى حلمك
ف الشوارع.
بس لما الليل
يقرب.
ابقى شد الليل
ف كمك
لجل يرجعلك
قمر
من سفر
بلد
النهار

وكام جيجا 
وهاند فرى
بيحكوا الفانى
من عمرى
انا الواصى على 
الماضى
بوصيكم على
كرتونة الذكرى
عشان بكره
اكيد قاسى
انا شوفته
ف كام امبارح
اتكرر
ف كام مشهد
فلات
داكن
وابشر نفسى
ان الآت
كابوس راكن
على بكره
انا المولود
كما الفكره
وزى اتنين
ولاقوا بعض
بالشوقه
جراح مربوطه
بالثانيه
مع العداد
يكر المر
يحتاج الالم
يشبع
يشكل دمعتين
منهم بداية
خلق احزانى
ف يتقابلوا
ف جبال الخد
بين العرى
والتوبه
اكيد ميت
وكل الميتين
بحساب
حاولت اشكك
التعذيب
لسد ديونى
ف الاخره
لقيتها بتشترط
ع الجسم
يتكفن
فلا تستعجب
الموته
ولا تستعجل
العوده لبطن
الطين
فحالا قد يجول
باركان الحقيقة
مستحيلات
العقول

كلنا فى الدنيا 
ديه 
نبقى على ذمة 
قضيه 
ومسجونين 
سجن احتياطى
والكفن هو العلامه
بالسلامه
ف وقت موتنا ..
تسليمات للمشنقه
والقبر لامم
الخلاص على تاج
يسوع
نلتمس نظره رجوع
يتوجد رد
ال مفيش
قفلت شباك وشيش
والستاير
اوف وايت
لجل الصراخ
مايتسمعش
الغراب نعق السنادى
عن نعيقه مارتجعش
طب جحش الملحمات
م اللى عاشوا
الف مات
والبواقى متصابين
رغم تشعيرة عجز
ف العضمتين
عد عدوده ياسين
واقراله فاتحه
وارميهاله ف اى
فتحه
تتوصل ف الاربعين
لله بهيه يا محسنين
الجوامع قفلت
قل اعوذ برب ناس
متلخبطين
على اى تشكيلة
ربيع
ابيض حصان الريح
و. فر
ومن السماء القانتات
ف السحر
حد جاء نصر الله
وماعجبوش الابالسه
فى المزانق
رد تانى
ومارتجعش
حد ف الاخر
ماجاعش

جواز الذكرى
للماضى
مابين الليل
وبين شبه 
النهار
رماديات
على اخر
نواصى
العتميات
تركن
ميلاد بين
وموروث للحنين
مصرى
اساسى الموجودات
محتوم
على قولك
بواقى ايام
بتاخد شماعات
الكانتو
بالاحضان
امر على الكافيه
ف الحى
والراديو
قدم داخل على
ريحة
بتعشقنى
الى البيت
الذى كان فيه
جوزين قلوبات
وكارت اصفر
عليه
لسه القدر
ماحكمش
ماكنا عيال
ولاد ميتين
شقاوة روح
لاكن داقت
مع توبنا
وزاد الحمل
كام عيل
بطعم البركه
ف التشوين
وحبة تين سوا
بقيوا
على جميزة
الاحوال
خلاص عم الزمن
بقال
وباعنا
التمن
بعد
التمن
مش فارقه
جواز الذكرى
للماضى
مابيخلفش
غير بكره
ومش كامل
وحتى الذكرى
لو حبله
هاتطرح كام نهار
باهت
رمادى زى مغرب
فات
يامين ياخد قصادى
الحلم
ونعديه
ولو بالزحزحه
الفارغه
ينول باكو غنا
وتفاريح
يامين ع الجرح
لسه صريح
مدام كل الحلل
فارغه
وماتسمنش
يامين ع الكرمشات
صابر
وماتكلمش

مصر ف عيون 
كل الولاد
كراسه باديه
ف ترم اول
اولى اول 
كنت عيل
لما اشب
الدنيا تضحك
وابتدائى
البنوتات بشريطه
بيضا ومريله
عمو العجوز
بيبيع قصب
ع الارصفه
عود مص بس
وكفى
منديل ورق
على ايه من سورة
العلق
اقرا الكتاب
المنتظر
ضرب الجرس
الله على
الوش البشوش
روح وحضر للعشا
بكره اتى
وبعده شبيه
والجاى حاضنه
التيه وماكر
وانا لسه فاكر
امى ف نهار
الجمعه
لما تحمى فيا
اذن صلاة الضهر
قم للطهر
والتدريب
ابيض بياض
التلج
جسمى
زى الجلابيه
ولسه ضهرى
ماندعتش فيه
نقط البلوغ
ياااااه ع البراءه
وهى لسه صغيره
والبصمه لسه
مالونتش الفيش
كبرت عيونى
ف بكرها
وسعت
على التطنيش
كبرت
مابين نفض
دماغك م القلق
طنش
وعيش
لقم الرغيف
مستعصيه
مغموسه ذل
ومعصيه
والمغفره ف سن
المعاش
حوش شقا الشهر
وتجلى
لالف عله
وانتشى
هاتلاقى عمرك
ف المفيش
اهو راح بلاش
مرثية الازلى
العتيق
احلم تديق
فارق صديق
وموت عشان
وقت الحساب

لما الخريف 
يخسر ندى 
خد الورود
نسال ساعتها
امتى الربيع 
تانى يعود؟
عطشان يا
خد
المحرومين
دمعات سما
ف الفجر
وف ضل عين
الشمسيات البكر
تضحك قلوب
النجمتين
انا شعرى كان
مستنظر المسحه
الحلال
من ايد حبيبتى
الطيبه
وماجاتش ليه؟
حالف عليه
مايلمسوش غير
كفك انتى
اصلى يتيم

يا مقلبه الملكوت
دانا قلبى ليكى القوت
وازاى اتوب عنك
وانا تهمتى 
عاشق

وكام بكره 
على بعده
على بعده اللى
لسه ماجاش
مابيطلوش 
على التذكير
كتير ف الدنيا
دى
من عاش
يموت ايام ف نفس
اليوم
ولا يئنش
قديمه العبره
ف التواريخ
ف ماتظنش
براح الاجوبه
يفيدك
ركام الاسئله
عجز
وكتر الهرى
زى الجرى
وسط المنع
يا كام فجر
اكتمل نوره
وشب نهاره
ناقص ضلع
ماهو الاخره
ف ديل الحظ
والتقدير
يا تكتيفة وجع
صبر العدد
ماسخه
يا كام مسخه
على حيط اللى
ماتعدوش
أ ويل جه يحاصرنى
ام الصابح مسا
بايت
ساعات والطيبات
لله
وكله يهون عشان
نسلك
يا سوء الظن
ع الاخر
ف ترنيمه
كلام يعجب
ماتستعجبش
يا عيل
لان احنا اللى
كنا
عيال

وعن بعترت اشواقى
ف ليلة صيف
وعن كل الذى
باقى بواقى
الضيف
وعن احلامى
ورميتها
عن البت اللى
حبيتها
وعن كام يوم
قضيناهم
مرور الطيف
وحشتينى ولسه
ماجيتش
يا انهار الدموع
ع الوش
فضلت استنى كام
غيبه
مابين اصبر وبين
معلش

دمع الخدود 
بنانيت
ضحك الشفايف
قمر 
والشعر ليل حواديت
يحكيها بالمختصر
المريله معيله
لاضمه شقاوتنا
والصبح من طلته
خبط على بيتنا
لو ترجع الايام
تروى حلاوتنا
دى الذكريات ايتام
مولوده ف الشيبه
هو الغرام عيبه؟؟

لسه العبايه
بتتغزل
لسه الجنين 
ماكملش
لسه الفراق
محسوب
وقت الميلاد
يشبك
مكتوب عليك
ياكفن
اسم اللى لسه
ماجاش
وف عيد ميلاد
الطين
يستكبر الموت
ويخش له محمل