ياندهه مسموعه ولا البعيد
اطرش
ضرب العيار ف الهوا لو كان بعيد
يدوش
ياصرخه فى الجدران بترد فى صاحبها
اصلك فى صوت الادان يوم ما طلع
ماسمعتهوش
اياك فاكرنا صحيح
نصرخ كما الوطاويط
مش لما كنت صغير وعلموك فى الغيط
ان الطيور لو بكت بتبقى مجروحه
ولا عشان الغيط ماجاش على قدك
ماسكنتهوش..........................

مجروح سيادتك قوى من الزمان اللى فات
ولا قصير الديل
وماعلمكش اللى فات
ازاى تكون
راجل...........

اه يا زمان العوج
سهم القساوه مرج
واتيتمت الاشجار
لما الجذور ماتت
ريحة العفن فاحت
لما الدما ساحت
ف وقت طهر الارض

اه يا شهيد ببلاش
ف ارض امك وابوك
لما البعيد وضاك
من مية البركه
لا طولت تتزرع صباح
ولاطولت تجنى طين
الارض دى ارضك
والعرض ده عرضين
والسكه ماتقسمه
مابين مسا وصباح

اه يا ديوان العجز
يا جز هيش
لدبيحه موتّها قبل
ماتحلبها

يعنى ايه كلمة نعم؟
يعنى
نون
وعين
وميم
يعنى كلمه فى الصميم
يعنى حق المظلومين
يعنى شربة ميه يشربها العطاشى
تبل ريقهم
مش كلام
مش  موافق
مش  حلال
مش  حرام
مش ورق فيه دايرتين

قول موافق غصب عنك
قول موافق رغم دم شهيد ف سنك
قول موافق رغم كل اللخبطه
اصلنا بننسى فى موتنا
يعنى ايه المرمطه
قول موافق لاجل لقمة عيش
بتتغمس فى كومه م الخراب


لما نون وعين وميم يتزوروا
يبقى ايه معنى الحياه
لما  نون وعين وميم
يتترجموا بحبة فتات
يبقى قول على الدنيا
الشتات

نفسى اكون مرتاح وانا بانطق نعم
واعمى عينى عن قضيب القطر
والدم اللى سال على الكراسات
والدم كان بدل الغموس فى العيش
نفس اعيش مرتاح وانا بانطق نعم
واعمى عينى عن شباب
اتكسروا من نفس كلمه
اه موافق
بعد ماعملوها زفه فى المرافق
وكأنه كان حلم الغريب



رحله لمفيــــــــــــــــــــــــــــــــــــــــش

اه يا الف مراره جايه م اللى جاى
لما تبقى حروف نعم تقلب عدم
لما تبقى حروف نعم تخدم


سرابـــــــــــــــــــــــــــــــــــــ................................





 

عدى عليك العيد
والنهارده اخر الايام
كام مره يوم الوقفه
حسدت دبيحتك.......................

كام مره ساعة ما الدما
فرشت تراب الاسفلت
اتمنيت رقبتك
تبقى جوه المقصله

تفتكر دا يبقى معنى الانتحار
ولا معنى جديد قريته فى الكتاب

هو ايه معنى العذاب ؟

غير تكون حبة ورق

م الميلاد...........
.
.
.
.
.
.
.
للممااااااااااااااااااااات

غير تذاكر للدخول

كلها حبة ورق

والكريم فى كل ده

ان جسمك مستخبى
بين حيطان
وان داخل جوه منك

جسم محتاج للكتير

برضه محتاج للورق
علشان يعيش

وليد..... خوفو
____________________________
انا المصرى بطعم القمح
خارج من تنايا خوفو
داخل فى رحم كليو باترا
انا المصرى غيطان القطن
بالكتره
انا الخيطان وانا الحيطان
وانا الدوبان فى عشق الاهرامات
درويش

انا الطوبه اللى شاطها الطفل
وقت الطيش
انا العتره اللى قدم نفسه
يوم للجيش
انا المصرى اللى عجن الصبر
فى اللقمه
انا المصرى اللى حضن الهم بالهمه
انا المصرى اللى باس ايده فى وقت مافيش
وقال نعمه
وانا الطيبه فى وقت الدنيا ماتبقى
شاده ريحها ع الاخر
وانا الباكى وانا الساخر
ولما المحنه اكلت جوفى
كلت عليها ملح وصبر
انا المصرى اللى فى الايواآت
انا المصرى سكنت القبر
ورغم كل دا راضى
مشعلق همتى ف باطى
قتيل الذكر والحضره
وعاشق ستنا زينب
وحابب ستنا مريم
مدد يا كل اهل الله
انا حابب انا دايب انا مطموس
انا مفنى
انا فى حبكم معرفش كلمة اه
مدد يا كل العارفين بالله
تفكوا همى بالفاتحه
واشوف النور طيور سارحه
على عشى
دانا المصرى

جانى الوقت اللى هاقولك ابعد ومالكش مكان
بعد ماكنت عشانك باضعف واديك كل امان
كتر خير الدنيا وكتر خيرى معاك باتحمل
مره بتقسى على ومرات تجرحنى من الاول
وانت الوقتى ف عزك مش عارف تعمل ايه
دا يا مستكتر دا الزمن اكتر هو بقى اللى يكمل
*********
مش بايديه اعيش فى الدنيا بقلب يحب ويكره
ولا فى ايديه اعيش بنى ادم عاش محكوم بالذكرى
كل مشاعرى معاك كانت بتضيع فى اليوم ايام
وانت فاكرنى عايشلك علشان تحكم تنهى وتكره


كتر خير الدنيا وكتر خيرى معاك باتحمل
مره بتقسى على ومرات تجرحنى من الاول
وانت الوقتى ف عزك مش عارف تعمل ايه
دا يا مستكتر دا الزمن اكتر هو بقى اللى يكمل

امضغ غضبك
وابلع صبرك
مهما تزعق او تتعافى
ديتك طلقه بشلن
ديتك صوره ف ميدان
ديتك كام الف اهيف
يبعتوهم يوم لاهلك
كل شئ هايروح لحاله
والسؤال يبقى
يعلق قلب كل السائلين
مين قتل؟؟؟؟
اللى فى السجن
برئ
واللى بره السجن
معجون بالبرائه
والقانون معرفش
حرقة قلب ام
ولا اب داق المر من سلسال كعانه
كله على بيدور على حاله
المحامى بده يقنع كل ناسه
انه مافيش حد زيه
والنيابه زيه برضه
والادله كلها متبعزقه
كله مظلوم
كله كان للحب يخدم
كل دا هايروح لحاله
والسؤال يبقى
يعلق قلب كل السائلين
مين قتل؟؟؟؟؟؟؟؟؟؟؟
اللى مات نفسه يعرف
هو مات على ايد شيطان
ولا مات على ايد بتخدم
ايد فى نفس المسأله
ولا كان ملح لاراضى
طينها محتاج للسقايه
ولا كان ولا كان
كل دا معجون فى دايرة الرحايا
كل دا مطحون
كل دا مسجون جنون
والبراءه
للى عاوزين البراءه
الف شباك الف طاقه اتمعجنت
ضلمه بنور
كل دا هايروح لحاله
والسؤال يبقى
يعلق قلب كل السائلين
مين قتل؟؟؟؟؟؟؟؟؟؟؟؟؟؟

ومنين اجيب ناس لمعناة الكلام
عارفين
ياما ظلم فى الناس حكام كتير
عارفين
الليل بطوله هجم
صرخت ولايا الدار
للخوف بقم
عارفين
حش ف غيطان الارض
وحكى بطول السرد
ملقاش امامه رد
هبت حيطان البنا
عارفين تمام عارفين
كان بين ليالى القسى
شموسه مخفيه
باينه لناس فى الدرى
كانوا تمام عارفين
ان الليالى بقت
غوله وطالها العجز
تترجى من ربها
دفنه ف سواد الطين
هب النهار واقف
فرحان ومش خايف
على صحبته لايف
سايق حصان حطين
سلم حصان السبق
للى دفع مهره
وقاله خد يا فتى
اركب قوام ضهره
ركب الفتى ثاير
دم الرجال فاير
متربى ف عروقه
هو ولا غيره
عارف تمام سوقه
كان الفتى حمدين
ملو السمع والعين
مين نرضى غيره مين
يزعق نقول حاضر
اخضر يا عود ناضر
حمدين يا وش النهار
خلى النهار صاحى
لمع سيوف العمل
احيي حروف الامال
صبرك فى سنم الجمال
ان الاوان يطلع
حضن الدفى يوسع
ويأكل الفقرا
ينزعها م النقره
ياطالع الشجره
ابعت لاخويا سلام
وقوله من بكره
ماعادش فيه احلام
وقول لدم الشهيد
ارتاح فى ضلايتك
وعيش فى سهرايتك
للصبح صباحى
يا طالع الشجره
خلى النهار صاحى
دالليل مالهوش مكان
ومابينا صباحى

احنا مالنا ومال ابونا

لما جينا نشوف دماغهم

لفلفونا ودوخونا

احنا مالنا ومال ابونا

هوبا هوبا

اسلاميه اسلاميه

هى احلى واغلى موضه

كله فى الدنيا لزاما

قالوا لا لنقطه سودا

مجلس الشعب لزاما

اسلاميه اسلاميه

مجلس الشورى تباعا

اسلاميه اسلاميه

مجلس الاباء بيهتف

اسلاميه اسلاميه

اتلاقينا الرمل ربى لحيته

والسما لبست نقاب

هما دول رمز الحمايه

م الخيانه والضباب

حبه حبه

رجعت الثوره تغنى

6 ابريل اللى خاينه

لابسه طرحه وجزمه بنى

اللى باعوا وقبضوا فيكى

للخراب

اخدوا البراءه

ماحنا لو يوم اختلفنا

او عرفنا ان اللى باعك

اصله مصرى فى البطاقه

واللى صورناه بيرسم للهدف

احنا برضه بنعفى عما كان سلف

دول ولادنا الثورجيه

ليبراليه علمانيه

ماركسيه مهلبيه

هما ورد الجناين

ضد اى رجال بتهتف

اسلاميه اسلاميه

انتوا ليه بتدوخونا

احنا مالنا ومال ابونا

يبقى لعب لماتش كوره

ف بورسعيد

تقلبوه ماتش الجزاير

يوم مالعبوا ف برشلونه

لخبطات

بونبونى محشى ملبسات

سك اى ملابسات

ع القهاوى

بالجاتونه

والجاتونه رمز اصغر للكوبون

دى الحكومه مدلعانا

دوخت ميتين ابونا

احنا مالنا ومال ابونا

يقلبوها اسلاميه

يقلبوها ليبراليه

مره نلبس فى العمامه

مره نلبس سلطانيه

والحمايه دستوريه

والوصايه مسئوليه

وانتوا مش هاتعلمونا

يعنى ايه معنى القضيه

احنا عارفين من زمان

فى الحروب والالتزام

وانتوا لسه صغيرين

مربوطين بلاحترام

قول يا عمى سيبنا منهم

دانتوا يوم ماتدوخونا

يبقى مالنا ومال ابونا

واحنا مالنا ومال ابونا

عيش فى الدنيا
حر
اوعى تدوق
المر
تقعد ع الدبابيس
اوعى تحس
ان انت ف لحظه
طير وف قفصه حبيس
اوعى تعيش الوهم
ليوم
ربك خلقك حر
تدوم
اخلع كل مافيك
واتعرى
كتر هدومك موت
ومذله.
عيش
ف الدنيا كأنك
ريش
ومغطى الكون
مايكون
حواليك رابط دراعينه
فك ايدينه
وفوت
حب بعلو الصوت
فوقك شجرة توت
ومعشش فيها
حلم الناس
حب بكل
حماس
حلمك يابن الناس
رابطه ملايكه
عدوا حدود السلك
الشايكه
باسوا ايديك
تتحرر
اوعى تقرر
انك لحظه
سلسل حلمك
قوت
فك قيودك
شوط
عدى بحور
الموت
لو يوم غطاك فرش لغيرك
قيد سيرك
عيد
نسج حسابك
فتح بابك
تلقى جديد
عيش ف الدنيا
سعيد
احضن قلب التين
واعشق زغلولتين
طاروا قبل مايعرفوا
ايه معنى الطيران
أخلع كل مافيك
واتعرى
كتر هدومك موت
ومذله.
عيش

ولسه ياما نتعود على الفرقه
ونكره فى اللقا ساعة مابنشوفه
نخاف دمعتنا تسرقنا وف السرقه
ندور قد ايه ضاعت خطا حروفه
ونسال ع اللى راح منا وعارفينه
نلاقى جراح وسابت قلبنا نازف
يجاوبنا الخيال ع اللى احنا شايفينه
يسيب الحلق باكى م العطش ناشف
ايا صبار ومت بقلة الميه
خطا العطشان تنادى عليك وماتردش
سنين ف سنين وتعطش تشرب الرمله
وف الرمله شروق ف غروب وماتعدش
ننام الليل ونحلم بالكابوس طابق
على كتافنا ولاحم شره فى عروقنا
نحاول نصحى واللحظه ماتسعفناش
وروحنا تروح مع الموته كده ببلاش
وننسى اننا اصلا
فى وسط النومه ماحلمناش
ونسأل نفسنا يوما
اذا احنا نمنا ؟
مانلقاش
غير الرد اللى معروفه كتاباته
ورابط بالقسى باطه
يقول بالحق
مانمناش

واحنا صغار
بين البيوت لعبة بيوت
كانت لنا
واما كبرنا حلمنا
عش يضمنا
فين كان زمان
لما الزمان لمم حطانه
وحط بينا حيطه سد
فين الشوارع
لما كانت واقفه تتفرج عليه
واحنا مابين دا
ودا
فضلنا نكبر
حتى على لعبة بيوت
______________________
من بين عناقيد العنب
وقت الطروح
ياما سرحنا بحلمنا
واتمنيناه
قطفه فى موسم جنى
مش ممكن تروح
من فكرنا

فاكره الغيطان
ولا الغيطان
نامت مكان الحيطه
وقت ماكان زماننا بيبنى فيها
حيطه سد
وقت اما بنتولد ايدتين ف بعض
كان دا زمان
لما الزمان محى كل شئ
من حلمنا
وقت الشوارع لما كانت واقفه تتفرج عليه
كنا احنا فين فى الوقت دا
فضلنا نكبر حتى على لعبة بيوت

اتوه فى العتمه
واتلاقى على شمعه
افوت ف دموعها
وانسى انى كنت حزين
افكر ان نار الشمعه حرقتها
وافكر ان نارى ملسعتنيش
امد كفوفى واطبطب على راسها
وانسى ان نارها القاسيه دى راسها
افوق محروق ولكنى
احس انى باشيل الهم من راسها

لما لقانى الحلم ماصعبتش عليه
زودنى حلم فى حلم مارحمنيش
ركبنى فوق ضهر السحابه فوق
ونزل بى تحت لحد سابع ارض.
انا ايه حصلى وايه جرالى يا ناس
حسيت بانه ماكانش حلم وباس
كعب الحنين
للجدر لما بيحضن الطينه
ويسيب كيانه فى السواد
ويبص فوق عناقيد
على ايه يا حلم بتحضن النومه
مش عارف انك تنتهى بقومه
م الفرش تحت الدش تتلاشى
وتدوب ف طبق الفول
فطار الصبح

(اذا الشعب يوما اراد الحياه
فلابد ان يستجيب القدر)
اذا الشعب كان حلمه لقمه فى عيش
ويملا جناحاته بسندس وريش
عشان يوم يساوى ويعرف يعيش
فلابد ان يعرف ان الحياه
تمنها فى روحه ونزفة جروحه
وطنها فى بوحه لصرخة
وقيام
اذا السلطانيه بقت للرعاع
وخلت بدنهم
مزاد للى باع
فلابد تعرف بانك بتاع
بتخدم كروش ساحبه جيشها تباع
اذا زاد وغطى علينا المرار
وسود بليلنا سبايك نهار
ولخبط سياسته بذل وعار
فلابد تعرف بانك رخيص
حياتك رميتها
فى حضن الخسيس
وضحيت بعمرك قتلت الونيس
لا طولت الوصايه ولا نولت قاع
اذا الشعب يوما اراد العفاف
وداوم فى حبه على الاعتكاف
فلابد انه لا يمكن يخاف
ويزعق بصوته فى وش الصراع
اذا الظلم سقف لكلمة ضياع
وسجل بقلمه فدا الانصياع
فلابد نكسر نيابه ونعلى
فى وش اللى عاشوا بقلب الضباع

لسه فيكى قلب طيب
لسه فيكى عين بتضحك
لسه أملك فجر باين
من ليالى الشين بيطلع
جوه نار الحرق يجمع
كلمه بتقولك بحبك
لسه سمرا زى مانتى
عشق عاشق مش كلام
جوه احضانك ينام
يصحى على تحرير كيانه
م الحيطان
يكسر الحاجز يعيش
ينزل الشارع يحبك
يطلع العمدان ينور
قلبه شوق
للمحتاجين
مين يقولك يوم يا سمره
ان شعبك يوم سجين
داحنا لو جوه السجون
كلنا ولاحد بره
نسمع الهون فى السبوع
يتولد ابنك ويشبع
يتولد من صغره يرضع
من نهودك سلسبيل
حزننا يرتاح ويرجع
فجر يمحى اى ليل
لو فلول الدنيا حبت
تخربك يا شهرذاد
تفضلى انتى يا غاليه
عاليه فوق كل البعاد
يتوئد حلم الابالسه
يتمحى لو حتى لسه
فكرهم عشش سواد
داحنا ليكى مخلصين
مهما طالت السنين
برضه ليكى مخلصين
وانتى بتحبينا دايما
واحنا بيكى معديين
بر لسه يومه جى
فجره طالع قلبه ضى
عشقه زينه للبيوت
حبه مالى كل حى
يا حبيبة قلب كل
العاشقين
مصر يا مه يا موانى الخير بتسعى
لجل تطرح زارعين
يبدروا بذره محبه
يحصدوا الخير للاحبه
يتولد فى القلب حبه
تتعقد ايدتين فى حبك
مايسيبوش ليلك حزين

ولحد امتى
هاستنى منك
انك تكون حاسس
بقلب يكون ف يوم
سلم عليك
وعاش عشانك
عمر ماقدرتش عليه

انا صابره بس عشان
عرفت انى بحبك
وقلبى حس
من لون عينيك
انه فى قربك

ماتعزينيش
متعوده
على القسيه وع البعاد
ماتعزينيش
متعوده اشتاق لبعدك
ف البلاد


اسمى الجديد اللى كتبته
فى الدفاتر والصور
عاشقه بجنون
حتى لو انت بعدت
هاستحمل سفر


دور كده؟
لو يوم لقيت
حد يحبك يحبك زيي انا
هاديك امان البعد عنى
عشان تحبه
زى ما با حبك انا


كتير كتير
كنت بتتمنى انك تلاقى حد تانى
يحكيلك اللى حكيته ليك
بس انت لسه
مالقتش حد
ماوصلش رد
يوفى كل اللى حكيته من زمان
ماوصلش رد
يحسسك زى ماحسستك زمان
يادى الامان
اخدته منى
وشوفت منك يوم حنان


ارجع بقى
مستنياك
ارجع بقى لحظه لقاك
بيها اللى هانسى
انك بعيد
ارجع بقى

بعد كل الحلم اللى حلمته ليك
صدقته فيك
جاى تقولى بقت حياتك بى
اكبر مشكله
هانتهى من ذكرياتك
حتى من نظرة عينيه
انا هابعدك


مش بوعدك
لاكن هاحاول مافتكرش
اللى سميته فى كلامك
اسم حب

اصل قلبى مش بيجى
كل شهر
وينتهى
دانت لو حسيت بقلبى
لحظتين

كنت فى الحب هاتبدأ تبتدى

مستحيل تبقى جنبى
وحد غيرى يلمسك
داحنا ياما كنا كلمة
مش كلام
ممكن يكون
بين سطور
وهايتمحى

اعتذر
من هنا لسنين طويله
شوفلى حاجه تانيه
غير القلب ممكن
يوم يسامحك
حاجه تانيه بس ماعاشتش
الا جنبك

وماشوفتهاش
حاجه ماتعرفش مين فينا اللى باع
ولا تعرف!
تفتكر يومها هاتفرق لومعاك
تفتكر لو يوم قالتلك يا ملاك
وانت لو صدقتها
تفتكر هاتكون ساعتها مصدقاك
ولا بتقولها عشانها عرفتك

كل اللى بينا
خطوتين مالهومش غير
خطوتين
تاهو من غير خط سير
مش هاقول الحب كان
ولاّ كان دا من زمان
مش هاقول غير انه طير
طار ماعشش ف مكان


يا خريف ليه بتيجى
واحنا ليه مابنطلبكش
بس لما تيجى ترحل
تقلب الاحلام لغش
مستحيل كل الامانى
مستحيل مابتتوجدش
بس ليه مع قلب طيب
انت ليه بمية الف وش


اللى بينا
كانوا فى الحواديت يقولوا
على اللى بينا
يحكوا لما ف يوم قابلنا
الحب ضحكه
واتقابلنا
بس لسه حكاية النسيان
فى ليلهم ماتحكتش

يحكوا ايه
واحنا كل اللى مابينا
خطوتين مالهومش غير
تاهوا من غير خط سير
مش هاقول الحب كان
ولا كان دا من زمان
مش هاقول غير انه طير
طار ماعشش ف مكان

راحت حياة الابريا
ولا عادتش فاضل منهم
غير دبلتين
حتى الايدين رجعت
تدور ع الايدين
راحت حلاوة ضحكة
الشمس
مابينهم
وقت لون الصبح ماكان
فاكرهم
هو دا معنى الرحيل؟
ترحل البسمه
من الشفه اللى قالت يوم بحبك
تقسم الكلمه ل باحزن
ولا با تمنى اموت
هو دا معنى السكوت؟
معنى ان الكلمه تفضل
بين تابوت
واقفه عاجزه
بعد نزعة روح حبايب
من ضلوعها

ارجوك بلاش
لسه اللى بيننا
مانتهاش
لو يوم هاتنزل دمعتك
علشان ترجع ضحكتك
دمع بعيد
وانا هاعمل انى ماشوفتهاش
________________
انا فى الحاجات دى ماليش مكان
ولا دموعك
اقدر انى ابعدها عنك
ولا هاطوعك انى اشوفها
يوم بتنزل مره منك
ابعد بعيد
دمع بعيد
سافر وجرب غربتك
بس اما ترجع
هاتلاقينى لسه شايلك
مكان

انا اللى كنت عاصى
والذنوب مغرقانى
مقضى الدنيا رحله
وكنت فيها انا انانى

ياما قسيت على ناس حبونى
ياما فى احضانهم خبونى
واما لقيت الدنيا بتضحك
دوست عليهم كنت الجانى
ياما صاحبت الناس الوحشه
روحت لعالم قاسيه ووحشه
واما لقيت القلب الطيب
روحت مصدر ليه الطارشه
بعت الصاحب بعت الناس
كنت غريب من غير احساس
واما لجأت لصاحبى ظلمته
وهو عاملى الخد مداس
وماقولتش دا عيب وحرام
عيشت العمر بطوله حرام
واللى نصحنى ضحكت عليه
قولت يا عم كفايه كلام
دارت الدنيا ولفت بى
ولقتنى واقف وحديه
حتى صحاب السوء هجرونى
شوفت الدمعه بتجرح فى
قولت يارب ماليش الاانت
وماحدش يرحمنى الا انت
جايلك راكع جاى ذليل
وهاتغفرلى فى وقت الشده
ادى حكاية عاصى وتاب
بعد ما لف على الاعتاب
ظلم الدنيا وجرح نفسه
بعد مادوب فى الاكعاب

ضحيت هنايا هنايا وممكن ادفع بالدولار

هاتسيب كل الحكايه هاقول ياقاسى البعد نار

متشكرين على القسيه وميه ميه بيس

وعادى ومش هابيعك عمرى ما كنت معاك خسيس

دانا ليك يا واد بجد

دانا ليك مش اى حد

تخاصمنى الف الف مره واصالحك الخميس

فى كل يومين حكايه كايه والف ميت سؤال

ماتهدى اللعب لالالا مش قدام العيال

مش اتفاقنا ياما قولنا فيه وعيدنا فيه

مابلاش اقولك على بينا وخلينى مخبيه

كاتم فى قلبى ساكت

متنكدين وساكت

اخرتها بتطردينى وتجرحينى فى الاميه

________________________________________________________________________

اسمع كلامك انتى الصبح اشوف اخر حكايه

اقول مراتى دى اللى لى وهى دى دوايا

اروح الشغل بدرى مظبط اطقطق فى الزبون

بدال مابيعله جبنه ابيعله لانشون بالزتون

واعيش الدنيا ورده

واقول للحب اهدى

اخش البيت لاالاقى فرحه ولا يحزنون

صبح الصباح ع الوطن

كتب التاريخ يازمن

فرعون قوام اتدفن

صبحه صبح مغرب

شاهد يا نجم السما

شاهده ياشموسه

بدأالغريب طبطبه

وبكلمه مهموسه

خلى ايدين الغبا

فى الدم مغموسه

دمك يا مصر حرام

مايكفى مناديلك

سال ع الاراضى البور

لون زراق نيلك

دانا مهما اعيد واقول

واشكى واحكيلك

طالع على الغول

بيحش من جيلك

خالد ياقطر الندى

عادل على الورده

بتقسم النقطه

ورده قصاد ورده

حكمه ماليش فيها

غير انى باحكيها

واسردها فى المواويل

الاوله بسمله

التانيه مكحله

التالته سمبله

واتفرعت تحرير

طلع الثمر سكر

قطفه بدون تكرير

اكله بدون ضمانات

واللى قطف زرعته

قلبه الحنين مات

رمى النبات ع الارض

هتك بايده العرض

عمل القساوه فرض

والسنه من دمنا

ياللى سرقت الحلم

نايم على سريرنا

واحنا اللى اصل الحلم

تاهت عناوينا

ايه ذنبنا ماتقول

انك تعيش مسطول

نايم تقوم بالطول

قاعد بتحصدنا

(وغلبنا نقطع تذاكر

وشبعنا ياااااااارب غربه)

من ليبيا لما القناطر

وفلوسنا راحت اوروبا

يا هل ترى بكره ترجع

ولا كلتها الخساره

زى ما اكلت ف قوتنا

ماسابتليناش غير عصاره

باقيلنا ايه غير بيوتنا

تتحامى فيها البداره

تغسل سنينا ف بياضها

تاره قصاد الف غاره

ومكملين رغم موتنا

رغم الفراق للعذارى