قلب البنات
بيساوي قلبي
مرتين
عشقك ساعات
بيساوي عشقك
بالسنين
سامحيني ماعرفتش
احبك من زمان
قدر المشاعر
كل وقت وله اوان
..........
هي السنين اللي
مشت
ولا دا ليل وف ليل
غلط
وقت العيون
والنظرتين
والقلب من بينهم
عشق
......
جايز مشاعر قلب
بتضل الطريق
تخطفنا واحنا
برئ بيحضن ايد
برئ
ترسم عيوننا الاسئله
والرد نفس الاسئله
بتحبها ولا إلى
حب اتوجد بين
الصديق واختار
صديق
.......
سامحيني ماعرفتش
احبك من زمان
قدر المشاعر
كل وقت وله اوان

نظرة عيونك
البناتي
عيطت من غير دموع
وانا قلبي لسه مصدقك
وف حضنه ترنيمه
يسوع
عشقي المصمم خطوته
تايه برئ  من شكوته
جسدي ياليل من قسوته
رافض لتفكير الرجوع
....
نفس العيون متصعبنه
وبدون عياط
تكتب مشاعر زي خيط
العنكبوت ابيض هزيل
وانا لسه منك باسمع
الصوت الهديل
يمكن عشان مارضيتش
اوجدلك بديل
شوفتك ف غاية الانبساط
.......
عشقي المصمم خطوته
تايه برئ  من شكوته
جسدي ياليل من قسوته
رافض لتفكير الرجوع
.......
ياورده كل ماتكبري
بتزيدي شوك
يانغمة كل ماباسمعك
يخطفني ليل ويقول
نسوك
عاوزاني اهرب م الحقيقة
وانتي صديقتي في الحقيقه
وف حلمي واقف اقول
لنفسي بيلعنوك
.......
عشقي المصمم خطوته
تايه برئ  من شكوته
جسدي ياليل من قسوته
رافض لتفكير الرجوع

انا كنت حاطط
ع القزاز
صوره وعصفور
اتولد
وعيوني صابحه
كبطن الام
دموعها ولاده
لساها فوق الصبيه
مضفره رموشها
يسلم ايدين اللي
رسم ننها ف وسط
حوش البياض
الكحل راسم
ع الحيطان
ممنوع بفعل الحضن
تبكي
ممنوع بفعل الدفا..
..
انا لسه كاتب ع
القزاز
المطره سر الحنان
والشاي في حزمة
شكوتك
توبه
تعالي بالجلابيه الوردي
والمنديل
خدتيني ساعة عصاري
مابين خدودك .
يسلم ايدين اللي
رسم تقسيمة الخدين
فوق الشفايف يركنوا
سكاري
مش بالعيون نرأي
دي النفس اماره
ناحية سمار الجبين
يا ضي عين السنين
هو القمر غايب؟
ولا الكسوف غطاه؟
مش شايف الا
المترو قدامي
وورايا يافطه هنا
كانت
يا شعر شاب ع التاريخ
حافظ ومش فاهم
دلوني انا ع الطريق
يمكن اكون شفته
اول ميدان سيدنا النبي
يرآه
اخر بيان الاوليا تكتب
وستنا الخضره والعدرا
ف الحكمه
كلمه بها المنقوص يكمل
ميتين كلمه
بلد السبايا والجواري
الكل مستنظر
شوف الخريطه
كل يوم منظر
ربك خلقها تشتهي
العتره
والعبره صابره
وكل شئ جايز
ملو القزايز
ريحة الجنه
تاخد هَنَا في الوريد
تفوق وتستعجب
البحر من خلفك
والكعبه بين شطين
سيدنا الحسين سيد
شباب الكون
قوام اخدتيه
ف حضنك يا بنت الايه
اما براوه ع النصيب
والفعل رباني
والختمه لو برهان
ما تعملي تاني
شي الله ابا العينين
نظره ومدد يا كبير
يابن الاكابر والاكابر
فعل
دايب انا في الصحن
يا سامعين
سيدي يا شيخ العرب
نظره ومدد ياما
والمرسي ابو العباس
حاطط هنا همي
يا خطوتي شبرين
والحب من دمي
سمي وشيل
البرئ
وصلي ع المصطفي
واركع وطوف واذكر
بكره اللي جاي اكتر
مدهون ومتقدر

يمكن تداري الاسئله
لحظة وجوده
واتمني ان الساعات
م الخوف تعدي
محتاجه اشوفه
بس قلبي مش
مصدق
وانا بين ايديه
بتداري من نظرة
عينيه
...
كانت دقايق كنت باتمناها
عمري
واتمني ان اليوم يشد اليوم
يعدي
ولما جينا واتقابلنا
الله عليه
رعشة ايديا ضيعت بيننا
الكلام
....
الناس بتحلم تصحي علي
يوم اللقا
وانا لما شفته ايه جرالي
بس ايه
قلبي ماصدقش انه هايشوفه
بقي
وقف  وماعرفتش اقوله
وقفت ليه
....
كان الكلام مستني يطلع
بس خايف
وهو حاسس بيا مطمن
وشايف
ساعاتها نظرة عيننا كانت
بيننا اقوي
قالت كلام عمره ما كنا
نحس بيه
..

كنت باغير
من بعدك عني
ومافيش حاجه
بتطمني
كنت بخاف لما
ابقي لوحدي
وانتي بعيد
...
حاسه بجد ؟
ماتكلمتيش
واما تردي
ماباسمعكيش
مانا ماملكش
غير القلب
بحبك مش محتاج
لكلام..
..
تبعدي وباستناكي
قلبي اللي خدتيه
معاكي
شايفه بيترجاكي
نسيب البعد
..
فاكره زمان
لما الامان
كان ليه مكان
ف وسطنا
روحتي انتي
فين
يانني عيني
وسيبتي حزن
يضمنا
...
حاسه بجد ؟
ماتكلمتيش
واما تردي
ماباسمعكيش
مانا ماملكش
غير القلب
بحبك مش محتاج
لكلام..

لساك بتحكي الذكريات
وكأنك انت ماخونتهاش
مستني مني امنعك؟
مستني مني اقول بلاش؟
تحكي وتكدب تنتهي
عارفه انك انت مش مصدق
جيت ف يوم وخونتني
خليك وخليني بعيد
عمري ماكنت معاك باعيد
وكفايه اني من جديد
هانسي اني كنت في يوم
معاك
..
كل اللي فات انساه فداك
زي اما تكسر اي شئ
بتحس انك يا الملاك
وانت اصلا مش برئ
..
صدق بإيه لو قولتلك
انك زمان كنت وخلصت
منا ياللي كنت ليك بحبك
ولكل حاجه فيك اخلصت
.
انا هاعتبرها م الصدف
لو كل من شافنا حلف
انك هاتتغير .
ماتتغير ..
لنفسك
ولا انت حنيت للرجوع
علشان تذل فيا نفسك
احكي لنفسك قبل
تقول ذكريات
قول كان فيه حبنا
ماضي ومات

بسم اللي شاف
الحلم بعيونه
وبسم اللي لسه
ضحكته نونو
ماتفرقوش الدنيا
ع الخدين
دمعات
وماتحرقوش الوقت
بحجة انه فات
دي الساعه فيها
كام من اللحظه
واللحظه تفرق
حي عن موته
فامتحرموش اللحظه
م الملكوت
ولا تحبسوش الحب
ف التوابيت
وان ليكوا حضن
وبيت
حبوا الحيطان
قبل اما
توحشكوا
واشكوا لطوب الارض
عن قلب يوم فارق
اصل البكي حراق
والفرح بيطيب
والعمر للاحزان
ليه تعكروه طيب؟
دا الكل متواعد
قبل الزمان ع الموت
لحظة ميلاد الفرض
لحظة ثبات الارض
والطول موازي العرض
ليه ماتعملوش
طيب.؟

على ما انتهيت
كان البكي
خلص حيطان
الامكنه لوحات
بكره اللي جاي
ممكن يكون
حَبَك
طب ليه نفوت
المحتارين
ولا يحلموا
وليه نناجي
الحزانى...
فرجت قوي
فاكر اما كنا
مكملين
نظره وحنين
فاكر سوا كل
الشوارع
(شتاء 1997)
وحدي ف عز البرد
لا بس بلوفر
والشتا زي الرصاص
ماتفكريش في البعد
واسمع انينك رعد
واتدارى.
(شتاء 1998)
بدء ابتداء الخوف
ف عز الاشتياق
للوحده وسط
البشر اللي مش
مني
قدين علي سني
وقد اكبر
هو البعيد سكير
ولا العيون تِسكر
حبيتها زي ماهي
هي اللي كانت
في البنات حبي
وانا اللي كنت
عينيها لما فتحت
ع الكون..
(شتاء1999)
فاكرك برغم البعد
لسه عينيا
 ما انتهيتش
ومش بخاف من العدم
ولا من فراقك
ولا من خيانة عيني
للحيطان الالم
قولت ابتعد
لاكن عينيا قالتلي
لا..
اما بحق
انا كنت لسه هاسألك
قد الوداع
ولا احنا لسه عيال
قوي
(شتاء2000)
يارب انا لسه
الشقاوه
ف طبعنا
ودموع ونشفت
مستخسر الليل
الحزين
اما الحزينه
فهي مين هايحبها
قدي
(شتاء2001)
من تحت بيت
قلبي
لمت ودخلت
كان نفسها تحكي
لاكني ما بصيت
نظرة عيونها
المستحيله
خدعتها دمعتها
اما الكلام ما ابخله
ماطلعش من دمعي
عديت سنين
بعدها
راحت ما بصيتش
وانا اللي كنت الوحيد
من يوم ما حبيتها
وهي صادقه قوي
وانا اللي كان بالقوي
دمعاتي بتخوني
اما براءه سجنها
المعهود
وصمتني بالسابق
مر السوابق طعمه
علقم
والحنين للماضي
سم
وكفري بال موجود
ندم
وفعلي بالمعهود
آثام
انا اللي كنت بحبها
غمضت عيني
بعيد