كلُنا واللذَّات.
ساعات نتشاقى
ولا ساعات
بتموت 
حاجات فينا اسمها 
إنسان.
شقاوة عُمرِك المعدوده
على كفى 
خمس شقاوات
وفاضل منهم واحد
وبص عليكى واستندل
اخى المرسل اليه
قلب البنات البكر
ياريت تتأخر الليله
عن المرايات
وشوف نفسك
اكيد نُص اللى كانوا 
زمان 
قصاد لِركان
بيتباعدوا 
أكيد منهم كتير قعدوا
ف كام ذكرى..
حبيبة قلبك النونو
خلاص كبرت
واخر دبدوبين طلعوا
كمان لله
يا ألف سلامه ع اللى 
تاه ولا ردِّش
ماتتخضِّش .
هى الأيام تُرسِلنا 
ميتين مَره ف يوم 
واحد
الى حيثُ القرارُ المر
ويبقى الكون 
جرافيتى
ساعات تندهنى حواديتى
واقول مش جاى 
الاقى الليل كاسات البُن
مابانامشى
ولا بامشى 
ولا رمشى 
بيستعطف سواد عينه
عشان دمعه
ساعات باشتاق ليوم 
جامعه ماعيشتش فيه
أيا غلبان أيا عيِّل
يدوب كتفك
ربطته حزام ف كراريسك
اشوف فيك يوم 
ماتتلاقى ببنت الحب
تندهلك ..
رأيتُ النَجمُ فى الإسراء
يُحَاوِرُنِى
صحيح يابنى القمر 
عدَّى وماتكلِمش؟
طب والعدرا لما تهِل
هابقى احكيلها 
عن حالى....
ياكام ظهرت ولا 
اتلاقيناش
صحيح نتاش
تخصص يجرى ويطنش
صحيح دراويش....
جعان العيش 
بيحلم بالغموس 
ان شالله ياكله 
نَىِّ
مدد أخضر وتوب أخضر
على شالها 
ورسمالى الحنين ليها
معاك سلامات؟
حبيبك مات
بتبكى ليه؟
على اللى فات
ماتيجى نكسر المرايات
ونتشاقى يومين 
لذات
انا ماعييش 
جعان العيش خلاص 
روح ولا اتعشاش
وراحت منك النفحه
يا ميت مرحا
على اللى ماجاش 
وتقرأ ُفى دواوينك
بساطُ الليلةُ الاولى 
من الالفيةِ الخامسه
على الفاتحه 
وتختم ف صلواتك
فَتَشْهَدُ لَك .
ملائكة السما السابعه
على الرابعه
دخلت الجنه بالشفعه
هنِيئَا لَك......