شهادة ميلاد
________________________
تعدى الدنيا
وتلفلفنا دراعتها
وتطوينا فى كومة قش
انا ماقدرش انى انساكى
ولا انسى اللى عيشته زمان
يا دنيا ليه ماكانليش
م الصحاب انسان
ولا فى الارض دى عنوان
غير انى ابات على الكورنيش
وقرب المينا ماتمناش
غير انى اكتب فى طرح البحر عنوانى
هناك اول حبيب جانى
عرفت انا قد ايه قيسك
سافرت الجربى مالقيتش اللى كان فيكى
ولا قشه فى سوق ستوته كفتنى
اكون مملوك لرجليكى
واكون صعلوك ودايب فى تراب الافرنج
انا بيكى رسمت القلب توفيقى
ولطفى شباره تلاتينى
اعيش ف بازاره سلاطينى
بازار عباس
يا بنت الناس
بنتواعد بدبله ف قلب سردينه
شبكها الصيادين تاره
وتاره شواها فرن البط ماتحرقتش
وكانت فى الصجان مداد
ماتملكش ولا عداد سنين الرحله
فى الاوتوبيس
دانا من بنما لما لكسرى عديتك
ومريت ع الزهور بيتك
ماشوفتش حنه ولا رقصه
ف قلب المنطقه الخامسه
قفلت على بالمتاريس
وانا ياللى بدأت عريس
عريس من يومى يا مايه
لاطال فى زمانى ضحكايه
ولا اتبلت شفايفى مى
خانوكى مساكين الرى
وباعوا فيكى بالفدادين
لا طولت الفرش
والقرش اللى لميته
كلت فيه الليالى الشين
لامتى هاقول انا ف ضل الحميدى مشيت
لاطولت التركى
الا من بقايا خرق الاستثمار
وهو الاصل من طينى
وبالقنطار خدوه منى
سابونى الحس سكاكينى
على الفاضى
تعبت خلاص وانا راضى
ومين يقدر يكون عرقان
وعرقه ماشافش قوت يومه
وقوت يومه خدوه ف مزاد
الا ؤنا الا دوى الا تريه
خلاص خلصت يا افنديه
ورسيت ع اللى دفع اكتر
اهين م الحسره
على عملته يا ناصر
واهتين للى جه بعدك
خواسر دايبه فى خواسر
لكنك فى الجبين مكتوب
اه يا محبوب انا مشتاق
تغيتنا من خطا الشناق
قدرنا نكون من العشاق
ونتفرق
ونرجع تانى نتفرق
لغايه عضمنا ما راح
نعيش الدنيا فض مجالس
ونخرج منها
شفى جراح
