انا المصرى كريم العنصرين
العيش والملح
وطحين الشمس المعجون
باللقمه الدايبه ف طبق الصبر
انا ابويا مصبر جدى ف قلب القبر
وانا حلقى مصبر جوفى بطعم التمر
والتمر داسوه البوم بالجزم السمره
فى قلب الطين
انا من عناقيدى باصبر امى ف قلب الضلمه
وباقولك يامه الجو هايصفى ومش هايدوم
الجو سواد والعتمه مزاد يتزايدوا عليه ويبيعوا
الجسم المبنى عليه التكوين
انا مصرى باقول للعالم ايوه انا اهو
انا ثوره ولسه ماجتش هاتيجيى اوان
وربيعى هايرجع مالى الدنيا ف كل مكان
ولا هايهمنى ولا شوم ولا بوم ولا جزمة جيش
ولا حكم العكسر هايهزنى وبصوتى هاعيش
وتعيشى يا مصر بالف سلامه وخير وامان
لايهمك عسكر م المماليك ولا 100 سجان
لايهمك خوف اللى بيتحاموا فى قلب الحيط
وف قلب الزيطه بيتغنو ا باسمك يا بلاد
واللى فى زنازين الراحه ومش حاسين
وكأن السجن اتفصل من دون الزنازين
لجل اما يشموا نفسهم واحنا نموت
وبعلو الصوت
انا باصرخ وياريت اللى يحس يعيش
بالقلب اللى سحلتوه يا جنود الجيش
ايه ذنبه اذا كان
رايح بيداوى الورد من التقليم
شيطان اللى بيخرس فى لساننا ليوم الدين
شيطان اللى بيحرق فى نبات التين
عميان اللى يموت غصن الزيتون
ويفرق ناسه كلاب الغابه على الاراضين
راضيين؟
يا شعوب العالم ياللى ناديتم بلانسان
يرضيكوا الحر فى زمنه يهان
ويفرق جسمه على الاوطان
يرضيكوا يموت ؟
يرضيكوا يشوف النور فى تابوت
ولا يتكلمش؟
ليست هناك تعليقات:
إرسال تعليق