انا باقى منى ايه
غير خطوتين
من زحمة المشاوير
دلينى يا سفينتى
مين اللى كان سجان
مين اصبح السجان
مين اتولد انسان
مين اللى مش انسان
رغم انه فى البنيان
يشبه ملامحنا
يشبه خطاوينا
لكنه من ريحنا
بيخاف على روحه
م الكسره فى طموحه
انا باقى منى ايه
غير قلب
فى العتمه
غير حرف ف الكلمه
غير لحن فى المأساه
انا باقى منى ايه
غير نقطتين من دم
وقعوا على ورقك
خطوكى وانا باحلم
اول خطا السلم
وسابوكى مش عارفين
انك خلاص دوبتى
من السيول بوشتى
لا بطانيه دفت
ولا الحطان لمتك
ولا م البعاد طيبتى
انا باقى منى ايه
غير عضمتين فى الكيس
غير طفل متعبى
ف شوال ومتخبى
فى الزحمه ملكوته
حاضن رغيف قوته
فى علبة المناديل
المليانين بالبكا
على فراق لمته
انا باقى منى ايه
غير طفله بتعيط
قبل ماتكلم
مش عارفه توصل حرف
ف حرف وتقولى
ابويا كان ضلى
واخواتى فاضلينلى
لا كنهم اشلاء
من غيبة الضله
من حرقة الشموسه
كل صباح
انا باقى منى ايه
غير دبلتين فى يمين
لاكن مصيرهم ايه
بعد الفراق والتيه
صبح اليمين بالنص
وكل حاجه نص
مكتوب على اعتابه
لاتدخل الاسره
لا للنبات فى الارض
لا للجموع
لا للرجوع للاصل
انا باقى منى ايه
غير الدما فى النصل
غير الفراق بالفرض
غير انتهاك العرض
غير الحنين للغير
عشانه يحمينى
اه يا زمن طينى
خدته على اجزاء
وماسيبتليش منه
حاجه اتولد بيها
تستنى منى ايه
وانا من اراضيها
توهت من الدوده
علشان ماتمسكنيش
انا باقى منى ايه غير
نتفتين فى الريش
غير ضربتين م الجيش
علشان يصحونى
وافوق على الاسفلت
وابوس كعاب رجلك
والدم غطانى
انا باقى منى ايه بعد
اما اموت تانى
غير اتدفن بالحيا
غير الدموع من غير خشى
غير الركوع
غير السجود
غير انى اموت
والجَلد مايموتشى
انا باقى منى ايه
غير دايرة اختلافات
مربوطه باتلافات
بتفرق اللقمه
مش قابله بالقسمه
بتحرم النسمه
على العرق ينشف
انا باقى منى ايه
غير بعترة اشلاء
غير الرصاص فى الضهر
غير البكى فى القهر
غير انى مش هانحنى
بالشومه على راسى
غير نبض احساسى
تايه فى عربيتك
مليانه بالعسكر
بتفرق البعتره
على جسمى سجاده
انا باقى منى ايه
غير صمتى كالعاده
مدفون وبزياده
بين صدادات الامن
وبرغم صغر السن
لاكن مارحمونيش
مع انهم دراويش
بيدوبوا فى الحضره
انا باقى منى ايه
غير قطمة الجذره
بتسد فيه الحلق
اصرخ واقول ياخلق
ولا حد يسمعنى
الا صدى صوتى
هو اللى متقدر انه
يكون فاهم
انه يكون لامم
حضنه بدراعينه
ليست هناك تعليقات:
إرسال تعليق