وجالك وش تراضينى؟
مش انتى اللى زمان ياما
رضيتى تكتبى اشلائى موت وانا حى؟
ماشوفتش ضى من شباكك اللى لغيرى نورتيه
وضحكتينى على نفسى
ضحكت وضحكتى طلعت من الهدمه بدون مسحوق
وانا اللى كان فيكى حقوق
صرختى وش ف مرايتى
وكسرتيها لخرايط
عشان مافرحش بالطله
واموت مفروق
طردتينى
وجيتى على م الاخر
واخر حاجه فحت وردم
امرتى العمر يتتاخر ويسقى الفاضى طين منقوع
وفرقتينى فى المولد ندور وشموع
ورحمه ونور على غيرى ولا نولتش من الرحمه غموس ولا تمر
وشيلتينى بالزمبيل بطوعى وامر
وخدتى اللحمه من فخدى عشان تتباهى وسط الناس
وشنطه للغذا منى وناس بتربى لحم كتاف
ماحدش شاف كده ابدا
ولا وردت فى اى كتاب
واموت وانداس وانا حيا
وافرق جسمى ع الاعتاب
عشان آكل
عشان اتدفى فى تبته
واتزاحم مع العته وبرضه انداس
ماشوفتش يوم طمر فيكى سنين الخدمه فى المشاوير
وانا اللى كنت يوم احلم بلون ضلك ف خط السير
ماشوفتش سير بطول سنى
ولا قلبك رحم سنى
وقولتى على انى ابنك
وعمرى ف يوم ماحسيت ان بطنك زى ماشالت
موانيكى حواريكى زروعك اللى صاروا يسدوا جوع الجدر بالعافيه
تشيل فيه
مارستى المعر بالغيه
وقومتى بدور مرات الاب فى الافلام
وخليتينى اقوم امسح بلاط سلاطينك اللى اصلهم خدام
لاكن نحتوا ف بنيانك
عشان المم يملا بطونهم المليانه من دمك
واخرتها يشوفوا الليل ورا القضبان
وهما برضه مظلومين
وعاشوا زينا ليلك
وقالوا عليكى (تيت امك)ما بين روحهم وبين ويلك
لغاية شعرهم ما شاخ
لغاية حكمهم ما باخ
لغاية صبرنا ماداخ
ودوخنا ف زواريقهم
هاقول سرقم هاقول نهبم هاقول كانوا من القطاع
هاقول انتى اللى فرقتى مابينا وقت تربيتك
عشان قولتلنا دا مالك ودا مملوك
ودا ريس ودا صعلوك
ودا هالك ودا مهلوك
حكمتى علينا بالظلمه وانا استنيتلك الحكمه
لقيتها عتمه ورا عتمه
ماشوفتش نور
قوليلى ايه فاكرهولك يبل الريق
يبل الجوف
يزيل الخوف
يبصرلى مدد للشوف
مابالقاشى
لاكنى بالتمسلك عذر واقول ياهل الله معذوره
عرايسك كتروا فى الحاره
ماميزتيش مابينهم يوم
وخدتيهم على عيبهم بخرق هدوم
عشانك رغم دا كله عضامك راضيه بالطيبه
كتبتى لنفسك الغيبه
وتوهتى مابين شقوق وشقوق
وسيبتى كل واحد فينا فى الرحله يموت مفروق على بابك
ونسيتينا
ونسيتى السنين نفسك
ولا رضيتى يكونلك يوم
رائعه تسلم كلماتك و احساسك و تسلم ايديك
ردحذفميرسى زيزى كتير ليكى
ردحذف