السما عينتين
والمطره بترسم
خد على  الارض
وتملاه دمعات
وانا فوق لاسفلت
اتبلت كل صوابع
ايدى .
الله يسامحك
وطلعت البيت
الدبله بتخدع مين
مرات ف شمال
ميات ف يمين
ومابين لاتنين
تختفى بنانيت
وولاد
عداد بيعد
ويرجع من اول
نقطه
ومافيش غلطه
لاء فيه نسيان
مالعمر خلاص
 مش مستحمل
ترقيع
انا كنت وكاين
وكانتلى
لما ابتسمتلى
وخدت الضحكه
وطيران
على
حب العمر....
شقيت التمر
يا بنى ادمين
وخلعت التوب
الرسمى
لمر الحزن
والاسم
كان واحد ضمن
اللى اتحطوا
ف البوم العيد
مش هابكى
دراما
ولا هاعمل اجزاء
من تانى
صدقت ان انا
صومت وصليت
وواربت الباب
تسقيفه لكل
اللى شافونى
ف اخر ركعه
وسابونى اكمل
تسابيحى
وهما مايدروش
ان انا اول ماسرحت
نسيت
بدال العجله
مابين رجلين البت
وعينى ف عينها
فغمزتلى
اه يابنت الايه
فاكرانى
اما عشانك
نطيت السور
ف الامتحانات
ساقط ثانويه
وكان نفسى
 اخش الكليه
 معاكى
اما الباكى
 اننا ع الدكه
بنرسم حلم
عروسه وعريس
تقرى الجرنان؟
بنك الاسكان
ووظايف خاليه
وكلمات
م ت ق ا ط ع ه
وحظى اليوم
متعان
من حلم قديم
كنت حلمته
ف حضن امى
وهى بتلعب بين
شعرى
ف حواديت
الكف
هانلف بجد؟
ونتشاقى
اوكيه
الدنيا بوكيه
ضحكتها طبيعى
بريحة الجد
صدق
حبيتها
ف اول يوم
انا قولتلها
وهى مافهمتش
طب ماتزعقش
هو انا زعقت؟
انا كنت باقولك
حبيتها من اول يوم
كتر خيرها
رسمتلى قلوب
وابتسملتى
امنت
 وانا
نمت