اصل السكات
يعمى الكلام
والمرمطه اصلا
حرام
يبقى السكوت
حلو الكلام
كل اللى جاى
 زى اللى راح
تفتكره ديق
 تلقاه براح
شمعت فتلة
خطوتى
وعجنت شوق
ف محبتى
جريت عليه
كل العيال.
الفرحه
 وياهم
وقت القمر
 ماينور اخضر
للنجوم
هما ثوانى ويتقفل
اشارات مرور الكون
تبوظ
قضيتها ف الدنيا
حظوظ
مانا جاى فلته
فى الزمان
اللى ارتشى
طعم الحياه
حطيت على
كل الحيطان
تاتش السنين
واهو كله ف الدنيا
مجرد لاستلاف
والاختلاف
شكل العطا
والرد يبقى مرمطه
على شكل ريش
بلياتشو كان حلمه
يضحك بنت ليل
مالقاش معاها
غير  فخاد
تحت الشجر
نفضلها وكمل
طريقه نكتتين
مع ضحكتين
ضحكت عليه.
..........
تحويشة العمر
الشقى
مالهاش لزوم
والصبر خيط
لو تغزله
مايكفى
 عمرك
حتى
خرق هدوم
هاتصوم عن المزه
التى فرشيتلك
الارضيه خيش
ولا تعيش
حد اما ضهرك
ينحنى.
او تتنى وتندم
وتدروش....
مشمش وعيشت
حياتى خدامه
وفرطت خرزات
 سبحتى
زهر وقواشيط
 ع القهاوى
 السرس
والعمر ترس يلف
ترس
اما اتهرست
 تراب
لعبة عذاب
يلعبها ناس خايفه
مابتحبش
طنش وسيبك
دى الحكم
ماتت
والمحسوبين
 ع المصمصه
ياما
يامه الهوى يلطش
يابنى وايه وداك
دى السكه محسوبه
ابيضها ضيه بلاك
اغسل وشوش الناس
وانا مين يوضينى
استنى ع الشباك
يطلع ف ميتينى
والشمس ماتزورنيش
يامه انا درويش
يابنى ملاك الريش
طاير على عشى
تحتى براح زايف
والله مانا خايف
وان جيت ف يوم
امشى
راح اسيب لكم
حواديت