وبرضه الفجر
بيسبح
على نجومه
نشوف يومنا
كما امبارح
نعيد الكره
مابترجعش
نهار لابس
وشوش عيره
بيصبغ شعره
كام مره
لحد الضهر يتوضى
وتظهر شيبته
ف الملكوت
يغيب الصوت
ونتكلم كلام بالعين
وحبيتها وحبيتنى
حيطان بيتها
تثبتنى
اموت جرافيتى
على بابها
ياعم انت اللى
 خضيتنى
علاج القلب
خلصته
لاخر بق
تبات الحيه
جوه الشق
مايموتشى
فارقت الضحكه
من وشى
طناش الشى
لحس مشى
وسابلى المر
بيجزع
وانا اللى فرحى
متوزع
على الشرانى
والطيب
تلات تتلات
ماليا تلت
فتحت الراديو
وقفلته
سمعت الرعد
ف ودانى
مكان الست
انا الواد
اللى كان بيقش
وكل الكل منى يكش
طقش طاقش
ف ليل طايش
وخد منى غنا
وشخاشيخ
انا اللى الحزن
انتيمى
انا بن الحظ من يومى
تقول ازاى
اقول لخبط لخابيطك
وماتركزش ف الزحمه
بلا تفكر بلا دياولو
وكله حط على كله
وكام تكاميل
حمدت الرب
وانا راضى
وزادنى حياه
طويله السكه
من بدرى
بقالى كتير انا باجرى
وتنهيده ف تنهيده
تمرمطنى تهد الحيل
ايا كفى
 ماترحمنى
دا كف الدنيا لطمنى
خدودى تبات
على جراحها
تبردها دموع عينى
لحد ماقربت
 تنشف
قلوب البنوتات
 صافيه
بتضحك ضحكتين
م القلب
عجز طبى
غلب غلبى
وهما اللى مداويه
ربيع الدنيا ف العيل
جسد طاهر وبيكمل
مكاننا كتير
خلاص الحق خد حقه
وحضن العمر مين زقه
ف كومة طين