الليل عجوز
حب القمر
مع انه كاتب
ع النجوم
حكم الغلابه
فى اى كون
بله وقربع ميته
وحدى ومرمطنى
الزمان
خبطنى على
 كل البيبان
مانا كنت واقف
فى الكلام
علمنى رغى
وسفسطه
سديت ودانى
وقولت اعيش
قضيت حياتى
ف اى طيش
يالله وطنش
بس تهبش
قبل ما تغيب
او تتوه
معتوهه سكة
حلمنا
على اى جرح
تلمنا
مايهمهاش
ان كان محشش
ولا ضارب
ولا ايه
حزنى يا بنت الايه
شراع
ثابت على مركب
ورق
ماتكلبيشيش
حلمك
يا هبله
ف حلم عدى
 واتسرق
كل العزيز مات
من زمان
والقبر طول عمره
كنز
طعم الحنين
دايما مزز
يرعشنا لما يجليلنا
على سهوه
ونمسك فيه يفوت
حوشت قوتى
من السكوت
تحويشة العمر
اللى جاى
شايف عجوز لابس
عريس
متاريس تعانق
وحدته
بينى وبينك
كوم عيال
والقطر بطل
نركبه
عدى ف سنينك
طب ودينك
حسى بالعمر
اللى فات
مش فاكره غير
كلمه بحبك
طب لمين
ماتكمليش
قفلت شيشك
والقزاز
وقعدتى ليه
متقرفصه
وانا جنب منك
مش شيطان
كرمشتلك كل
الحيطان
ردى عليا
مارديتش
وانا مش
عجيب علشان
اطيش
باشت ايديا
من العرق
والعضم شكله
مش عنيف
الوانك المدهونه
طيف
روحى اعمليهم
دبلتين
هاتشوفى مين
يتحملك
العربده زى القمر
سكران وحلمى
 منتظر
بس اما افوق
هاطلع لفوق
هاشوفكوا
من بين
السحاب