متنتور حلمى
على الحيطه
وشين دوكو
يرسموا
 احلامى الجرافيتى
ماسكه الشبابيك
......
كان نفسي اشوف
صوتى حقايق
الليل سايق
كاسر الاشارات
متداس القمر
المتغرب من غير
بسبور
ارجوك استني
ماتقتلنيش
مش سامع ليه؟
سكينة صمته
بتدبحنى
والتهمه
مافيش
شوفتينى
وانا مش عارف
اموت؟
الفرش الطيب
لسه على السريرين
مفروش
وامى بتصحى على
صوت الديك
اصحى
ماباصحاش
خلينى يومين
استنى
الحلم
على الدكه المنحوته
قلوب
اختك كبرت
جايلها عريس
الشمس بتشرق
من صندوق
التليفزيون
بتبوسنى بجد.

شوفت العفريت
عدى قصاد الترابيزه
وسرق الصبح
وروح.
طب حطى فطار
كله الا الاكل
البيت عمران.
السلم وحده
كفايه تحس
انك حبيت
 البنى ادمين
مواتير الزحمه
بتتشاقى
ف عب الاتوبيس
ولع احزانك
مابيغيرش
اصل انا متعود
على احزان الطلبه
ف قلب الكليات
اخرس
حاضر
اسمك سنك عنوانك
شغلك
ميت ميت
لسه باموت
كان نفسى احبك
زى ما قلبك صورلك
لكن ندمان
شوفت الشجره
ام العصافير
مورجحيتك لسه
هناك
وانت بتتشاقى
على امبارح
خلصت عليك
ارجوكى دموعى
مابتسيبنيش
قدر ماحصلش
بحبك ياض
وانا مش قادر
بطلت عياط
خاتم سليمان لعبه
قديمه
ف حارة المحاريم
الضهر عقيم
مش قادر انه يجيب
م الشمس العصريه
كان نفسها فينا
اغسل خلجاتك
قبل ماييجى الليل
وتنام
قوم اتشاهد
انا اصلى حلمت
لاكن ضهرى دايما
ناشف
صلى على الروح
اللى نامتلك
وانت ماوفيتش