اعلم ان
السكه طويله
اعلم ان السكه
بتطول
وانا ف الدنيا
عجيب متعافى
حضنك دافى
وانا مستغرب
حاصل ضرب حياتى
ف شوقها
يبقى الناتج
 شق طريقها
حلمت
فرحت
دبت كل صوابع
ايدها
ف قلبى
وسكتت
قول بتنكت؟
نكته سخيفه
دخلت فيا
زى الضيفه
وخرجت تانى
قول من تانى
اعلم ان السكه
طويله
اعلم ان السكه
بتطول
قول م الاول
عد صوابع ايد
السلم
انت بتحلم؟
لا باتعلم
سكن تسلم
قلبى شقق
مفروشه امانى
بس ثوانى
تاخدنى
وتهرب
حاصل جمع
الجسم
 مفاصل
شوفت ال حاصل
حضن بيضحك
بنت بتلعب
عين بتشاور
بكره منين
نن العين
 اتغرب
اضرب
اضرب
مش هاستسلم
كعبى الداير
قرفص
رفص
لما اتشنج
حلمى اتبنج
نام وارتاح
عشش شجرك
لوح تفاح
بس وراحت
قلعت توبها
وفتحت سكه
وانا محروم
كرمش واركب
طول اليوم
الاتوبيس فاضى
وشغال
شغل عيال
 طيب اخضر
لسه بشوكه
طب مستنى
يشق طريقه
اوبااااا
الحلم مالوش
رجلين
مين بيدارى
ع الحلوين
سين او صاد او ضاد
 او عين مش شايفه
حيطان البيت
نشفت عنبة بيتنا
وماتت
امى انا ماتت
وانا مدهون ع
السور جرافيتى
نفسى انط
السلك مانعنى
وفين يوجعنى
بس
نسيت
ارجع يابنى
وكرمش ورقك
صفحه جديده
اعلم ان السكه
طويله
اعلم ان السكه
مريره
وضلمه ويأس
وبتطول