البرد يصرخ
زيق 
يزم 
مفاصل
الشباك
ساعة ادان القمر
تركع نجوم
وتقوم
صبح ياليل
صبح
البت متأكده
انى هنا واقف
باحضن كمام
لاسفلت
ياااااه ع الحنين
للدفا
بلد الحبايب
طين
خط العنا خدين
شرقانه للدمعات
الشيخ قراها
ومات
(يا ايها المزمل)
مين يفهم الاموات؟
كنتك وماكنتيش
موجوده بالمره
وربطت انا 
الصره
ورميتها
مارجعتيش
الحلم برانى
فكه على حلقات
رمضان ماصامش
جديد
احنا اللى صومنا
الدهر
من غير
ولا بوسه
ملعون ابو العوزه
من واحنا لسه
عيال
انا كنت مشتاقلك
وانتى اللى دلعك
مرق
غيرك بنات ياما
متكحولين زيي
بس الطلب
بيذل
يا مه الولا طابب
التقل ليه
تمريج
ع الدكه ورسمتك
وعملت زى الناس
تسع شهور
جاها المخاض
منى
حبل الدكك متعب
العيله وحشتنى
يارب صبر
ومر الغربه
مش قادر
كتر العروق ف الايد
والنفس عرقانه
وخط العمر لسه
اخضر
شعر الشيطان
لافف على الجته
والسته والخمسه
والاربعه وواحد
ضايف خماستاشر
والكف ع الباب
بيلم ف الحدوه
حسد المره
صايب
فلق الفخاد
نصين
لسه ساعات
وارحل
على صنعة
الصابرين
صحن الهوا
بقرشين
ايام ماكان الكل
شئ
احمر بلون
الدفا
غدر الشتا بيتنا
والبرد صارخ
زيق
ف مفاصل
الشباك