سندت ضهور
الحيط
على سلة العواميد
باتت دموع حالى
متكلبشين خلفى
ف عينيا محبوسات
تحت الدفا يشهق
برد الجسد الوفات
هاموت يا صاحبى
الحق
مافياش ودان تسمع
قوم للزوال واركع
وحدك على السجاد
بطحت دماغى حاجات
نزلت زمن ع الارض
السنه
بعد الفرض
والتكبيرات تنده
وانا طالب النجدات
شوفت بعينيا حاجات
عصيان على توبه
ف الننى مكتوبه
متعفرين دنيا
من صغرى لما كبرت
هملنى جسمى
ما شيلت
تلتينى شهقاتى
والباقى حبة دم
مستكترين الكم
دعوة ف صبا م الام
لكن كتر الذم
عضمى ماعاد بيحس
حرب العنا ع النفس
بيمرمطوا فيا
يارب حنيه
حبة ضمان لله
والطامعين اقوى
يقلبنا فى المتوى
حبة تراب ناشف
من غير ندى
خايف
من بين ملايكه
شداد
مرت سنينى مداد
تفرط فراط وتدوب
والموت كما العلبه
بيلم ف اعقابنا
محروقه م التجاعيد
يارب لحظة عيد
قبل اما اموت مره
احلف بيوم شوفته
ونعاود الكاره
حزنا على الآم
سيرا على الاقدام
عزل بدون
قدره