كونك هاتحلم بالحجَر
ياخد ب تارك
تستنى لما الغراب
يطلع من التربه
ياخد عزاك
وتنسى انك غريب اصلا
وان الشمس للى عاش
على كتفك.
الليل قدر لما النهار
شافك طشاش
وغلبت اقطع وريدى
وانتحر
كافر بكل الطايعين
للنَفس
بكره اللى حاضن
عزله بين راسى وبين
الركبتين
وامبارح اللى انقضى
يحلم بكام تفرج
حاصل نتيجة نُص يأس
ف ضرب مولود اتولد
يبقى السؤال
وتموت معاه الاجابه
هل حان وقت الانتشاء
والصفا .؟
ام آن وقت الارتحال
والصمت؟
اجابات كتير مالهاش
علاقه ببعض.
الصبر ثم الصبر ثم القهر
ثم الجمر ..ثم الطهاره
الجنه مش محتاجه
فض للبكاره
ولا حد حاطط للحساب
معروف.
هايفيد بإيه أن الكفوف
تنقرا ع الخد والنفس
 اماره.
هايفيد بإيه الحلق
من غير صوت شهق
..
لسانى لما باحتلم
باستغفر الله العظيم
مع انى لا اختارت النسا
ولا قولت بم
يابختها تاخد وتجرى
من عدم
وانا اللى بينوبنى
حفان ميه على
الناشف
ومضغ صبرين
الحصى
مع لقمتين ناشفين
اسف يارب ماكنتش
اتمنى الزوال ..
ولا لسه قادر ع الكمال
انسان بفعل الحكمه .
والعقل العجين.
والخمر يِسْكِر منى
طين.
يادى العذاب الصعب
بيصدى الآلام.
ويفتفت الباقى من
 اللحم
المقدد ..
(قم فأنذر)
لسه منك كوم عضام
لسه باقيلك كلام.
لسه روحك رغم كل
الجرح عاوزه تلتئم.
وان لسه فى الحقيقه
شبه حلم
وشبه عنيوة
علام.