الفرح  كالقنطره
بيعدى للدمعات
والصوره لسه
ماخلّصِتش الالونات
زمنى وزمنك قنطره
للجاى ف جسم
ماجاش
انا عيشت زى ماعيشت
والموت علينا
 سقف للسموات
تحضنى شمس
احبها وتحب غيرى
وتنتهى ..
يا دايره لسه مكمله
دوران..
الفرن بارد.
أما الحنين ساكت
هنا
..
الدنيا مش متأكده
هاتفارق.
ولا هاتكمل .
عجبى عليك يا قلب
من غير الوصال
شغال.
عمرى كما البدال ف عجله
مكمله ل مفيش..
عقرب ساعاتى حن
للحضره.
وانا جوه صوره
مبروزه دراويش.
قادر ياليل تحضنى وتكمل
ولا اركب الصبح اللى لسه
ماجاش؟
تذكرتى فيا ذهاب
بلا عوده
على كتفى كومه صبر
ميزانها كان طابب.
دقيت على يدى وتد
طلع الوتد خايب .
ياااااااه قلة الجرح الملانه
عياط .. فرهده .. بكى مالوش
لازمه .وبكى عشان حسيت.
فاكر زمان حجيت وكام عُمره
وصليت بكام ركعه
والصوم علينا ستر.
صدق بإيه يا زمن.
انت البعيد غلبان.
عشمتنى بالأمل .
وبضحكه ملو السنان.
والوقتى شوفلك بق
يضحكلك .
وابقى التقينى ونتعاتب
كسبان وانا الخسران؟
ياعم طبطب عليا.
محتاجلك.
نقعد ف ساعة حساب ؟
مش جاى نتحاسب
أيش تعمل الاحزان ف الضهر
غير الحَز والتأنيب.
وفر دواك وحياة ابوك
انا جلدى مرر م الدهان.
وعضم جسمى  بقى
بودره.. شميته واتخدرت.
هنا كانت حبيبه بتعشق
الاوثان.. وفرد واقف ع الشجر
فارد جناحاته .
هاتوا بقى كم الحبايب اللى
منى وفكرونى اكمنى انا
بانسى.
البركه ف اللى جاى
عيل من امه تاه..
ودموعها كالقنطره بتعدى
كام عيل .
الصوره بهتت منى والواناتها
اترشرشت ع الأرض جدول
لامتحان.
رقم الجلوس منسي.
حتى السؤال
ناقص.
سن القلم
بايظ .
وملايكه ف اللجنه
رايحين ومش راجعين.
وقت المذاكره لم كام
كرسى وشطب
 ع الحساب.
انا ايه اللى جابنى
أفارق الاحباب
ضاحك على نفسي
من امتى كانوا
احباب .
مستنى كام بكره
وكام بعده .
وعيال مايتعدوا .
زى اللى قبلى هاسيب
كراسى لانتظار.
أما اللى بعدى يسيبوا
حبل الصره وينزلوا
للغير ..
زمنى كما القنطره
بيعدى كام جته
ياهلا ترى نلتقى
ولا البعيد عميان..؟