فارس وباصص
ع الشمال
على كتف مال.
والباقى من نظرة
يمين
كام عسكرى
شطرنج
كام كَش منى
كام ملك
جسمى اتهلك
ميلت على ضهر الحصان
وتعبت
مدت ايديها من الجديله
.ترقص ثوانى؟
انا كنت من قبل الثوانى
مُت.
وصحيت
مت
وبكيت
عكيت هدومى
من دموع كام مات
عدوا على صدرى القديم
الوفات
الف اشتكوا م الجوع
والف شكواهم
فراق
والباقى حضَن الاختناء
الصدر داق
والضلمه بتخوف
غمضت عينى
ماشوفتش المشهد.
كان فى زمان
قبل الدفا والبرد
خلق ماكملوش
كان فى زمان
حبة رتوش
على صحرا فاضيه
وكام جبل
وحته باقيه من القمر
هربانه من حضن
السما
وشباكين من قزاز
بيبصوا على علبة دوا
فوق كومودينو
شوفت العيا وبعدت
متر
ادانى ضهره.
وقفت ثابت.
على ضهرى كانت
بندقيه
كتفا سلاح يا عسكرى
صوت من بعيييد
عطشان يا عالم حلقى
لسه بيتولد
وطيت اكمل حفر تحتى
الميه هجمت مالحه تجرى
ف وشى شميت الغرق
فَ فضلت اعافر كاااام
سنه عدوا مابين نفخ النحاس
وبين صوت الجزم
ع السجادات الحمر
(قولوا لعين الشمس ماتحماشى
لاحسن حبيب القلب صابح ماشى)
غنيت على ناى الغريب وعزفت چاز
ع الترابيزات.
قعدت تبص لبدلتى ففرحت
وخطفت كرسى من البارات
وحضنته جامد قوى
كسر ضلوعى وساب
ف سدرى سلسله
مكتوب عليها اسمى ورموز
الكتيبه......
.
ليست هناك تعليقات:
إرسال تعليق