انت عارف يعنى ايه كلمة بلادى
يعنى دينى ودنيتى ورأيي وعنادى
يعنى ثوره ونيل والف شهيد وعيد تحرير
وغنوايه
وضلة توت وبكرج شاى وصوت الناى وتنهيده
و نوح وبليغ ومكاوى وقعده ف ساقية الصاوى
وشعر الجخ فى قصايده اللى مابتخلصش
يعنى نجم امام ونواره
و ساقيه بكر دواره
وصوت غنوه تقول ازاى
ف بق منير بتتغنى
تقول للصبر استنى
خلاص وقتك ما عادله مكان
فى قلب ادان وترنيمه
جرجس لما دق الخيمه
جه محمد ومد الايد
صبح اسمك يا بلدى عيد
دانا نوار مانيش صبار ولاصفصافه ع الناصيه
دى مهما الموجه جت قاسيه انا مصرى وباتحمل
واشق بلادى للاجمل
عشان تبقى ف يوم نرجس