فِ ساعات بتلاقى
خطوط
وساعات بتلاقى
مسافات
وبيوت توأم فى عينيك
وعيون بتشوف العكس
وعيون مش قادره تبص
وايدين بتشاور بس
فلست .
وماعادش معاك افكار
ومرايتك عاكسه خيانه
لصوره اتلزقت ع الجدران
مش ذنبك أن قرينك خانك
مع ابليس
مش ذنبك ان السر ماعادلوش
سر
وانك وسط الصندوق
عريان
اخر تفكيرك لون متغير
على نصين
غامقين ؟ ممكن
ف لحد شفايفك
ما بتتحقق من طعم العنب
الحادق
تفضل تتخيل فاكهات
وساعتها حاجات بتغَيّر
وضع سكونها
لوضع الرفض
فا بيعلى معاها النبض
والضغط
وتفوق ندمان انك مابقيتش
بتحلم زى ما كنت.
دخانك يطلع من غير
دخان
وسنانك صفرا قديمه
محشيه بريحة العِتّه.
والفيديو بيعرض ومكمل
وانت مبرق
مش قادر تقفل بقه
تقوله ستوب
فَ تغمض عينك
مع انك رافض للنوم
مش فاكر الا دموعك
يمكن تغسل
اخر مشهد
استشهد فيه الجسم
من وسط الوقت الجاى
بتقوم
موشوم ببقايا الحبل اللى
اتلف على رقبتك
وساعتها بتسأل نفسك
ايه ؟
بيرد عليك الصوت
اسكت
كمل
بتكمل
