نفس الكلام
نفس المدينه والشوارع
من نفس ذات النفس
بين
.شجر الضلوع الحامله
للوجه ذي الجفنين.
الذكريات الباقيات
اللى يجوز للصالحات
الطارحات عنب وتين
أنا كنت نايم ساعة الضهريه
لاء.
ساعة العصريه .
مش متأكده ليا الحقايق
بس فى التفاصيل ساعات
لون الرماديات بيمنع رؤيتى
للمشهد.
اياك نشهد انك قبل الوجود.
قبل اختلاق الكم للكون
الولود.
احببت فيا كونى كامل فيا
من كل المناظر والمخاطر
و الخواطر وال..
.كان واجب انه يتوجد
كائن شبيه للتكوينات
كان فيها من كل البنات
الكائنات من فيما بعد
لحد اخر يوم ممات.
نفس الغوايه بنفس ذات
اللعبه ،جرتنى التجارب
ماتقولش ليه نسبه وتناسب
بالتقارب للزمن
مااشبه الليله ب جو البارحه
مااشبه الشجره
بسلسال من بشر
يلعب قمار
ع المكسب المجهول
رغم انه عارف ان باب الرزق
مفتوح ع المقاس
زى سنتى البنج
محقون فى الوريد
الدنيا خضرا اما السما بلون
الزراق الدافى
انا كنت من يوم الميلاد
للحظه دى حافى
فطلعت اجرى
وجيبت اخرى
واتكيت
على ترس بيدور
من بيانولا رمانى
جوه صندوق العجايب
.
قدامى فارس كان همام
على فرسه لسه مطبوخه
لاهل الله بتتوزع
والحنه دايره تلف على
كل الكفوف
الله
فكيت محابس دمعى
نزلت شلالات
جسمى رخا
عضمى خرج
يحضن حيطان الطين
.
حنيت ياعضم التربه
للأصل الذى سواك جسد
ارقد حلالا طيبا دايب مابين
كوم التراب .....
ليست هناك تعليقات:
إرسال تعليق