انتى القصيده
البكر ف ديوان
البنات
زيك عيون الفجر
وقت الشقشقه
هل لى اعتصار
الكرمتين تأذنا؟
ام أن ذات السكر
من خمرك حرام؟
اول دخول السينما
نظره للافيش
حتى أن سمار الجتتين
باهت
داير صغير فى الشوارع
منتبه
يمكن تاخدنى الاعلانات
ع الحيط
اتنين وكام اتنين
وانا
وباعدى كام اتنين
وانا
وكبرت تانى اتنين
وانا
اللى فضلت واحد
(ضحكت عيون حبيبى
ضحكت ليها الليالي
سافر قلبى الحبيب
سافر بعد انشغالى)
وعينيا غلبت لف
ع الاسفلت
دابت وانحنت
طبطبت بدرى عليها
بشوية قزاز.
(لما كان البحر أزرق)
كان الشبه مألوف
ولد
وقت الولاده
جميل
تكبر وتحلو ف عيون
الناس تختفى
وانا لسه متأخر
بعيد
شبيت
قطعت هدومى
غمضت
احلم باللى مش
موجود
(سلمى عليه قوله
انى بسلم عليه)
اول سيجاره
جسمى نمل
شوفت كل الناس
حيطان
شوفت ع الاسفلت
باب
شوفت وش ابويا
كشر
شوفت صاحبى
ف دمعتين
من غير كلام
كنت ساكت
بس هى عينيها
ضحكت دخانات
شوفت منها ع الافيش
والاعلانات
الف ضحكه
بس
باهته
وهوب راحت
............
ليست هناك تعليقات:
إرسال تعليق