البعد .
ضرير.
والحلم ف وادى 
الضلمه 
بعيد.
وانا .
شيشت حيط الامل
شباكه مافتحشى.
روحت ليل
والنهار قاسى
وانا .
مافيش فرح
كل الدموع
نازله بتنزف
ذكريات.
دانا
حبيت وطن
ومات.
يالله البقاء
لله.
الغربه ياولداه
عشا .
والمغربيه بهيه
بس ما بتجيش.
اه يا غموس
والعيش غريب.
طليت على الاحباب
غريب.....
سلفنى من خد البنات
فرحه
اه يا زمن.
بانده عليك
اتاريك
خارق ودان البكر
ومحبلها طين...
ياليل ياليل
يا اسى .
أسير بين العاشقين
واتنسى.
جمعات بتيجى
والف جمعه تروح.
واحنا مابين جمعات
ف قلب الذات
ملل..
بلدى اللى خدت
السيلفى علشانها
وعشقت كل الحاضرين
على شانها.
يا حبيبتى مالك.
صعبان عليا كل
خطوه وانتى
مش على وضع
حتى الغروسه
عطن والطرح
خايخ.
قالت ..
وكنت انا ف الجون
وبعد ماشاطنى
واد مجنون
وسقطت لم اعرف
غدا من أمس.
(كالذى يتخبطه الشيطان
من المس)
بس .
واهو كل الحقايق
زيف.
رمضان يا وش الخريف
والصوم يدوم
اعوام..
العيد قوام بيلم
مراجيحه.
وصبر قوم تشبهوا
ب أيوب .
لاكن سجن العزيز
قاسى .
وزليخه ع الترعه
بتستنى الفرج.
سبع عجاف يا محترم
والريق خشب .
فيضان لوادى النيل
واللوحه زيتيه.
كنا زمان ساعة عصارى
نلملم التراحيل.
لكن الرحيل مكتوب
على جبين الميلاد.
يا قلة الزاد الصعيبه
والمزاد على كل
رأس شهيد.
جرافيتى يا ممسوح
ونوح لم يأتى بالسفينه
الأم.
وكل زوجين على
الكافيه
بيقضوا باقى الوحده
ذل.
يا سيدى .
ارجوك طمعا تعشق
الناس .
وتحب طوب العرض
اصل الشرف
غالى...