كتفا وشيال ..
ايوب..
وشله من العيال.
رحال ياعمرى 
اللى اتسرق 
منى..
اكمنى باتشعبط
ف رجل اللى
ما راحمنى.
تربى و وارى
جسدى وساب
الروح
مجروح وباتحاسب
على مهل الملايكه
حد العذاب ما مل.
ياربى فى المحيا
زبانيه.
وف الممات ورديتين
على جسمى لما فل.
وغلبت اقطع من بقايا
الخد دمعه ورا دمعه
حد ان عيونى انحنوا
ورموشى شابت عجز
اضحك ؟
ياشيخ اتوكس
فقرى ولد فقرى
والغلب عشش عنكبوت
على ضلعى
وقلبى
مالقاش الحمام
بيبيض.
ايدى يا ناس عنست
من قلة السلامات
ودراعى متجبس من
العطله.
اترجى فيك يا زمن
تشوفلى شغلانه
عريانه يا جتتى
من قلة الهدمه.
اه يا بلد دابت من
التخزيق.
ماهو كل يوم مايفوتش
غير بالذل.
يا عمر جالك سل
والكحه نشفانه.
ازاى تصبح ع العليل
بالدوا .
والاجزجيه شطبوا
ماجبروش.
جرى الوحوش هريه
على الفاضى .
كنا زمان نجرى
ومنتعبشى.
دلوقتى يارب باصلى
وانا قاعد .
رقده ورا رقده
اما نسيت امشى.
قلبى رمى العكاكيز
من لفه ع التوابيت
شايف ف كل دقيقه
ناس ماتت.
وايش يعمل الشريان
والسد شاب عنيد
وتفيد بإيه القسطره
والزيت مكان الدم..