العد ليه انتشر
ميات على الوفات
وانا لسه ف المبتدا
باعد ف الاموات
الدم دا مصرى
والدم دا مصرى
والروح محاوطاهم
اه يا غبا عصرى
عصرت فينا اقداح
وسقيته بين فكين
نزل الكلام مرتاح
سيل على الرمله
طرحت مرار طافح
والارزجيه اشتروا
وباعولنا بالقناطير
واحنا اللى صدقنا
وشربنا منه كتير
عجبى عليك يازمن
بتعلى فى الطراطير
وكل شئ له تمن
لسه الغلابه كتير
وبيحلموا بالمم
ايه ذنبهم يا عم
يبروزوا اللقمه
وبدال مايملوا الفم
نظره تشبعهم
يرموا مواجعهم
ف عب ليل بكره
مش وقت مين يكره
ومين يحب ف مين
عطش العرق ف سنين
ماشربش من جيبه
والفقر كان سترته
وماكانش بيعيبه
الله يجازى العشم
يوم ماتزرع خضره
وبنى الهوا فدادين
كان وقت ما القدره
طرحت جدور ملايين
طلعوا على الفاضى
كلهم خريف ماضى
ورجع الباقى
تايه ومش لاقى
دايب ف قهرايه
جه يغمس الكلمه
صبعه بقى جرايه