فكرت ؟

ماتتخضش ارجوك 

وقت ما تاخدك عربيه ف لحظة

مانت بتتسرح قبل ما تنزل

م البيت

وف عز الأرض ماتحضن ضهرك

تسمع اخر صوت تكسير 

لعضامك متضفر مع حقنة 

بنج 

لحظات وتغمض عينك 

ماتشوفش الا رماد الدخان 

تتكعبل بين شرايين مخك

لحظاتك وانت مغمض

 دا مابين أنك تقع 

أو تمسك نفسك تلحقها

قلبك بيدق ،فوق ال ١٢٠

تعرق جدا 

سنك فوق الستين

والحاصل ضرب ف مجموع 

البدايات 

بيعدى شريط عارفه كويس

تفتكر الفيلم العربى الممنوع م العرض

تفتكر الفرض 

مع الف اشاره 

تقولك ..موووت

وتشوف القطر معدى 

على الاسفلت

فتلاقى ايديك 

حضنت وسط البت جارتكوا

والباقى 

يتلخص ف شفايفك وانت بتضحك

وبتحلم بولاد وبنات

من سن الواد الحلو اللى ماداقش 

الخرابيش

فتقوم وتعيش

وتفتح عينك .

على خلق ماتعرفهومش

تتمنى انك ترجع تانى 

فاتخاف......

 اتاريك بتعيش من بعد ما عيشت 

ياما كنت الميت. ف رواية بعض .

الناس هاحسباك على ناس ماتت

وانت الايام منك فاتت .وبترجع

وانت ف كل المرات اللى اتعادت 

متوجع

الثابت فى الكتب العمرانه كلام

الشمس .الارض.الساعه . 

بره مناطق تكوين جسمك 

اللمس . العرق .الدموع

بيمين، تتقلب

 فاينام القلب على 

المعده ويطفى النور 

المشهد فينا بيتكرر 

مع دوسة ايد .

بيلف الفيلم .

اختلف الكل على الفكره 

لكن.

اتفقوا البعض على التفكير

فا اكيد .

جربت تزعق

 ويرد عليك

صوت حد تظن بإنه غريب 

ركزت شويه؟

تصدقنى 

لو قولت أن ده صوتك 

لكن ف حيطان غيرك 

موجود

طب ماذا لو احلامك

 زى ماهى بتتحقق 

نفس المشهد 

وبنفس رتوشه 

ووشوشه الرماديه 

ونفس الدخان

تتلخبط .ممكن بين 

النوم والصحيان 

صدقني ان قولت ان 

ده حاصل اصلا 

ضرب حياتك ف حياتك 

وحياتك اصلا على أجزاء 

قررت خلاص أن احنا كتير 

جوا الواحد 

وان الواحد اصلا ف كتير 

شوف كام بنى ادم كانوا

هناك 

والكام بنى ادم دول جايين