يا ليل يا ناس
يازمن مخاوى
ياعتمة السفر
المداوى
يا طيبين شوفتوش
قمر غاب عن مداره
شاب اتنده للغيب
ومر
الضلمه ليه لونها استمر
وقلبنا صبح الدليل
يا ليل ياعين
دمعه
صحرا ومش سامعه
وكام بشر هايبين.
الضحك كشر عن سنان
بنى
لما الفرح عدى ف وسط
الخلا
زفه وكفه محنينها بتراب
الله على بق السقايه
ف عز عز الحر
من كوبيات دافيه ولا ترويش
ياليل يا عين دراويش
زحمة دموع
فى الجسد
عتمه فى كيس الجلد
الحكم للروح التى
واقفه وبتشاهد
جربت اتشاهد
سميت و ملست
اصل القرار مليان
أما الجواب واضح
فا الاسم مش واضح
تايه ف وسط الإيه
وسط الحاجات
والايات والذكر
سنتين وحال
درويش
والحضره وحدانى
شي الله يا ورد الجناين
مروى بمية وِرد
ابويا جه فى المنام
ضاحك ومتبسم
يابنى بلاش تجرى
بالراحه ع المشاوير
أنا كنت صادق قوى
ومصدق الدنيا
رشيت سبرتو ع الحيطان
وكتبت شجره من البشر
طوابير
طب هما ليه اتبخروا؟
نشفوا بفعل الريح
ياعم بس اختشى
كان فى هنا واحد
بيشيلنى ع الكتفين
كان فى هنا واحده
بترتب الدواليب
كان فى هنا مكاتيب
واخوات وتبات وبنات
وضحكه لو ف الدرا
مسروقه وتعدى
كان فى هنااااك جدى
سابلى أنا عكاز
ووصل نور قديم
الا صحيح بسؤال
ليه معادش بيخبط
الراجل اللى كان
بياخد القرايات
